ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការជួបជុំនូវបណ្ដានិស្សិតខ្មែរនៅពេលមានបុណ្យទាន ឬកម្មវិធីប្រពៃណីជាតិខ្មែររៀងរាល់ឆ្នាំ ជាសកម្មភាពដែលនិស្សិតខ្មែរកំពុងសិក្សា និងរស់នៅសហរដ្ឋអាមេរិកតែងតែធ្វើឡើងមិនភ្លេចព្រោះអាចជួយសម្រួលអារម្មណ៍ពីការនឹកផ្ទះរបស់ពួកគេ និងអាចជួបជុំបងប្អូនខ្មែរដែលកំពុងរស់នៅសហរដ្ឋអាមេរិក។
កញ្ញា អ៉ីម លីដា ជានិស្សិតខ្មែរកំពុងសិក្សាថ្នាក់បរិញ្ញាបត្រ ផ្នែកគណនេយ្យ និងព័ត៌មានវិទ្យា នៅសហរដ្ឋអាមេរិកយល់ឃើញថា ការទៅវត្តជុំគ្នានាឱកាសបុណ្យភ្ជុំបិណ្ឌនេះពិតជាមានសារប្រយោជន៍សម្រាប់ប្រជាជនខ្មែរដែលរស់នៅសហរដ្ឋអាមេរិកនេះ ជាពិសេសសម្រាប់និស្សិតដែលកំពុងសិក្សាផ្ទាល់ ព្រោះអាចមានឱកាសជួបជុំគ្នា និងមិនភ្លេចនូវទំនៀមទម្លាប់ប្រពៃណីជាតិរបស់កម្ពុជាបើទោះបីជាកំពុងស្នាក់នៅ និងសិក្សានៅឆ្ងាយប្រទេសកំណើតក្ដី។
ជាមួយគ្នានេះ កញ្ញា លីដា និងមិត្តភក្តិមួយចំនួនក៏បានរៀបចំ និងត្រៀមខ្លួនទៅកាន់វត្តពោធិមោនារាម នៅទីក្រុង Pomona នាថ្ងៃបុណ្យភ្ជុំបិណ្ឌខាងមុខនេះដែរ។ កញ្ញាបន្ថែមថា ការទៅវត្តនេះកញ្ញានឹងបានជួបជុំនិស្សិតខ្មែរដែលសិក្សានៅសាកលវិទ្យាល័យផ្សេងៗ ជាពិសេសបានជួបជុំអ៊ុំពូមីង និងប្រជាពលរដ្ឋខ្មែរដែលរស់នៅសហរដ្ឋអាមេរិកក្នុងឱកាសនេះផងដែរ។
«លើសពីនេះក៏បានធ្វើបុណ្យ និងឧទ្ទិសកុសលទៅកាន់ដូនតាដែលបានចែកឋានហើយ»
កញ្ញា អ៉ីម លីដា បន្ថែមថា ត្បិតមិនសូវបានទៅវត្តនៅក្នុងទឹកដីសហរដ្ឋអាមេរិកនេះ ព្រោះមានការជាប់រវល់នឹងការសិក្សារៀងខ្លួន និងមានសាលាមានចម្ងាយឆ្ងាយពីវត្តផងនោះ ដូច្នេះការទៅវត្តនេះអាចធ្វើឱ្យកញ្ញាមានអារម្មណ៍ជ្រះថ្លា និងរីករាយ ជាពិសេសអាចជួបជុំបងប្អូនខ្មែរដែលធ្វើឱ្យកញ្ញាអាចកាត់បន្ថយការនឹកផ្ទះ នឹកស្រុកកំណើត៕
