អង្គការបណ្តុះបណ្តាលវិជ្ជាជីវៈ និងអភិវឌ្ឍន៍អាជីព (MACA) សហការជាមួយសហភាពសហព័ន្ធយុវជនកម្ពុជា ខេត្តកំពង់ចាម កាលពីថ្ងៃទី១១ ខែកក្កដា បានរៀបចំ​កម្មវិធីតម្រង់ទិស​ពីជំនាញសិក្សា និង​អាជីព ឬ “Major and Career Roadshow” ដល់សិស្សានុសិស្ស​វិទ្យាល័យ​ហ៊ុនសែន​ជើងឆ្នុក ក្នុងស្រុកបាធាយ ខេត្តកំពង់ចាម ប្រមាណ៣៥០នាក់។

លោក អ៊ុម គន្ធែល ប្រធានអង្គការ MACA មានប្រសាសន៍ថា គោលបំណងនៃការ​រៀបចំកម្មវិធី​តម្រង់ទិស​ជំនាញសិក្សា និង​អាជីព​ ដល់សិស្សានុសិស្ស នៃវិទ្យាល័យ​ហ៊ុនសែនជើងឆ្នុកនេះ គឺដើម្បីផ្តល់លទ្ធភាព​ឱ្យ​សិស្ស​ស្វែង​យល់ពីខ្លួនឯង​ឱ្យបានច្បាស់លាស់ ហើយ​បង្កើន​ទំនុកចិត្ត​ខ្លួនឯង​ក្នុងការ​ជ្រើសរើសជំនាញសិក្សា និ​ងអាជីពនាពេលអនាគត​របស់ពួកគេ។

បើតាមលោក គន្ធែល ក្នុងកម្មវិធីតម្រង់ទិស​ដែលធ្វើឡើង​កាលពីថ្ងៃទី១១ កក្កដា គឺមានប្រធានបទចំនួន៣ ត្រូវ​បានលើកយកមកបង្ហាញ និង​ពន្យល់ដល់ប្អូនៗ​សិស្សានុសិស្ស ក្នុងនោះ ប្រធានបទទី១ គឺជាការពន្យល់ពីវដ្ត នៃជីវិតរបស់យុវជន ប្រជាជនទូទៅ ដើម្បី​ឱ្យ​សិស្សានុសិស្ស​បានយល់ថា បច្ចុប្បន្ន​គាត់ជាយុវជន គឺជា​ចំណុច​ចាប់ផ្តើម នៃ​ចំណុច​កំពូល នៃវដ្តជីវិត ដែលត្រូវ​ធ្វើការ​សម្រេចចិត្ត​ឱ្យបានច្បាស់លាស់អំពីអនាគតរបស់ខ្លួន​ក្នុង​ក្របខណ្ឌជំនាញសិក្សា និ​ងអាជីព ក៏​ដូចជា​បង្ហាញនូវ​ភាពជាអ្នក​ដឹកនាំ​យុវជន​ក្នុងសម័យ​ឌីជីថល​ជាដើម។

ប្រធានបទទី២ គឺបង្ហាញពីរបៀប​ក្នុងការ​ស្វែង​យល់ខ្លួនឯង តាមរយៈកម្មវិធីទូរស័ព្ទរបស់ MACA ដែល​កម្មវិធីនេះអាចឆ្លើយតបនឹងសំណួរ៣របស់សិស្សានុសិស្សដើម្បីស្គាល់ខ្លួនឯង នោះ​គឺ ទី១ តើគាត់ជាមនុស្សបែបណា? ដោយ​កម្មវិធីជួយ​សិស្សឱ្យស្គាល់ខ្លួនឯងតាមរយៈទ្រឹស្តីដែលគេប្រើប្រាស់ជាលក្ខណៈពិភពលោក, ទី២ គឺជំនាញសិក្សា ដោយ​កម្មវិធីនឹងបង្ហាញពីជំនាញ និងអាជីពជាច្រើន ព្រមជាមួយការបង្ហាញក្នុងការសិក្សា​ជំនាញទាំងនោះថែមទៀត ហើយទី៣ គឺអាជីព ដោយកម្មវិធីមានអាជីពរាប់ម៉ឺនសម្រាប់សិស្សានុសិស្សស្វែងយល់​ ជាមូលដ្ឋានគ្រឹះក្នុងការសម្រេចចិត្តបានត្រឹមត្រូវសម្រាប់អនាគតរបស់ពួកគេ។

សម្រាប់ប្រធានបទទី៣ គឺការ​ចែករំលែក​បទពិសោធន៍​ពីយុវជន​ជំនាន់មុន ក្នុងការ​ជ្រើសរើសអាជីព និង​ជំនាញរបស់ពួកគាត់ដែលទទួលបានជោគជ័យ ជួយ​ឱ្យសិស្សានុសិស្សមានជាគំរូ និង​ងាយក្នុងការសម្រេចចិត្ត។

តាមប្រសាសន៍របស់លោក អ៊ុម គន្ធែល កម្មវិធីតម្រង់ទិស​ពីជំនាញសិក្សា និង​អាជីព ឬ “Major and Career Roadshow” នៅវិទ្យាល័យ​ហ៊ុនសែន​ជើងឆ្នុក គឺជាកម្មវិធីដំបូង ហើយជាគោលដៅរបស់អង្គការ MACA គ្រោងនឹងពង្រីកកម្មវិធីមួយនេះទៅ​តាមសាលារៀននៅទូទាំង​ប្រទេស ក្នុងពេលបន្តបន្ទាប់ទៀត។

សូមបញ្ជាក់ផងដែរថា អង្គការ MACA ត្រូវបានបង្កើតឡើងក្នុងឆ្នាំ២០១៥ ដោយក្រុមយុវជនកម្ពុជាវ័យក្មេង ដែលមានចក្ខុវិស័យ ជួយសិស្ស-និស្សិត និងយុវជនឱ្យមានភាពច្បាស់លាស់អំពីជម្រើសជំនាញសិក្សា និងអាជីព ដើម្បីត្រៀមខ្លួនសម្រាប់អាជីពសមរម្យនាពេលអនាគតរបស់ពួកគេ។ MACA បានធ្វើសកម្មភាពសង្គមជាច្រើន និងបានផ្តួចផ្តើមនូវយុទ្ធនាការតាមប្រព័ន្ធឌីជីថលដែលមានឈ្មោះថា “ជជែកអំពីអាជីព” និងកម្មវិធីសិក្ខាសាលាតម្រង់ទិសតាមរាជធានី-ខេត្ត ក្នុងគោលបំណងបង្កើនការយល់ដឹងជាសាធារណៈអំពីសារៈសំខាន់នៃការកំណត់គោលដៅ ជំនាញ និងអាជីពច្បាស់លាស់៕