ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងពិធីប្រគល់មេដាយរង្វាន់ និងប្រកាសនីយបត្រជូនដល់ជ័យលាភីដែលចូលរួមការប្រកួតប្រជែងគណិតវិទ្យាអន្តរជាតិតាមប្រព័ន្ធអនឡាញ CARIBOU TEST 2024 និងគណិតវិទ្យាថ្នាក់ជាតិដោយប្រើម៉ាស៊ីនគិតលេខវិទ្យាសាស្ត្រ កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា គណិតវិទ្យា គឺជាបំណិនមូលដ្ឋានគ្រឹះមួយដ៏សំខាន់មិនអាចខ្វះបាននៅក្នុងជីវភាពរស់នៅប្រចាំថ្ងៃ ក៏ដូចជាការឈានទៅចាប់យកជំនាញកម្រិតខ្ពស់នាពេលអនាគត។
ឧបនាយករដ្ឋមន្ត្រី រដ្ឋមន្រ្តីក្រសួងអប់រំ បញ្ជាក់បន្ថែមថា គណិតវិទ្យា មិនត្រឹមតែជួយក្នុងការគិតលេខប៉ុណ្ណោះទេ តែមុខវិជ្ជាផ្សេងទៀតដែលផ្សារភ្ជាប់នឹងគណិតវិទ្យាក៏ជួយពង្រឹងសមត្ថភាពក្នុងការត្រិះរិះពិចារណា ការដោះស្រាយបញ្ហា បណ្តុះគំនិតច្នៃប្រឌិត ការវិភាគប្រកបដោយតក្កវិទ្យា ដែលនាំមកនូវភាពចម្រើនរុងរឿងក្នុងការសិក្សារៀនសូត្រ និងជំរុញដល់ការអភិវឌ្ឍសេដ្ឋកិច្ចសង្គមជាតិទាំងមូល។
សូមបញ្ជាក់ថា សហគមន៍អ្នកគណិតវិទ្យាកម្ពុជា បានសហការជាមួយវិទ្យាស្ថានស្រាវជ្រាវ នៃសាកលវិទ្យាល័យ BROCK នៃប្រទេសកាណាដា CARIBOU (Canada Research Institute of BROCK University) បានរៀបចំការប្រកួតប្រជែងគណិតវិទ្យាអន្តរជាតិតាមប្រព័ន្ធអនឡាញសម្រាប់ឆ្នាំសិក្សា ២០២៣-២០២៤កាលពីពេលថ្មីៗនេះ។ សម្រាប់លទ្ធផលនៃការប្រកួតប្រជែងគណិតវិទ្យាអន្តរជាតិតាមប្រព័ន្ធអនឡាញ CARIBOU TEST 2024 មានសិស្សចំនួន៦៦នាក់ ទទួលចំណាត់ថ្នាក់លេខ១ មេដាយមាសលំដាប់ពិភពលោក(អន្តរជាតិ) ដែលមានសិស្សមកពី៤១ប្រទេសចូលរួមប្រកួត ហើយសិស្សចំនួន៥នាក់ ទទួលចំណាត់ថ្នាក់លេខ២ មេដាយប្រាក់ និងសិស្សចំនួន៥៣នាក់ ទទួលចំណាត់ថ្នាក់លេខ៣ មេដាយសំរឹទ្ធ។
ដោយឡែកសម្រាប់ ការប្រកួតប្រជែងគណិតវិទ្យាថ្នាក់ជាតិដោយប្រើម៉ាស៊ីនគិតលេខវិទ្យាសាស្ត្រ រៀបចំដោយសហគមន៍អ្នកគណិតវិទ្យាកម្ពុជា សហការជាមួយក្រុមហ៊ុនកាស្យូ បានជ្រើសរើសសិស្សឆ្នើម ១០នាក់ក្នុងកម្រិតពីថ្នាក់ទី៧ ដល់ថ្នាក់ទី១២។ ក្នុងនោះ សិស្សជ័យលាភីចំណាត់ថ្នាក់លេខ១ ទទួលបានមេដាយមាស ប្រកាសនីយបត្រជ័យលាភី និងកំព្យូទ័រយួរដៃម្នាក់១គ្រឿង។ ទន្ទឹមនេះ លោកគ្រូ អ្នកគ្រូដែលមានសិស្សជាប់ជ័យលាភី ទទួលបានលិខិតសរសើរពីសហគមន៍អ្នកគណិតវិទ្យាកម្ពុជា ចំណែកឯគ្រឹះស្ថានសិក្សាមានសិស្សទទួលបានជ័យលាភី ទទួលបានលិខិតសរសើរពីក្រសួងអប់រំ យុវជន និងកីឡាផងដែរ។
គួរបញ្ជាក់ថា ដើម្បីឆ្លើយតបនឹងយុគសម័យឌីជីថល និងនវានុវត្តន៍ ក្រសួងអប់រំ យុវជន និងកីឡាបាន និងកំពុងលើកកម្ពស់ការបង្រៀនគណិតវិទ្យាថ្នាក់ដំបូង ក៏ដូចជាការសិក្សាផ្នែកវិទ្យាសាស្ត្រ និងបច្ចេកវិទ្យាឌីជីថល ដែលជាមុំទី៥ នៃយុទ្ធសាស្ត្របញ្ចកោណ ដំណាក់កាលទី១ ដើម្បីជំរុញគោលដៅអភិវឌ្ឍធនធានមនុស្សប្រកបដោយសក្ដានុពល ឆ្ពោះទៅសម្រេចចក្ខុវិស័យកម្ពុជា ២០៥០ តបតាមអនុសាសន៍របស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕
