ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានស្នើទៅដល់នាយកទីភ្នាក់ងារអភិវឌ្ឍន៍បារាំង សូមបន្តជួយដល់កម្ពុជាលើចំណុចវិស័យអាទិភាពដែលបារាំងកំពុងតែជួយស្រាប់ ដូចជាការអភិវឌ្ឍលើវិស័យទឹកស្អាត, ហេដ្ឋារចនាសម្ព័ន្ធ និងពិសេសគឺការអភិវឌ្ឍធនធានមនុស្ស។
ការស្នើនេះ បានធ្វើឡើងក្នុងជំនួបរវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាមួយ ឯកឧត្តម រ៉េមី រីយូ អគ្គនាយកទីភ្នាក់ងារអភិវឌ្ឍន៍បារាំង នៅវិមានសន្តិភាពកាលពីថ្ងៃទី២១ ខែកុម្ភៈ ថ្មីៗនេះ ក្នុងដំណើរទស្សនកិច្ចរបស់ឯកឧត្តមនៅកម្ពុជា។
គួរបញ្ជាក់ថា ទីភ្នាក់ងារអភិវឌ្ឍន៍បារាំង មានវត្តមាននៅក្នុងព្រះរាជាណាចក្រកម្ពុជាអស់រយៈពេលប្រមាណ៣០ឆ្នាំមកហើយ ។ ក្នុងរយៈពេល ៣០ឆ្នាំមកនេះ ទីភ្នាក់ងារអភិវឌ្ឍន៍បារាំង បានផ្តល់ហិរញ្ញប្បទានប្រមាណ៩០០លានអឺរ៉ូសម្រាប់វិស័យអភិវឌ្ឍន៍ជនបទ ការការពារបរិស្ថាន និងជីវៈចម្រុះ ថាមពល ទឹក និងអនាម័យ ហេដ្ឋារចនាសម្ព័ន្ធ អប់រំ និងការបណ្តុះបណ្តាលវិជ្ជាជីវៈ។ ការគាំទ្ររយៈពេលវែងនេះបានជួយកែលម្អលទ្ធភាពទទួលបានទឹកស្អាតប្រើប្រាស់ដោយបច្ចុប្បន្នមានប្រជាពលរដ្ឋមួយលាននាក់នៅរាជធានីភ្នំពេញបានតភ្ជាប់បណ្តាញទឹកស្អាត ក៏ដូចជាលទ្ធភាពទទួលបានអគ្គិសនីនៅតាមបណ្តាខេត្តដាច់ស្រយាលនានា ដោយមានលំនៅដ្ឋានចំនួន១៦៥ ០០០ បានតភ្ជាប់បណ្តាញអគ្គិសនី។
ក្នុងជំនួបជាមួយសម្តេចតេជោនាយករដ្ឋមន្រ្តី ឯកឧត្តម រ៉េមី រីយូ បានបញ្ជាក់ថា ទីភ្នាក់ងារអភិវឌ្ឍន៍បារាំងគ្រោងនឹងបើកសាខាបច្ចេកទេសនៅកម្ពុជា ដោយនឹងបង្កើនជំនួយដល់កម្ពុជាថែមទៀត ជាមួយនឹងការជួយលើបណ្តាញអគ្គិសនី សម្រាប់អគ្គិសនី កកើតឡើងវិញផងដែរ៕
