ក្នុងជំនួបជាមួយនាយករដ្ឋមន្រ្តីកម្ពុជាកាលពីដើមសប្តាហ៍នេះ លោក Fujita Ryoji នាយកក្រុមហ៊ុន Toyota Tsusho Manufacturing (Cambodia) បានបង្ហាញពីគំនិតផ្តួចផ្តើម​របស់ក្រុមហ៊ុន ក្នុងការ​បង្កើត​សាលា​បណ្តុះបណ្តាលជំនាញយានយន្ត (Toyota Academy) នៅ​ប្រទេស​កម្ពុជា ហើយ​បានស្នើ​សុំ​អនុសាសន៍​ណែនាំពីសម្តេចធិបតី​ពាក់ព័ន្ធនឹង​ការ​រៀបចំ​បង្កើត​សាលា​បណ្តុះបណ្តាលជំនាញយានយន្តនេះ។

ជាការឆ្លើយតប សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានគាំទ្រ​ចំពោះ​គំនិត​ផ្តួចផ្តើម​របស់ក្រុមហ៊ុន​លើ​ការ​បង្កើត​សាលា​បណ្តុះបណ្តាល​ជំនាញ​យានយន្ត​នៅ​កម្ពុជា ហើយ​សម្តេចបានផ្ដល់អនុសាសន៍ដល់ក្រុមហ៊ុនក្នុងការរៀបចំបង្កើតសាលាបណ្តុះបណ្តាលនេះជា២ជម្រើស ៖ (១) ក្រុមហ៊ុនអាចរៀបចំបង្កើតសាលាបណ្ដុះបណ្ដាល ដោយក្រុមហ៊ុនផ្ទាល់តែម្តង និង (២) ជាទម្រង់កូនកាត់ (Hybrid) ដោយសហការជាមួយនឹងសាលាបណ្តុះបណ្តាលរបស់រាជរដ្ឋាភិបាលដែលមានស្រាប់ តាមរយៈកិច្ចសហការជាមួយនឹងក្រសួងការងារ និងបណ្ដុះបណ្ដាលវិជ្ជាជីវៈ។

បន្ថែមលើនេះ សម្ដេចធិបតី ក៏បានលើកទឹកចិត្តដល់ក្រុមហ៊ុន ពិនិត្យលទ្ធភាពក្នុងការរៀបចំការបណ្តុះបណ្តាលនេះឱ្យមានលក្ខណៈទូលំទូលាយ ដោយមិនត្រឹមតែបណ្ដុះបណ្ដាលធនធានមនុស្សសម្រាប់តែបម្រើការក្នុងក្រុមហ៊ុនតូយ៉ូតា ប៉ុណ្ណោះទេ ប៉ុន្តែអាចពង្រីកវិសាលភាពនៃការបណ្ដុះបណ្ដាលដល់យុវជនកម្ពុជា ដើម្បីឆ្លើយតបទៅនឹងតម្រូវការនៃទីផ្សាការងារផ្នែកយានយន្ត ទាំងក្នុង និងក្រៅប្រទេស នាពេលអនាគត។

ចំពោះគម្រោងនៃការបង្កើតសាលាបណ្តុះបណ្តាលជំនាញយន្តនៅ​កម្ពុជា របស់ក្រុមហ៊ុន Toyota នេះ លោកបណ្ឌិត យង់ ពៅ អគ្គលេខាធិការ​រាជបណ្ឌិតសភាកម្ពុជា និងជាអ្នកវិភាគសង្គម​មើលឃើញថា វាជាដំណឹងដ៏រីករាយ ។ លោកថា ប្រសិនបើសាលាបណ្តុះបណ្តាលយានយន្តនេះបើកដំណើរការ នោះ​យុវជន ក៏​ដូចជា​ប្រជាពលរដ្ឋ​ខ្មែរ នឹង​ទទួលបាន​ការ​បណ្តុះបណ្តាល​វិជ្ជាជីវៈ​ប្រកប​ដោយ​គុណភាពទៅលើជំនាញបច្ចេកទេស​តាមបែបជប៉ុន ព្រមទាំង​ទទួល​បាន​ឱកាស​ការងារ​ជាមួយ​ក្រុមហ៊ុន​ជប៉ុន ក៏​ដូចជា​ក្រុមហ៊ុនផ្សេងៗទៀត។

“ការវិវឌ្ឍថ្មី នៃសេដ្ឋកិច្ចសម័យឌីជីថល គឺត្រូវ​ការ​នូវ​អ្នក​ដែលមាន​ជំនាញ​បច្ចេកទេស​កម្រិតខ្ពស់ កម្រិតស៊ីជម្រៅ… អញ្ចឹងនេះពិតជាបានចូលរួមចំណែកជាមួយរាជរដ្ឋាភិបាលកម្ពុជានិយាយជារួម និងដោយឡែកចូលរួមបណ្តុះបណ្តាលជំនាញបច្ចេកទេសដោយផ្ទាល់ដល់យុវជនរបស់យើងក្នុងបរិបទថ្មីនេះ…”

លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា

គួរ​ជំរាបជូនដែរថា កាលពីដើមខែឧសភា ក្រុមហ៊ុន Toyota បានបើកដំណើរការ​រោងចក្រ​តម្លើង​រថយន្ត​នៅ​កម្ពុជា ដែល​មានទីតាំង​ស្ថិត​នៅ​ក្នុង​តំបន់សេដ្ឋកិច្ច​ពិសេស​រ៉ូយ៉ាល់​គ្រុប​ ភ្នំពេញ។ បើតាម​ក្រុមហ៊ុន Toyota ក្នុងដំណាក់កាលដំបូង រោងចក្រ​នេះ​មានសមត្ថភាព​តម្លើង​រថយន្ត​ចំនួន២ប្រភេទ គឺប្រភេទ SUV ម៉ាក FORTUNER និងប្រភេទ Pick-UP ម៉ាក HILUX ដែលមានទុនវិនិយោគ​ចំនួន ៣៦,៧៨១,០០០ដុល្លារអាមេរិក និងមានបុគ្គលិកសរុបចំនួន ១៥០នាក់ ហើយ​មានសមត្ថភាពដំឡើងរថយន្តចំនួន ១,៣២០គ្រឿងសម្រាប់ផ្គត់ផ្គង់តម្រូវការ​ទីផ្សារ (Market demand) ឆ្នាំ២០២៤ ក្នុងនោះរថយន្ត FORTUNER ចំនួន ២៩០គ្រឿង និងរថយន្ត HILUX ចំនួន ១,០៣០គ្រឿង៕