ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទីភ្នាក់ងារជាតិមុខរបរ និងការងារ (NEA) បានឱ្យដឹងថា នៅក្នុងខែសីហានេះ មានឱកាសការងារសរុបចំនួន ២៥០ ៥៨២កន្លែង ត្រៀមស្វាគមន៍សម្រាប់បងប្អូនប្រជាពលរដ្ឋដែលត្រឡប់មកពីប្រទេសថៃ។
បើតាមតួលេខដែលបង្ហាញដោយ NEA ខេត្តកំពង់ស្ពឺ មានតម្រូវការកម្លាំងពលកម្មក្នុងផ្នែកឧស្សាហកម្មសរុបចំនួន ៦៤៦២៨កន្លែង, ខេត្តស្វាយរៀង ត្រូវការកម្លាំងពលកម្ម ៥២ ៩៨៩កន្លែង, ភ្នំពេញត្រូវការកម្លាំងពលកម្មក្នុងវិស័យឧស្សាហកម្ម ៣៧ ២៣៨កន្លែង និងសេវាកម្ម ២៤៨៥កន្លែង, ខេត្តកំពង់ឆ្នាំង ១៨ ៣៧៦កន្លែង, ខេត្តកណ្តាល ១៥ ៦៤៣កន្លែង, ខេត្តតាកែវ ១៣ ៥៨៩កន្លែង, ខេត្តកោះកុង ៩ ៧២០កន្លែង, ខេត្តកំពង់ចាម ៦៦៣០កន្លែង, ខេត្តព្រះសីហនុ ៤៥៧៩កន្លែង, ខេត្តរតនគិរី ត្រូវការកម្លាំងពលកម្មក្នុងវិស័យកសិកម្ម ចំនួន ៩ ៦៩០កន្លែង, ខេត្តក្រចេះ ៦៤៣០កន្លែង និងខេត្តស្ទឹងត្រែង ៣៤៤៣កន្លែង។
លោក ថុន ដាណេ រដ្ឋបាល និងជាមន្រ្តីធនធានមនុស្សនៅក្រុមហ៊ុន ស៊ុមី (ខាមបូឌា) វ៉ាយរីង ស៊ីស្ទឹម ដែលជាក្រុមហ៊ុន ផ្នែកបង្គុំខ្សែភ្លើងក្នុងរថយន្ត មានទីតាំងស្ថិតនៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ មានប្រសាសន៍ថា បច្ចុប្បន្នក្រុមហ៊ុនរបស់លោកកំពុងតែត្រូវការកម្មករ កម្មការិនីប្រមាណ៣០០នាក់បន្ថែមទៀត ដូច្នេះក្រុមហ៊ុនលោកស្វាគមន៍ចំពោះបងប្អូនពលករដែលត្រឡប់មកពីប្រទេសថៃវិញ ហើយមានបំណងចង់ស្វែងរកការងារធ្វើ។
បើតាមលោក ដាណេ លក្ខខណ្ឌការងារនៅក្រុមហ៊ុន ស៊ុមី (ខាមបូឌា) គឺមិនរើសអើងនរណាម្នាក់ឡើយ ទោះជាមានជំនាញ ឬមិនមានជំនាញ, ហើយក្រុមហ៊ុននឹងផ្តល់អត្ថប្រយោជន៍ស្របតាមក្រសួងការងារ ដូចជាប្រាក់ខែគោល ប្រាក់ថែមម៉ោង ប្រាក់អតីតភាពការងារផ្សេងៗ ដែលវិស័យការងារបានកំណត់។ លើសពីនេះទៀត ក្រុមហ៊ុនក៏មានអគារសម្រាប់កម្មករចង់ស្នាក់នៅ មានអាហារពីរពេល (អាហារថ្ងៃត្រង់ និងល្ងាច) អាហារសម្រន់ មធ្យោបាយធ្វើដំណើរដឹកជញ្ជូនទៅមក ហើយថែមទាំងមានការបណ្តុះបណ្តាល ព្រមជាមួយប្រាក់ឧបត្ថម្ភផ្សេងៗ។
កញ្ញា ឡៃ ស្រីម៉ៅ ជារដ្ឋបាលរោងចក្រ ស៊ីជាប់បែលយូខេអេជ ហ្កាមែន (ខេមបូឌា) ដែលមានទីតាំងស្ថិតនៅសង្កាត់ចោមចៅ៣ ខណ្ឌពោធិ៍សែនជ័យ បានឱ្យដឹងថា រោងចក្ររបស់នាងក៏កំពុងជ្រើសរើសកម្មករក្នុងវិស័យកាត់ដេរប្រមាណជាង១រយនាក់ដែរ ដូច្នេះសម្រាប់បងប្អូនពលករដែលកំពុងស្វែងរកការងារធ្វើ អាចទំនាក់ទំនងទៅកាន់រោចក្រ ឬក៏ទៅកាន់ទីភ្នាក់ងារជាតិមុខរបរ និងការងារ។
យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ ក្រោយពីមានទំនាស់ព្រំដែនរវាងប្រទេសកម្ពុជា និងថៃ រយៈពេល២ខែមកនេះ បានបង្ខំឱ្យពលករខ្មែរចំនួន ៧៥ម៉ឺននាក់ហើយ បានចាកចេញពីប្រទេសថៃ និងវិលត្រឡប់មកប្រទេសកម្ពុជាវិញ។
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លើកទឹកចិត្តដល់បងប្អូនពលករខ្មែរដែលត្រឡប់មកពីប្រទេសថៃ សូមចុះឈ្មោះធ្វើការងារនៅក្នុងស្រុក ដោយថា វាមិនត្រឹមតែជួយដល់បងប្អូនពលករខ្លួនឯងប៉ុណ្ណោះទេ តែក៏ជួយដល់ប្រទេសជាតិ មានលទ្ធភាពទាញរោងចក្រថ្មីៗឱ្យមកច្រើនថែមទៀត ហើយរោងចក្រមកកាន់តែច្រើន ដែលក៏បង្កើនឱកាសការងារក្នុងស្រុកកាន់តែច្រើន៕
