គោលដៅអភិវឌ្ឍន៍ប្រកបដោយចីរភាព ឬហៅថា Sustainable Development Gold (SDGs) បានដាក់ឱ្យអនុវត្តនៅក្នុងខែកញ្ញា ឆ្នាំ២០១៥ ដោយមហាសន្និបាតអង្គការសហប្រជាជាតិ (UN) បានអនុម័តរបៀបវារៈត្រឹមឆ្នាំ២០៣០ សម្រាប់ការអភិវឌ្ឍប្រកបដោយចីរភាព ។ គោលដៅទាំងនេះមានចំនួន ១៧ ដែលត្រូវបានគេស្គាល់ថា គោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ និងបានចែកចេញជា ១៦៩ចំណុចដៅ និង ២៣០សូចនាករ ។ ចំណែកនៅកម្ពុជាបានដាក់បញ្ចូលគោលដៅទី១៨ មួយបន្ថែមទៀត គឺកម្ពុជាគ្មានគ្រាប់មីន និងសំណល់ជាតិផ្ទុះពីសង្គ្រាម ។

នៅក្នុងកម្មវិធីផ្លាស់ប្តូរការសិក្សាអាស៊ីប៉ាស៊ីហ្វិកលើកដំបូងនៅកម្ពុជា (APYE) ឯកឧត្តមបណ្ឌិត ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ មានប្រសាសន៍ថា យុវជនជាតួអង្គសំខាន់ និងមានសក្កានុពលចូលរួមសកម្មភាពនានានៅក្នុងសង្គម ដើម្បីសម្រេចគោលដៅអភិវឌ្ឍន៍ប្រកបដោយចីរភាព (SDGs) ។ ទន្ទឹមគ្នានេះ កម្មវិធីផ្លាស់ប្តូរការសិក្សាយុវជនអាស៊ីប៉ាស៊ីហ្វិក បង្កើតឡើងក្នុងគោលបំណងកសាងសក្តានុពលរបស់យុវជនឆ្លើយតបនឹងគោលដៅអភិវឌ្ឍន៍ប្រកបដោយចីរភាព ។

ឯកឧត្តមបណ្ឌិត ហេង សុខគង់ មានប្រសាសន៍បញ្ជាក់ថា គោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិពិតជាសំខាន់សម្រាប់ការអភិវឌ្ឍន៍សង្គម ។ យុវជនជាកាតាលីករដ៏ចាំបាច់ចូលរួមសកម្មភាពនានា ដើម្បីសម្រេចគោលដៅអភិវឌ្ឍន៍ប្រកបដោយចីរភាព ។ យុវជនទាំងអស់មកពីគ្រប់បណ្តាប្រទេសមានចំណេះដឹង សមត្ថភាព ថាមពល ព្រមទាំងអាចប្រើប្រាស់បច្ចេកវិទ្យានានាជួយដល់សកម្មភាពនានានៅក្នុងគោលដៅអភិវឌ្ឍន៍ប្រកបដោយចីរភាព ។

“ខ្ញុំយល់ថាយុវជនចូលរួមជំរុញការងារលើកកម្ពស់គោលដៅអភិវឌ្ឍន៍ប្រកបដោយចីរភាពឱ្យកាន់តែប្រសើរ ដោយសារទី១ យុវជនមានកម្លាំង មានថាមពល, ទី២ យុវជនចូលចិត្តចំណេះដឹងបច្ចេកវិទ្យា, ទី៣ ភាពឆ្លាតវៃរបស់យុវជនខ្ពស់ (IQ), ទី៤ បរិស្ថានអំណោយផលដល់ការចូលរួមរបស់យុវជន និងយុវជនខ្លួនឯងមានឱកាសច្រើនធ្វើកិច្ចការដែលខ្លួនចង់ធ្វើ និងទី៥ យុវជនអាចធ្វើការងារស្ម័គ្រចិត្តទៅតាមចំណង់ចំណូលចិត្តរបស់ពួកគេ” – ឯកឧត្តមបណ្ឌិត ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ ។

បើតាមឯកឧត្តមបណ្ឌិត ហេង សុខគង់ ទន្ទឹមនឹងសក្កានុពលរបស់យុវជនខាងលើនេះ យុវជនក៏ជាតួអង្គសំខាន់ក្នុងការបង្កើតគំនិតច្នៃប្រតិដ្ឋនៅក្នុងការងារអាជីវកម្ម ។ បច្ចុប្បន្នមានអាជីវកម្មជាច្រើនបានបង្កើតឡើង និងគ្រប់គ្រងដោយយុវជន ពិសេសគឺពាក់ព័ន្ធនឹងវិស័យបច្ចេកវិទ្យា ។ ឯកឧត្តមបណ្ឌិតបានបន្តថា នៅពេលដែលយុវជនមានគំនិតអ្វីមួយ ពួកគេតែងបំលែងគំនិតទាំងនោះទៅជាសកម្មភាព ទោះបីយុវជនពុំមានដើមទុន ប៉ុន្តែតាមរយៈគំនិតច្នៃប្រតិដ្ឋនិងផែនការសកម្មភាពពិតប្រាកដ យុវជនអាចរកទុកដើម្បីដំណើរការអាជីវកម្មរបស់ពួកគេបានដោយងាយ ។

ជាមួយគ្នានេះដែរឯកឧត្តមរដ្ឋលេខាធិការក្រសួងឧស្សាហកម្ម បានមានប្រសាសន៍លើកឡើងថា កម្មវិធីផ្លាស់ប្តូរការសិក្សាអាស៊ីប៉ាស៊ីហ្វិកលើកដំបូងនៅកម្ពុជា នឹងជួយឱ្យយុវជនដែលបានចូលរួមទាំងអស់មានឱកាសបញ្ចេញទស្សនៈផ្ទាល់ខ្លួនអំពី SDGs ណាមួយ ព្រមទាំងបង្ហាញសមត្ថភាព ភាពជាអ្នកដឹកនាំក្នុងការដោះស្រាយបញ្ហាប្រឈមក្នុងសង្គម ដែលជាទុនសម្រាប់ពួកគេអភិវឌ្ឍជំនាញ និងចំណេះដឹងក្នុងការគ្រប់គ្រងគម្រោងរបស់ខ្លួន ។

សូមជម្រាបថា កម្មវិធីផ្លាស់ប្តូរយុវជនអាស៊ីប៉ាស៊ីហ្វិក ដែលហៅកាត់ថា (APYE) លើកដំបូងមកប្រទេសកម្ពុជា ប្រព្រឹត្តទៅចាប់ពីថ្ងៃទី០២ ដល់ថ្ងៃទី១៣ ខែសីហា ឆ្នាំ២០២៣ ខាងមុខនេះ ក្រោមប្រធានបទ ឆ្ពោះទៅរកអនាគត ប្រកបដោយចីរភាព ៖ យុវជនជាដៃគូក្នុងការស្ដារឡើងវិញពីវិបត្តិនៃជំងឺកូវីដ-១៩ ។ APYE ជាកម្មវិធីអន្តរជាតិដែលបង្កើតឡើងក្នុងគោលបំណងកសាងសក្តានុពលរបស់យុវជន ។

កម្មវិធីផ្លាស់ប្តូរការសិក្សាអាស៊ីប៉ាស៊ីហ្វិកលើកដំបូងនៅកម្ពុជា បានរៀបចំនិងទទួលជោគជ័យនៅក្នុងប្រទេសផ្សេងៗ ដូចជា ហ្វីលីពីន កូរ៉េខាងត្បូង ថៃ វៀតណាម និងឥណ្ឌាដោយសង្កត់ធ្ងន់លើការផ្តល់វេទិកាសម្រាប់យុវជន ឬអ្នកដឹកនាំវ័យក្មេងក្នុងការចូលរួមសកម្មភាព ដើម្បីជំរុញការអនុវត្តគោលដៅអភិវឌ្ឍន៍ប្រកបដោយចីរភាព (SDGs) ។ គោលដៅអភិវឌ្ឍន៍ប្រកបដោយចីរភាព គឺជាការអំពាវនាវឱ្យធ្វើសកម្មភាពជាសាកលដើម្បីបញ្ចប់ភាពក្រីក្រ ការពារបរិស្ថាន និងអាកាសធាតុរបស់ផែនដី ហើយធានាថាមនុស្សនៅគ្រប់ទីកន្លែងអាចទទួលបានសន្តិភាព និងវិបុលភាព ។

សម្រាប់ឆ្នាំ២០២៣ កម្មវិធី APYE ទទួលបានការគាំទ្រពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា ព្រមទាំងសាកលវិទ្យាល័យ Hanyang ប្រទេសកូរ៉េខាងត្បូង និងមូលនិធិសាកលវិទ្យាល័យ Hanyang LINC (Hanyang University LINC Foundation) មជ្ឈមណ្ឌលប្រើប្រាស់ទឹកប្រកបដោយចីរភាព (Center for Sustainable Water) និងអង្គការដៃគូផ្សេងទៀត ៕