ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមរយៈលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំ២០២៥នេះបានបង្ហាញថា សិស្សដែលមកពីសាលារៀនជំនាន់ថ្មី មានអត្រាប្រឡងជាប់រហូតដល់ ៩១ភាគរយ ខណៈសិស្សពីសាលារៀនមួយនេះ ទទួលបានចំណាត់ថ្នាក់ពី A ដល់C មានចំនួនជាង ៥១ភាគរយ។ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា លើកឡើងថា លទ្ធផលប្រឡងសញ្ញាបត្រមធ្យមសិក្សាទុតិយភូមិរបស់សិស្សក្នុងកម្មវិធីសាលារៀនជំនាន់ថ្មីនេះ បានបង្ហាញថា ការធ្វើកំណែទម្រង់អប់រំ អាចនាំឱ្យសិស្សកម្ពុជាសម្រេចបានលទ្ធផលល្អប្រសើរ។
ឯកឧត្តមបណ្ឌិតសភាចារ្យ មានប្រសាសន៍ដោយបញ្ជាក់ថា សាលារៀនជំនាន់ថ្មី (NGS) មិនត្រឹមតែជួយសិស្សប្រឡងជាប់នោះទេ ប៉ុន្តែជួយរៀបចំយុវជនជំនាន់ថ្មីឱ្យក្លាយជាអ្នកមានគំនិតច្នៃប្រឌិត នវានុវត្តន៍ អ្នកដឹកនាំ និងជាអ្នកកសាងអនាគតជាតិ។
កម្មវិធីសាលារៀនជំនាន់ថ្មីគឺជាកម្មវិធីមួយដែលបង្កើតគំរូអភិវឌ្ឍន៍ថ្មីនៅក្នុងប្រព័ន្ធអប់រំសាធារណៈ ដែលនឹងនាំទៅដល់ការបង្កើតសាលារៀនសាធារណៈស្វយ័ត ដែលទទួលបានការវិនិយោគខ្ពស់ផ្សារភ្ជាប់នឹងស្តង់ដាថ្មីមានគណនេយ្យភាព និងអភិបាលកិច្ចល្អ ព្រមទាំងស្តង់ដាវិជ្ជាជីវៈសម្រាប់ការសិក្សានៅក្នុងសតវត្សរ៍ទី២១។ បច្ចុប្បន្នក្រសួងអប់រំ កំពុងដំណើរការកម្មវិធីសាលារៀនជំនាន់ថ្មីចំនួន១៤សាលា ហើយគ្រោងពង្រីកបន្ថែមចំនួន ៨ទៀតនៅរាជធានីភ្នំពេញ និងតាមបណ្តាខេត្តមួយចំនួនសម្រាប់ឆ្នាំសិក្សាថ្មីនេះ។
លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កម្មវិធីសាលារៀនជំនាន់ថ្មី គឺអនុវត្តគោលវិធីបង្រៀនបែបស្ថាបនានិយម មានន័យថា ធ្វើឱ្យសិស្សអាចទទួលបាននូវកម្រិតនៃការសិក្សាខ្ពស់បំផុតតាមរយៈការស្រាវជ្រាវ និងវិធីសាស្រ្តបង្រៀននានា ដែលនាំឱ្យសិស្សទៅធ្វើការស្រាវជ្រាវ។ លោកជំទាវបណ្ឌិត បន្តថា ការរៀនបែបនេះ នាំឱ្យសិស្សចេះស្រាវជ្រាវដោយខ្លួនឯង ចេះឆ្ងល់ ចេះសួរសំណួរល្អៗ ស្វែងរកចម្លើយ ហើយក៏មានក្លិបសិក្សាដែលអាចជួយគ្នាទៅវិញទៅមក។
តាមរយៈបទពិសោធន៍ល្អនៅក្នុងការអនុវត្តនៅសាលារៀនជំនាន់ថ្មីនេះ បើតាមអ្នកនាំពាក្យ ក្រសួងអប់រំកំពុងជំរុញឱ្យសាលារៀនទូទាំងប្រទេសអនុវត្តក្របខណ្ឌ ហៅថា ស្តង់ដាសាលារៀនគំរូ។ លោកជំទាវបន្តថា បច្ចុប្បន្ននេះនៅគ្រប់សាលារៀនទាំងអស់ទូទាំងប្រទេស កំពុងខិតខំប្រឹងប្រែងក្នុងការសម្រេចឱ្យបាននូវស្តង់ដាដែលបានដាក់ចេញ ធ្វើយ៉ាងណាសំដៅឱ្យគុណភាពនៃការសិក្សាមានការកើនឡើង មានភាពល្អប្រសើរ ហើយធ្វើការជាមួយសហគមន៍ មាតាបិតាសិស្ស ដើម្បីឱ្យទទួលបានការគាំទ្រ ជំរុញនូវការចុះឈ្មោះចូលរៀន និងកាត់បន្ថយអត្រាបោះបង់ចោលការសិក្សាផងដែរ។
យោងតាមរបាយការណ៍របស់ក្រសួងអប់រំ ក្នុងការប្រឡងសញ្ញាបត្រមធ្យសិក្សាទុតិយភូមិ ឆ្នាំ២០២៥ សិស្សដែលសិក្សានៅ ក្នុងកម្មវិធីសាលារៀនជំនាន់ថ្មី មានអត្រាប្រឡងជាប់ ៩១.១៤% (ប្រៀបធៀបនឹងថ្នាក់ជាតិ ៨៤.៥៦%), ក្នុងនោះ ៥១.៥៧% សិស្សបានចំណាត់ថ្នាក់ A–C (ប្រៀបធៀបនឹងថ្នាក់ជាតិ ២៨.៨%), ១១.១% សិស្សបាននិទ្ទេស A (ប្រៀបធៀបនឹងថ្នាក់ជាតិ ២.១% ប៉ុណ្ណោះ) ខណៈអត្រាប្រឡងធ្លាក់បានកាត់បន្ថយជាងពាក់កណ្តាល ពោលគឺមានត្រឹម ៨.៨៦% ប្រៀបធៀបនឹងថ្នាក់ជាតិ ១៥.៤៤%៕
