ក្នុងរយៈពេល១៦ឆ្នាំកន្លងមកនេះ ពោលគឺចាប់តាំងពីដំណើរការនៅឆ្នាំ២០០៧ វិទ្យាស្ថានអភិវឌ្ឍវិស័យអប់រំ (EDI) ដែលជាវិទ្យាស្ថានផ្តល់នូវសេវាកម្មអប់រំ ប្រឹក្សាយោបល់ បណ្តុះបណ្តាលផ្នែកជំនួញ និងសេវាស្រាវជ្រាវ បានធ្វើការអភិវឌ្ឍសមត្ថភាពដល់បុគ្គលិក អ្នកគ្រប់គ្រង អ្នកជំនួញ និងមន្រី្តរាជការនៅកម្ពុជាប្រមាណជាង ៤ម៉ឺន៥ពាន់នាក់ហើយទាំងស្ថាប័នរដ្ឋ និងឯកជន ដែលនេះគឺជាជោគជ័យមួយក្នុងការចូលរួមអភិវឌ្ឍធនធានមនុស្សស្របតាមការអភិវឌ្ឍរបស់កម្ពុជា តំបន់ និងសាកលលោក។

នៅក្នុងពិធីជប់លៀងថ្លែងអំណរគុណដល់ស្ថាប័នដៃគូ ដែលតែងគាំទ្រសេវាបណ្តុះបណ្តាលរបស់វិទ្យាស្ថាន លោក គុជ សាវ៉ាត នាយកគ្រប់គ្រងវិទ្យាស្ថានអភិវឌ្ឍវិស័យអប់រំ (EDI) បញ្ជាក់ថា បច្ចុប្បន្នវិទ្យាស្ថានវគ្គបណ្តុះបណ្តាលជាង១២៥ជំនាញ និងគ្រូបង្គោលរហូតដល់ជិត១រយនាក់ ដែលពួកគាត់ភាគច្រើនជាសាស្ត្រាចារ្យ ថ្នាក់ដឹកនាំក្រុមហ៊ុន និងមន្រ្តីរាជការ ដែលមានបទពិសោន៍លើជំនាញនីមួយៗជាច្រើនឆ្នាំ។ ក្នុងរយៈពេលជាង១៦ឆ្នាំមកនេះ វិទ្យាស្ថានបានធ្វើការបណ្តុះបណ្តាលបុគ្គលិកក្រុមហ៊ុន ក៏ដូចជាមន្រ្តីរាជការផងដែរ បានចំនួនជាង ៤ម៉ឺន៥ពាន់នាក់ ដោយមានដៃគូជាក្រុមហ៊ុន និងស្ថាប័នជាង១៦០។

លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ និងបណ្តុះបណ្តាល វេសឡាញ អេឌ្យូខេសិន គ្រុប និងជាប្រធានវិទ្យាស្ថានអភិវឌ្ឍវិស័យអប់រំ មានប្រសាសន៍ថា ជាបេសកកម្ម EDI គឺផ្តោតទៅលើការកសាងសមត្ថភាពបុគ្គលិក ថ្នាក់ដឹកនាំរបស់ក្រុមហ៊ុន ហើយមិនតែប៉ុណ្ណោះក៏បានចូលរួមកសាងសមត្ថភាពដល់មន្រ្តីរាជការនៅតាមក្រសួងស្ថាប័នមួយចំនួនផងដែរ។

បើទោះបីជាទទួលបានជោគជ័យ ដោយការគាំទ្រពីក្រុមហ៊ុនជាច្រើនទៅលើគុណភាពនៃការបណ្តុះបណ្តាលដែលមានការបត់បែនយ៉ាងណាក៏ដោយ ក៏ EDI នៅតែសិក្សាជាបន្តបន្ទាប់ទៅលើបរិបទប្រែប្រួលនៃសង្គមរបស់យើង ដើម្បីអភិវឌ្ឍខ្លួនបន្ថែមនៅក្នុងការជួយបម្រើការរីកចម្រើនរបស់ក្រុមហ៊ុនដៃគូ ។ បើតាមប្រសាសន៍របស់លោកឧកញ៉ា ប៉ិច បូឡែន នៅឆ្នាំ២០២៤នេះ EDI បានត្រៀមរួចជាស្រេច នៅក្នុងការពង្រីកសេវារបស់ខ្លួនទៅតាមរយៈ App Platform ជា Leaning Platform ដើម្បីងាយស្រួលក្នុងការសិក្សារបស់សិក្ខាកាម។

គួរជំរាបថា កាលពីថ្ងៃទី២៩ ខែមករា ឆ្នាំ២០២៤ វិទ្យាស្ថានអភិវឌ្ឍវិស័យអប់រំ បានរៀបចំពិធីជប់លៀងថ្លែងអំណរគុណជូនដល់ដៃគូអាជីវកម្មប្រមាណ ១៦០ ក្រុមហ៊ុន/ស្ថាប័ន ក្នុងគោលបំណងថ្លែងអំណរគុណ និងប្រកាសជូននូវវគ្គសិក្សាថ្មីៗ និងជាវគ្គសិក្សាដែលចាំបាច់សម្រាប់ការអភិវឌ្ឍន៍ដល់ស្ថាប័នដៃគូ ជាពិសេសដល់ម្ចាស់អាជីវកម្ម ក្រុមហ៊ុនដៃគូដែលតែងតែគាំទ្រសេវាបណ្តុះបណ្តាលរបស់វិទ្យាស្ថាន។

ឆ្លៀតក្នុងឱកាសនោះដែរ វិទ្យាស្ថានEDI ក៏បានរៀបចំវេទិកាចែករំលែកចំណេះដឹងទាក់ទងនឹងសហគ្រិនភាព ការអភិវឌ្ឍធនធានមនុស្ស គន្លឹះកសាងសមត្ថភាពបុគ្គលិក របៀបពង្រឹងបរិស្ថានការងារ និងការអភិវឌ្ឍន៍ជំនាញទន់ឱ្យកាន់តែមានប្រសិទ្ធភាព ដោយមានការអញ្ជើញចូលរួមពីវាគ្មិនកិត្តិយសល្បីៗ ដែលជួយជាកត្តាជំរុញទឹកចិត្តក្នុងការអភិវឌ្ឍន៍ និងជម្រុញផលិតភាពការងារ បង្កើនសមត្ថភាពធនធានមនុស្សនៅកម្ពុជា៕