ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងពិធីសម្ពោធអគារសិក្សា អគារទីចាត់ការ ផ្ទះស្នាក់នៅគ្រូ និងសមិទ្ធផលនានា នៅក្នុងខេត្តកំពង់ស្ពឺ នាព្រឹកថ្ងៃទី៨ ខែកក្កដា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា គុណភាពគ្រូ គឺជាកត្តាសំខាន់ដើម្បីពង្រឹងគុណភាពធនធានមនុស្ស។
សម្តេចធិបតី ហ៊ុន ម៉ាណែត បញ្ជាក់បន្ថែមថា គុណភាពអប់រំដែលសំខាន់ គឺគ្រូបង្រៀន ទោះបីជាមានសម្ភារៈឧបទេសគ្រប់គ្រាន់នៅក្នុងសាលារៀនក៏ដោយ ប៉ុន្ដែបើមានកង្វះខាតនូវគុណវុឌ្ឍិគ្រូបង្រៀន ក៏មិនអាចផ្ដល់ការអប់រំដល់សិស្សបានដែរ។ ដូច្នេះ រាជរដ្ឋាភិបាលតាំងពីអាណត្តិមុនៗ និងអាណត្តិទី៧នេះ បានបន្តខិតខំយកចិត្តទុកដាក់វិនិយោគលើការបណ្ដុះបណ្ដាលគុណវុឌ្ឍិគ្រូបង្រៀន។
“គុណភាពអប់រំដែលសំខាន់ គឺពាក់ព័ន្ធជាមួយគ្រូ យើងមានឧបករណ៍ យើងចង់បានកុំព្យូទ័រ មានសម្ភារៈឧបទេសគ្រប់គ្រាន់នៅក្នុងសាលារៀនក៏ដោយ ប៉ុន្តែបើខ្វះគ្រូដែលមានគុណភាពគឺពិបាក ព្រោះសិស្សមិនចេះទេ សិស្សរៀនជាមួយគ្រូ គឺពឹងលើគ្រូ”
នាយករដ្ឋមន្ត្រីកម្ពុជា បញ្ជាក់បន្ថែមថា គុណភាពរបស់គ្រូ គុណវុឌ្ឍិរបស់គ្រូ សមត្ថភាពរបស់គ្រូ និងភាពច្បាស់លាស់របស់គ្រូ គឺជាការចាំបាច់ក្នុងការពង្រឹងគុណភាពធនធានមនុស្ស។ ទន្ទឹមគ្នានេះ រាជរដ្ឋាភិបាល បានយកចិត្តទុកដាក់លើការពង្រឹងគុណវុឌ្ឍិគ្រូបង្រៀន ដោយបង្កើតបរិមាណ និងគុណភាពគ្រូ ដែលធានាបានគ្រូមានគុណវុឌ្ឍិក្នុងការបង្រៀន។
សម្តេចធិបតី ហ៊ុន ម៉ាណែត លើកឡើងទៀតថា ឪពុកម្ដាយ បញ្ជូនកូនទៅរៀន ចេះឬមិនចេះ គឺពឹងលើគ្រូបង្រៀន។ ដូច្នេះ រាជរដ្ឋាភិបាល និងក្រសួងអប់រំ នៅតែបន្តធ្វើការកសាងគ្រូបង្រៀនមានគុណវុឌ្ឍិថ្នាក់អនុវិទ្យាល័យ វិទ្យាល័យ ១២+៤ និងការបណ្ដុះបណ្ដាលគរុកោសល្យ ដើម្បីឱ្យគុណភាពគ្រូកាន់តែរឹងមាំ៕
