ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្របខណ្ឌសិក្សានៅសកលលោកនាពេលបច្ចុប្បន្ននេះ កំពុងតែឈានកាន់តែលឿនទៅរកការចាប់យកបច្ចេកវិទ្យាឌីជីថលដើម្បីរៀន និងបង្រៀន ដូច្នេះការធ្វើទំនើបកម្មបច្ចេកវិទ្យានៅក្នុងថ្នាក់រៀន គឺជារឿងចាំបាច់បំផុត ។ នេះជាការលើកឡើងរបស់លោកសាស្រ្តាចារ្យ Alamgir Hossain សាកលវិទ្យាធិការង នៃកសាលវិទ្យាល័យខេមតិច នៅក្នុងពិធីចុះអនុស្សរណៈរវាងសាកលវិទ្យាល័យ និងសាលារៀនសុវណ្ណភូមិ កាលពីពេលថ្មីៗនេះ។
លោកសាស្រ្តាចារ្យ Alamgir Hossain បន្ថែមថា សាលាចំណេះដឹងទូទៅ គួរធ្វើការជាមួយសាកលវិទ្យាល័យ និងដៃគូរផ្សេងទៀតក្នុងគោលបំណងអភិវឌ្ឍជំនាញច្បាស់លាស់ដល់យុវជនតាមរយៈការហាត់ការអំឡុងពេលសិក្សា ។ ហើយថា ការចុះអនុស្សរណៈរវាងសាកលវិទ្យាល័យខេមតិច និងសាលារៀនសុវណ្ណភូមិ គឺជាកិច្ចសហប្រតិបត្តិការលើកកម្ពស់វិស័យវិទ្យាសាស្ត្រនិងបច្ចេកវិទ្យា ការពង្រឹងសមត្ថភាព ស្រាវជ្រាវអនុវត្ត នវានុវត្តន៍ កម្មសិក្សា និងការសិក្សា ការផ្តល់អាហារូបករណ៍ស្ទែមដល់សិស្សដែលមានសក្តានុពល និងការរៀបចំកម្មវិធីកសាងសមត្ថភាពសម្រាប់គ្រូបង្រៀន ជាពិសេសទាក់ទងនឹងបច្ចេកវិទ្យា អក្ខរកម្មឌីជីថល និងគរុកោសល្យ ដើម្បីបង្កើនគុណភាពបង្រៀន និងរៀន។
លោក ជា ធីឡាយ នាយកគ្រប់គ្រង NTC Group បានមានប្រសាសន៍ថា ដោយហេតុបច្ចេកវិទ្យានៅសាលាសុវណ្ណភូមិ ហាក់មិនទាន់មានភាពសំបូបែបនៅឡើយ និងត្រូវការ ការគាំទ្របន្ថែមផង ដូច្នេះ លោកយល់ថា សាកលវិទ្យាល័យខេមតិច គឺជាដៃគូមួយដ៏សំខាន់ ព្រោះបើមានសិស្ស ឬនិស្សិតមករៀននៅទីនេះ វានឹងមានការពង្រឹងបន្ថែម ។
លោក ធីឡាយ បញ្ជាក់ថា ស្ថាប័នសិក្សាទោះបីជាធំប៉ុនណា ក៏មិនអាចឈរតែម្នាក់ឯងបានទេ គឺតម្រូវឱ្យមានកិច្ចសហប្រតិបត្តិការជាមួយស្ថាប័នផ្សេងទៀត ព្រោះកិច្ចសហប្រតិបត្តិការ និងការផ្សារភ្ជាប់ទំនាក់ទំនងគ្នាទៅវិញទៅមកមានសារៈសំខាន់ណាស់ នៅក្នុងយុគសម័យនៃសាកលភាវូបនីយកម្ម៕
