ដើម្បីសម្រេចបាននូវគោលដៅនៃការអប់រំ មានមធ្យោបាយជាច្រើន ប៉ុន្តែក្នុងចំណោមនោះ ក៏​មានកត្តាសំខាន់ៗ៤ ដែលជួយ​ដល់ការ​លើក​កម្ពស់​គុណភាពអប់រំនៅកម្ពុជា។ នេះជា​ប្រសាសន៍​លើកឡើងរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ក្នុងឱកាស​ថ្លែងបាឋកថាពិសេស សម្រាប់អន្តរជាតិសម្រាប់យុវជន ឆ្នាំ២០២៤។

បើតាមប្រសាសន៍របស់ ឯកឧត្តមបណ្ឌិតសភាចារ្យ កត្តាសំខាន់ទាំង៤ ដើម្បីលើក​កម្ពស់គុណភាពអប់រំ​នៅ​កម្ពុជា រួមមាន ទី១ គឺ កត្តាសាលារៀន ៖ ឯកឧត្តមរដ្ឋមន្រ្តីមានប្រសាសន៍ថា ដើម្បីទាក់ទាញ​ឱ្យសិស្សចូលរៀន សាលា​រៀន​ត្រូវ​តែមានហេដ្ឋារចនាសម្ព័ន្ធល្អ មានបន្ទប់រៀនទំនើប មានសម្ភារៈ​ឧបទ្ទេសល្អ ហើយសំខាន់បំផុត គឺការ​គ្រប់គ្រង​របស់នាយកសាលា។

ទី២ គឺ កត្តាគ្រូបង្រៀន ៖ ឯកឧត្តម ហង់ជួន ណារ៉ុន មា​នប្រសាសន៍ថា ដើម្បីបង្រៀនសិស្ស​ឱ្យ​មានគុណភាព គឺទាល់តែគ្រូបង្រៀនមានគុណភាព គ្រូបង្រៀន​តម្រូវ​ឱ្យមានស្តង់ដារវិជ្ជាជីវៈ​គ្រូបង្រៀន ដោយមានចំណេះដឹងទូលំទូលាយ យល់ដឹងអំពីចិត្តគរុកោលល្យ ចេះប្រើប្រាស់វិធីសាស្រ្តបង្រៀន ដើម្បី​ឱ្យ​សិស្ស​ទទួលបាន​នូវ​បំណិនសតវត្សរ៍ទី២១។

“គ្រូបង្រៀនត្រូវរៀនជាប្រចាំ បើមិន​រៀនទេ យើងមិនអាចដើរទាន់បច្ចេកវិទ្យាបានទេ និងសីលធម៌វិជ្ជាជីវៈ ធ្វើ​យ៉ាងម៉េច​ឱ្យមានភាពយុត្តិធម៌ ក៏​ដូចជាសីលធម៌ជាដើម ដូច្នេះកត្តាគ្រូបង្រៀន ជាកត្តាសំខាន់ទី២ ដើ​ម្បីសម្រេចបាននូវការអប់រំមួយ​ដែលល្អ”

ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា

ទី៣ កត្តាសិស្ស ៖ បើតាម​ប្រសាសន៍របស់ឯកឧត្តមរដ្ឋមន្រ្តីក្រសួងអប់រំ ដើម្បីទទួលទទួលបានសិស្ស​ដែលល្អ គឺត្រូវថែទាំតាំងពីក្មេង ដោយបានន័យថា តួនាទីសារៈសំខាន់ នៃការថែទាំពីក្មេង គឺផ្តល់​ឱកាស​ឱ្យ​រៀននៅមត្តេយ្យសិក្សា ដើ​ម្បីអភិវឌ្ឍបំណិនសង្គម បន្ទាប់​ម​កទៀតគឺធ្វើម៉េច​ឱ្យសិស្ស​ខិតខំប្រឹងប្រែងរៀនសូត្រ ។

ឯកឧត្តមបណ្ឌិតសភាចារ្យមានប្រសាន៍បន្តថា សាលាត្រូវតែទាក់ទាញ​ឱ្យសិស្ស​មក​រៀន ហើយ​ឪពុកម្តាយ​ត្រូវតែគាំទ្រ ដូច្នេះកត្តាទី៤ គឺការគាំទ្រ និង​ការ​ចូលរួមរបស់ឪពុកម្តាយ ។ ឯកឧត្តម ហង់ជួន ណារ៉ុន មានប្រសាសន៍​ដោយសង្កត់ធ្ងន់ថា ឪពុកម្តាយត្រូវតែមានការត្រួតពិនិត្យចំពោះកូន ព្រោះកូនមកសាលារៀនតែ៥ ទៅ៦ម៉ោងក្នុងមួយថ្ងៃ ប៉ុន្តែពេល​ត្រឡប់ទៅផ្ទះវិញ គឺត្រូវតែមានការគាំទ្រ ហើយសង្គមទាំងមូល​ត្រូវ​ឱ្យ​តម្លៃលើការអប់រំ ព្រោះប្រសិនបើសង្គម​មិន​ឱ្យ​តម្លៃលើការអប់រំ គ្រូបង្រៀន​នឹងគ្មានទឹកចិត្ត​ទៅបង្រៀន ហើយ​សិស្ស​ខ្លួន​ឯង​ក៏​មិន​មានទឹកចិត្តរៀនដែរ។

សរុបមកវិញ ឯកឧត្តមរដ្ឋមន្រ្តីបញ្ជាក់ថា កត្តាទាំង៤ខាងលើនេះ គឺសំខាន់ ហើយ​ក៏​ត្រូវ​បានបញ្ចូលទៅក្នុងស្តង់ដារសាលារៀនគំរូ ហើយ​ជាមួយ​គ្នា​ដើម្បីសម្រេចបាននូវគុណភាពអប់រំ គឺសង្គមទាំងមូលត្រូវតែសហការគ្នា ធ្វើយ៉ាងម៉េច​កែលម្អជាប្រចាំ។

សូមបញ្ជាក់ដែរថា ចាប់តាំងពីចុងឆ្នាំ២០២៣មក ក្រសួងអប់រំ យុវជន និងកីឡា បានដាក់​ឱ្យ​អនុវត្ត​នូវ​ស្តង់ដារសាលារៀនគំរូ ចាប់ពីថ្នាក់មត្តេយ្យសិក្សា រហូត​ដល់វិទ្យាល័យ ដើម្បីលើក​កម្ពស់គុណភាព​អប់រំ​នៅ​កម្ពុជា។

ស្តង់ដារសាលារៀនគំរូ ដែលក្រសួងបានដាក់អនុវត្តគឺ ការលើកកម្ពស់អភិបាលកិច្ចសាលារៀន ការពិនិត្យកែសម្រួលនិងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស ការយចិត្តទុកដាក់លើសុខភាពសិស្ស និងការជំរុញនិងលើកទឹកចិត្តការចូលរួមរបស់ឪពុកម្ដាយ អាណាព្យាបាល និងសហគមន៍ ក្នុងការអប់រំ។ បើតាមប្រសាសន៍របស់ ឯកឧត្តម ហង់ជួន ណារ៉ុន «សាលារៀនគំរូ គឺជាសាលារៀនដែលសម្រេចបាននូវស្ដង់ដាទាំង៥ ដែលរួមមាន ស្ដង់ដារទី១ លទ្ធផលសិក្សារបស់សិស្ស ស្ដង់ដារទី២ ការបង្រៀននិងរៀន ស្ដង់ដាទី៣ ការចូលរួមរបស់សហគមន៍ ស្ដង់ដារទីដំណើរប្រតិបត្តិការនិងរដ្ឋបាលសាលារៀន និងស្ដង់ដាទី៥ គណនេយ្យភាពរបស់សាលារៀន»៕