ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រជាជនសកល សំដៅលើប្រជាជនដែលអាចស្វែងយល់ និងយល់ដឹងអំពីនិន្នាការសកលរបស់ពិភពលោក តំបន់ និងក្របខណ្ឌប្រទេសកម្ពុជា។ ដូច្នេះ មានភាពចាំបាច់សម្រាប់ប្រជាពលរដ្ឋ ជាពិសេសយុវជនវ័យក្មេង ក្នុងការប្រើប្រាស់បច្ចេកវិទ្យាជាជំនួយ ដើម្បីដឹងអំពីនិន្នាការសកល និងរឿងរ៉ាវដែលកើតឡើងរបស់ពិភពលោកនៅក្នុងតំបន់ និងនៅក្នុងប្រទេសកម្ពុជា។
ឯកឧត្តម អាំង សុវណ្ណរ័ត្ន នាយកប្រតិបត្តិ នៃមជ្ឈមណ្ឌលកម្ពុជា ៤.០ មានប្រសាសន៍ថា បច្ចុប្បន្ន កម្ពុជាមានរបាយប្រជាជនវ័យក្មេងច្រើន ហើយងាយសម្របខ្លួនទៅនឹងអ្វីដែលថ្មីៗ និងចាប់យកបច្ចេកវិទ្យាថ្មីៗ ។ លើសពីនេះ ក៏មានការខិតខំប្រឹងប្រែងពីរាជរដ្ឋាភិបាល និងគ្រប់តួអង្គទាំងអស់ ដើម្បីដាក់គោលដៅក្នុងការជំរុញ និងកសាងសង្គម-សេដ្ឋកិច្ចឌីជីថលនៅកម្ពុជា។ ឯកឧត្តម អាំង សុវណ្ណរ័ត្ន បន្តថា ការចូលរួមពីគ្រប់តួអង្គ និងភាគីពាក់ព័ន្ធទាំងអស់ ពិតជាសំខាន់ និងដើម្បីធានាថា ប្រជាពលរដ្ឋ ជាពិសេសយុវជនកម្ពុជា មានឱកាសគ្រប់គ្រាន់ក្នុងការប្រែក្លាយខ្លួនទៅជាប្រជាជនសកល។
នាយកប្រតិបត្តិ នៃមជ្ឈមណ្ឌលកម្ពុជា ៤.០ បញ្ជាក់បន្ថែមថា មានការងារ ៣សំខាន់ ដែលជួយឱ្យយុវជនប្រែក្លាយខ្លួនជាប្រជាជនសកល គឺ ទី១. ការចេះប្រើប្រាស់បច្ចេកវិទ្យា តាមរយៈការធ្វើអក្ខរកម្មឌីជីថល ដើម្បីឱ្យយុវជនចេះប្រើប្រាស់ឧបករណ៍ឌីជីថលដែលជាមធ្យោបាយនាំដល់លទ្ធភាពក្នុងការស្វែងយល់, ទី២. យុវជនត្រូវមានចំណង់ចំណូលចិត្ត និងលទ្ធភាពគ្រប់គ្រាន់ក្នុងការស្វែងយល់ពីនិន្នាការសកល អាចប្រើប្រាស់ឧបករណ៍ឌីជីថល អាចប្រើប្រាស់បច្ចេកវិទ្យាជាមូលដ្ឋានឱ្យចំគោលដៅ និង ទី៣. ផ្នែកភាសា ចំណេះដឹងបច្ចេកវិទ្យាទាមទារឱ្យមានចំណេះដឹងភាសាបរទេស គឺភាសាអង់គ្លេសជាភាសាសកល។
ឯកឧត្តម អាំង សុវណ្ណរ័ត្ន បន្ថែមថា បច្ចុប្បន្ននេះ មជ្ឈមណ្ឌលកម្ពុជា ៤.០ បានព្យាយាមផលិតនូវមាតិកា ខ្លឹមសារពាក់ព័ន្ធជាមួយបច្ចេកវិទ្យាថ្មីៗ សម្រាប់ផ្សព្វផ្សាយដល់សាធារណៈជនជាភាសាខ្មែរ។ តែយ៉ាងណាក៏ដោយ បើតាមឯកឧត្តម អាំង សុវណ្ណរ័ត្ន ចំណេះដឹងផ្នែកបច្ចេកវិទ្យា ត្រូវតែមានប្រើប្រាស់ពាក្យបច្ចេកទេស។
បើតាម នាយកប្រតិបត្តិនៃមជ្ឈមណ្ឌលកម្ពុជា ៤.០ នៅក្នុងយុគសម័យឌីជីថល យើងក៏មានឱកាសច្រើននៅក្រោមម្លប់សន្តិភាពដែលប្រជាជនក្ដី យុវជនកី្ដ មានឱកាសច្រើនក្នុងការសិក្សារៀនសូត្រ ស្វែងយល់ ធ្វើអាជីវកម្ម ការបំពេញភារកិច្ចការងារក្នុងជីវភាពប្រចាំថ្ងៃ។ ឱកាសទាំងនេះ ផ្ដល់នូវក្ដីសង្ឃឹមសម្រាប់យុវជនវ័យក្មេង ដើម្បីធានាដល់អនាគតរបស់ពួកគាត់។ ហើយអ្វីដែលសំខាន់ គឺយុវជនត្រូវចេះចាប់យកឱកាស សម្របខ្លួន និងប្រើប្រាស់ឱកាសដែលមាននៅពេលបច្ចុប្បន្ននេះ ដោយព្យាយាមទាញយកប្រយោជន៍ពីបច្ចេកវិទ្យាឌីជីថល និងរាល់ការវិវត្តផ្សេងៗក្នុងទិសដៅវិជ្ជមានដើម្បីចូលរួមអភិវឌ្ឍន៍សង្គម៕
