រាជបណ្ឌិត្យសភាកម្ពុជា គ្រោងបង្កើតឱ្យមានកម្មវិធីសិក្សាថ្នាក់បរិញ្ញាបត្រ នៅដើមឆ្នាំសិក្សា២០២៥-២០២៦ខាងមុខ ដោយផ្តោតលើការស្រាវជ្រាវ និងការ​អនុវត្តផ្សារភ្ជាប់ជាមួយទ្រឹស្តី ដើម្បី​ជួយ​យុវជន​កម្ពុជា​ឱ្យ​ក្លាយជាពលរដ្ឋ​សាកល អាច​ប្រកួតប្រជែង​លើទីផ្សារ​ការងារអន្តរជាតិបាន។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិតសភាកម្ពុជា មានប្រសាសន៍ថា មជ្ឈមណ្ឌលបណ្តុះបណ្តាល និងស្រាវជ្រាវនៃអគ្គលេខធិការដ្ឋាននៃរាជបណ្ឌិត្យសភាកម្ពុជាត្រៀមបើកថ្នាក់បរិញ្ញាបត្រ ដោយជំហានដំបូង នឹង​បើកទៅ​លើមុខជំនាញចំនួន ៦ រួមមាន ១. វិទ្យាសាស្ត្រនយោបាយ ២. វិទ្យាសាស្រ្តសេដ្ឋកិច្ច ៣. រដ្ឋបាលសាធារណៈ ៤. ទេសចរណ៍ភាសាចិន ៥. អក្សរសាស្ត្រខ្មែរ និង៦. សិល្បៈ ។ ហើយ​នាពេលអនាគតរាជបណ្ឌិតសភាកម្ពុជានឹងពង្រីកជំនាញបន្ថែមទៀតដើម្បីជួយពង្រីកមូលធនមនុស្សក្នុងការជួយអភិវឌ្ឍន៍ប្រទេសជាតិ។

អគ្គលេខាធិការ នៃរាជបណ្ឌិត្យសភាកម្ពុជា បន្ថែមថា គោលបំណងនៃការបង្កើតឱ្យមានកម្មវិធីសិក្សាថ្នាក់បរិញ្ញាបត្រនេះ គឺដើម្បីបង្កើនមូលធនដែលប្រកបដោយចំណេះដឹង ចំណេះធ្វើ និងមានក្រមសីលធម៌ខ្ពស់ក្នុងការចូលរួមអភិវឌ្ឍន៍ប្រទេសជាតិ ។ ទន្ទឹមគ្នានេះ ក៏​ជាការបណ្តុះសិស្សឱ្យក្លាយជាទំពាំងស្នងឫស្សីដ៏រឹងមាំលើជំនាញដែលខ្លួនបានរៀន ហើយក្លាយជាទំពាំងដែលមានតម្លៃទាំងកម្រិតតំបន់ និងអន្តរជាតិ តាមរយៈការរៀនដោយប្រើប្រាស់ការស្រាវជ្រាវជាគោល។ ក្នុងនោះ សិស្សក្លាយជាពលរដ្ឋពេញលេញ និងពលរដ្ឋសាកលដោយផ្តើមចេញពីថ្នាក់បរិញ្ញាបត្រតាមរយៈការយកទ្រឹស្តីផ្សារភ្ជាប់ការអនុវត្តន៍ផ្ទាល់ និងរៀនលើសពីអ្វីដែលមាននៅក្នុងសៀវភៅ ។

បើតាម លោកបណ្ឌិត យង់ ពៅ ការបង្កើតឱ្យមានកម្មវិធីសិក្សាថ្នាក់បរិញ្ញាបត្រនេះ នឹងរួមចំណែកជួយដល់និស្សិតក្នុងការពង្រីកឱកាសដល់សិស្សដែលបានបញ្ចាប់ការសិក្សាមធ្យមសិក្សាទុតិយភូមិមករៀនបន្តថ្នាក់បរិញ្ញាបត្រលើជំនាញមួយចំនួនដែលពុំទាន់មានសាកលវិទ្យាល័យណាមួយក្នុងស្រុកដែលមាននៅឡើយ។ ទន្ទឹមគ្នានេះ ក៏បង្កើតឱកាសដល់សិស្សដែលមានចំណង់ចំណូលចិត្តលើជំនាញវិទ្យាសាស្ត្រនយោបាយ ឬរដ្ឋបាលសាធារណៈឱ្យពួកគេអាចចាប់ផ្តើមរៀនពីកម្រិតបរិញ្ញាបត្រ។ « ជាឱកាសរបស់សិស្សដើម្បីស្វែងយល់ពីសារៈសំខាន់ ជាពិសេសលើជំនាញវិទ្យាសាស្រ្តនយោបាយ ការប្រកួតប្រជែងនយោបាយ ភូមិសាស្ត្រនយោបាយ ឬតួនាទី និងការប្រើប្រាស់នយោបាយក្នុងការដឹកនាំសិស្សឱ្យ​មានឱកាសរៀនដោយផ្ទាល់ជាមួយនឹងគ្រូ/សាស្ត្រាចារ្យដែលជាអ្នកមានបទពិសោធន៍ច្រើនឆ្នាំ, ជាថ្នាក់ដឹកនាំ និងជាអ្នកអនុវត្ត និងដឹកនាំការងារទាំងនោះដោយផ្ទាល់។ ម៉្យាងវិញទៀត ជំរុញឱកាសក្នុងការរៀនតាមរយៈការយកទ្រឹស្តីដោយផ្សារភ្ជាប់នឹងការអនុវត្តន៍ជាក់ស្តែង»។

ជាមួយគ្នានោះ អគ្គលេខាធិការ នៃរាជបណ្ឌិត្យសភាកម្ពុជាសង្កត់ធ្ងន់ថា គ្រឹះស្ថានឧត្តមសិក្សា ចាំបាច់ត្រូវតែជាគ្រឹះស្ថានវិទ្យាសាស្រ្តពិតប្រាកដ។ ក្នុងន័យនេះ លោកបណ្ឌិតមានបំណងលើកទឹកចិត្ត និងជំរុញឱ្យគ្រឹះស្ថានឧត្តមសិក្សាទាំងអស់ យកចិត្តដាក់ខ្ពស់ក្នុងការជំរុញឱ្យនិស្សិតមានការសិក្សាស្រាវជ្រាវប្រកបដោយក្រមសីលធម៌វិជ្ជាជីវៈតាមបែបវិទ្យាសាស្រ្ត តាមរយៈការអានប្រកបដោយប្រសិទ្ធភាព ការសរសេរប្រកបដោយគរុសភា និងការវិភាគពោរពេញដោយទឡ្ហីករណ៍និងសូចនាករ។

សូមបញ្ជាក់ថា រាជបណ្ឌិតសភាកម្ពុជា គឺជាស្ថាប័នស្រាវជ្រាវ និងអប់រំជាន់ខ្ពស់បំផុតនៅកម្ពុជា ដោយបានចូលរួមយ៉ាងសកម្មក្នុងការអភិវឌ្ឍវិទ្យាសាស្ត្រ បច្ចេកវិទ្យា សិល្បៈ និងវប្បធម៌។ ក្នុងនោះ រាជបណ្ឌិត្យសភាកម្ពុជា រួមចំណែកអភិវឌ្ឍន៍គុណភាពធនធានមនុស្សជាមួយរាជរដ្ឋាភិបាលសំដៅធ្វើយ៉ាងណាអាចសម្រេចចក្ខុវិស័យរបស់ជាតិក្នុងឆ្នាំ២០៣០ ជាប្រទេសដែលមានប្រាក់ចំណូលមធ្យមកម្រិតខ្ពស់ និងជាប្រទេស​ដែលមានប្រាក់ចំណូលខ្ពស់នៅឆ្នាំ២០៥០៕