ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ — ក្នុងស្មារតីស្នេហាជាតិ និងសាមគ្គីភាពខ្ពស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា បានប្រកាសដាក់ចេញនូវគំនិតផ្ដួចផ្ដើម ក្រោមចលនា «យើងរួមគ្នាដើម្បីជាតិ!» ដោយអំពាវនាវដល់សមាជិកកាយឫទ្ធិនារី រួមទាំងបងប្អូនប្រជាពលរដ្ឋខ្មែរគ្រប់រូប រួមគ្នាដាំបន្លែបង្ការ ដើម្បីប្រមូលផលទុកជូនដល់វីរកងទ័ព និងប្រជាពលរដ្ឋដែលកំពុងភៀសសឹក ដោយសារសង្គ្រាមឈ្លានពានបូរណភាពទឹកដីកម្ពុជា ពីសំណាក់កងទ័ពថៃ។
ក្នុងឱកាសអញ្ជើញចូលរួមដាំបន្លែ ចលនា «យើងរួមគ្នាដើម្បីជាតិ» នាសាលាបឋមសិក្សាភ្នំពេញថ្មី នាព្រឹកថ្ងៃទី១៧ ខែធ្នូ ឆ្នាំ២០២៥ លោកជំទាវបណ្ឌិត បានមានប្រសាសន៍សង្កត់ធ្ងន់ថា ក្នុងកាលៈទេសៈដែលវីរកងទ័ពកម្ពុជាកំពុងឈរជើងការពារបូរណភាពទឹកដីយ៉ាងអង់អាចក្លាហាន ការចូលរួមពីកម្លាំងមហាជនជួរក្រោយគឺជាកម្លាំងចិត្តមិនអាចខ្វះបាន។ ក្នុងន័យនេះ លោកជំទាវបានរៀបចំឱ្យសាខាសមាគមកាយឫទ្ធិនារីកម្ពុជាទាំងអស់ បំផុសសមាជិកាឱ្យចាប់ផ្ដើមសកម្មភាពដាំបន្លែនៅតាមសាលារៀន និងដីរបស់សហគមន៍ ដើម្បីបង្កើនទឹកចិត្ត និងកម្លាំងខ្មែរជួយខ្មែរ ទុកសម្រាប់ផ្គត់ផ្គង់ និងជួយគាំទ្រដល់ជនភៀសសឹកដែលកំពុងរងគ្រោះដោយសារសង្គ្រាមឈ្លានពាន។
ជាមួយគ្នានេះដែរ លោកជំទាវបណ្ឌិតក៏បានណែនាំឱ្យជ្រើសរើសប្រភេទបន្លែណាដែលងាយស្រួលដាំ និងឆាប់ផ្ដល់ទិន្នផល ដើម្បីឆ្លើយតបឱ្យទាន់ពេលវេលាទៅនឹងតម្រូវការជាក់ស្ដែង។ អ្វីដែលសំខាន់ជាងផលដាំដុះ គឺលោកជំទាវចង់ឃើញសិស្សានុសិស្ស និងយុវជនមានការចូលរួមចំណែកក្នុងគ្រាដ៏លំបាកជាមួយបងប្អូនវីរកងទ័ពជួរមុខ។
លោកជំទាវបានបញ្ជាក់ថា យើងទាំងអស់គ្នាដែលជាកងទ័ពជួរក្រោយ ត្រូវរួមគ្នាដាំបន្លែ ដំណាំហូបផ្លែនានាតាមគេហដ្ឋាន សាលារៀន វត្តអារាម សហគមន៍ រួចប្រមូលផលរួមគ្នាឱ្យបានច្រើនអនេក ដើម្បីបន្តរំលែកជូនសមរភូមិជួរមុខ។
យោងតាមរបាយការណ៍របស់ក្រសួងមហាផ្ទៃកម្ពុជា គិតមកត្រឹមព្រឹកថ្ងៃទី១៧ ខែធ្នូ ឆ្នាំ២០២៥ ជនភៀសសឹកកម្ពុជាបានកើនដល់ ១៣០ ០៧៩គ្រួសារ ដែលស្មើនឹង ៤៣២ ៦៨៦នាក់ ក្នុងនោះស្រ្តីមានប្រមាណ ២២ម៉ឺន២ពាន់នាក់ និងកុមារមាន ១៣ម៉ឺន៤ពាន់នាក់។ ជនភៀសសឹកទាំងអស់នោះ មកពីខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កោះកុង និងខេត្តសៀមរាប៕
