ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងសិក្ខាសាលា ស្តីពីការរក្សាសុវត្ថិភាពកុមារនៅក្នុងវិស័យសារព័ត៌មាន កាលពីព្រឹកថ្ងៃទី២៣ ខែឧសភា ឆ្នាំ២០២៥ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានស្នើដល់អ្នកសារព័ត៌មាន ក៏ដូចជាអ្នកផ្សព្វផ្សាយនៅលើបណ្តាញសង្គម សូមកុំផ្សាយព័ត៌មានដែលធ្វើឱ្យប៉ះពាល់ដល់សិទ្ធិ កិត្តិយស និងសេចក្តីថ្លៃថ្នូររបស់អ្នកដទៃ ជាពិសេសកុមារ ដែលអាចធ្វើឱ្យកុមារនៅពេលពួកគេពេញវ័យ ប៉ះពាល់ដល់ផ្លូវចិត្ត ឬមានការរើសអើង។
ឯកឧត្តម ទេព អស្នារិទ្ធ បញ្ជាក់ថា បច្ចុប្បន្នប្រជាពលរដ្ឋ ដែលប្រើប្រាស់នូវបណ្តាញទំនាក់ទំនងសង្គមភាគច្រើនជាយុវវ័យដែលមានប្រមាណ៦៩ភាគរយ នៃប្រជាជនសរុប, ដូច្នេះ អ្នកសារព័ត៌មានត្រូវចូលរួមក្នុងការផលិតផ្សព្វផ្សាយព័ត៌មាន ដែលចូលរួមចំណែកការពារ លើកតម្កើងនូវការការពារសិទ្ធិ កិត្តិយស សេចក្តីថ្លៃថ្នូរ របស់កុមារ និងយុវវ័យ។ ឯកឧត្តមបន្តថា នៅក្នុងការងារជាអ្នកសារព័ត៌មាន មិនមែនគ្រាន់តែជាអ្នកចុះទៅយកព័ត៌មាន ផ្សព្វផ្សាយឱ្យតែបាននោះទេ ពោលគឺត្រូវពិនិត្យ ស្រាវជ្រាវ និងផ្សព្វផ្សាយព័ត៌មានប្រកបដោយក្រមសីលធម៌ មិនប៉ះពាល់ដល់សិទ្ធិ កិត្តិយស សេចក្តីថ្លៃថ្នូររបស់អ្នកដទៃឡើយ។
ជាមួយគ្នានេះ លោក យី គឹមថាន នាយកប្រចាំប្រទេសស្តីទី របស់អង្គការភ្លែនអន្តរជាតិកម្ពុជា និងជាតំណាងបណ្តាញផ្នែកទំនាក់ទំនង មានប្រសាសន៍ថា សិក្ខាសាលាស្តីពីការរក្សាសុវត្ថិភាពកុមារនៅក្នុងវិស័យសារព័ត៌មាន ត្រូវរៀបចំឡើងដោយមានគោលបំណងរួមមួយ គឺពង្រឹងសមត្ថភាពរួមគ្នា ដើម្បីរាយការណ៍ប្រកបដោយក្រមសីលធម៌ និងការទទួលខុសត្រូវ លើគ្រប់បញ្ហាដែលទាក់ទងនឹងកុមារ យុវជន ជាពិសេសក្មេងស្រី និងស្ត្រីវ័យក្មេង ដើម្បីរក្សាបាននូវស្តង់ដាគាំពារខ្ពស់បំផុត។
នាយកប្រចាំប្រទេសស្តីទីរបស់អង្គការភ្លែនអន្តរជាតិកម្ពុជាបន្ថែមថា ប្រព័ន្ធផ្សព្វផ្សាយដើរតួនាទីយ៉ាងសំខាន់ក្នុងការបង្កើនការយល់ដឹង និងការយល់ឃើញរបស់សាធារណជន ហើយនេះជាការទទួលខុសត្រូវដ៏ធំ។ លោកថា នៅពេលរាយការណ៍អំពីកុមារ យុវជន និងបុគ្គលដែលងាយរងគ្រោះ ត្រូវធានាថា សុវត្ថិភាព សេចក្តីថ្លៃថ្នូរ និងសិទ្ធិរបស់ពួកគេមិនត្រូវបានប៉ះពាល់ និងបំពានឡើយ។
លោក យី គឹមថាន ជឿជាក់ថា វគ្គបណ្តុះបណ្តាលនេះមិនត្រឹមតែជួយកសាងសមត្ថភាពរបស់អ្នកចូលរួម តែក៏អាចជួយបង្កើនការសហការរវាងអ្នកសារព័ត៌មាន និងអង្គការមិនមែនរដ្ឋាភិបាលដែលធ្វើការគាំទ្រដល់កុមារ ហើយអ្វីដែលសំខាន់នោះ គឺធានាថា សំឡេងរបស់កុមារ និងយុវជន ត្រូវបានគេឮ គោរព និងការពារពួកគេពីគ្រប់ទម្រង់នៃអំពើហិង្សា និងការអនុវត្តដែលបង្កហានិភ័យដល់ពួកគាត់។
គួរជំរាបជូនថា សិក្ខាសាលាបណ្ដុះបណ្ដាលអ្នកសារព័ត៌មាន ស្តីពីការរក្សាសុវត្ថិភាពកុមារនៅក្នុងវិស័យសារព័ត៌មាន ត្រូវរៀបចំឡើងដោយអង្គការឃែរកម្ពុជា អង្គការភ្លែនអន្តរជាតិកម្ពុជា អង្គការ Save the Children ប្រចាំកម្ពុជា យូនីសេហ្វប្រចាំកម្ពុជា និងអង្គការទស្សនៈពិភពលោកអន្តរជាតិប្រចាំនៅកម្ពុជា ក្នុងគោលបំណងដើម្បីការពារកុមារ និងសហគមន៍ដែលងាយរងគ្រោះ កាន់តែប្រសើរឡើង៕
