ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ធ្មេចបើកៗ ពេលវេលា នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប កាន់តែកៀកខិតជិតដល់ ធ្វើឱ្យបេក្ខជនមួយចំនួនធំមានអារម្មណ៍ភ័យផង អរផង ហើយខ្លះទៀតក៏ពុំដឹងត្រូវត្រៀមខ្លួនបែបណាខ្លះ។ ក្នុងអត្ថបទនេះ លោក សាន គឹមស័ង អតីតសិស្សនិទ្ទេស A ឆ្នាំ២០១៩ នឹងចែករំលែកគន្លឹះមួយចំនួនដែលបេក្ខជនគួរធ្វើមុនការប្រឡងមកដល់ ដើម្បីទទួលបានលទ្ធផលល្អក្នុងការប្រឡងបាក់ឌុបនាពេលខាងមុខ។
បើតាមលោក សាន គឹមស័ង ប្រសិនបើសិស្សានុសិស្ស បានរៀនតាំងពីដើមឆ្នាំមក ច្បាស់ណាស់ថា នឹងចេះច្រើន ចងចាំច្រើន ដឹងមេរៀនច្រើន និងបានអនុវត្តវិញ្ញាសាជាច្រើន។ ដូច្នេះ រយៈពេល ២សប្ដាហ៍មុនប្រឡងនេះ បេក្ខជន ត្រូវរំលឹកមេរៀនដែលបានរៀនទាំងអស់ពីដើមឆ្នាំដល់ចុងឆ្នាំ។
ចំណុចសំខាន់មួយទៀតអំឡុងពេល ២សប្ដាហ៍មុនប្រឡងនេះ គឺការអនុវត្តលំហាត់តេស្តសាកល្បង មានន័យថា ដោះស្រាយលំហាត់ ឆ្លើយសំណួរដូចការប្រឡងជាក់ស្ដែង។ ឧទាហរណ៍៖ លំហាត់គណិតវិទ្យាយើងចេះអស់ហើយ តែយើងចង់ដឹងថា ពេលប្រឡងអាចភ្លាត់កន្លែងណាឬអត់? យើងអាចគ្រប់គ្រងពេលវេលានៅក្នុងការសរសេរចម្លើយទាន់ពេលវេលាឬអត់? ដូច្នេះ យើងអាចធ្វើការសាកល្បង ដោយយកវិញ្ញាសាឆ្នាំចាស់ៗយកមកអង្គុយធ្វើ។ ហើយបើមុខវិជ្ជាអក្សរសាស្រ្តខ្មែរ គឺការសរសេរតែងសេចក្ដី ដែលមានចំណុចសំខាន់រួមមាន ផ្ដើមសេចក្ដី តួសេចក្ដី និងបញ្ចប់សេចក្ដី។ ដូច្នេះ ពីមួយជំហានទៅមួយជំហាន យើងត្រូវបែងចែកការសរសេរក្នុងផ្នែកនីមួយៗប៉ុន្មាន ហើយត្រូវប្រាកដថា ការសរសេរគឺត្រឹមត្រូវ ជៀសវាងសរសេរដល់តួសេចក្ដីហើយចង់ទៅកែសេចក្ដីផ្ដើមវិញ គឺអត់ល្អទេ។
លោក សាន គឹមស័ង សង្កត់ធ្ងន់ថា រយៈពេល២សប្ដាហ៍មុនប្រឡងនេះ បេក្ខជនត្រូវព្យាយាមហ្វឹកហាត់ ឬអនុវត្តលើចំណុចទាំងអស់នេះ ដើម្បីឱ្យស្ទាត់ ស្ទាបស្ទង់ពេលវេលា និងស្ទាបស្ទង់ថាមពលរបស់ខ្លួន។ លើសពីនេះ បេក្ខជនក៏ត្រូវហ្វឹកហាត់បន្ថែមក្នុងការផ្ចង់អារម្មណ៍នៅក្នុងការប្រឡង ព្រោះថា សិស្សមួយចំនួនពុំសូវផ្ចង់អារម្មណ៍បានល្អ ដោយសារលេងបណ្ដាញសង្គមច្រើនពេក ដែលធ្វើឱ្យការផ្ចង់អារម្មណ៍មិនសូវមូល។ ដូច្នេះ យើងក៏ត្រូវរកពេលសម្រាកបន្តិច ឬចូលបន្ទប់ទឹក រួចហើយចាំត្រឡប់មកដោះស្រាយលំហាត់ ឬឆ្លើយសំណួរវិញ។
ដោយឡែក សម្រាប់បេក្ខជន ដែលពីដើមឆ្នាំមកមិនសូវបានរៀន លោក សាន គឹមស័ង ផ្តល់យោបល់ថា នៅរយៈពេល ២សប្ដាហ៍មុនការប្រឡងនេះ បេក្ខជនត្រូវតែខំប្រឹងរៀន ព្យាយាមយកពេលទំនេរទាំងអស់ដាក់ផ្ដោតទៅលើការរៀន ចំណែកការកម្សាន្តដូចជា ការមើលរឿង មើលកុន លេងហ្គេម ដើរលេងជាមួយមិត្តភក្ដិជាដើម គួរផ្អាកសិន ដើម្បីធ្វើយ៉ាងណាឱ្យយើងប្រឡងបាក់ឌុបឱ្យជាប់សិន។ នៅពេលប្រឡងជាប់ហើយ យើងអាចលេងកម្សាន្តបានល្អជាងមុន មិនមានសម្ពាធ ជាពិសេសនៅពេលយើងប្រឡងជាប់ ទាំងក្រុមគ្រួសារ លោកគ្រូអ្នកគ្រូ ក៏អបអរសាទរចំពោះលទ្ធផលរបស់យើងផងដែរ។
សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៥-២០២៦ គ្រោងនឹងប្រព្រឹត្តទៅនៅថ្ងៃទី១០-១១ ខែសីហា ឆ្នាំ២០២៦ខាងមុខនេះ៕
