ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្នបណ្តាញសង្គមត្រូវបានប្រើប្រាស់យ៉ាងទូលំទូលាយមិនថាទីក្រុង ឬជនបទ ក្នុងការធ្វើទំនាក់ទំនង ឬចែករំលែករឿងរ៉ាវផ្សេងៗមិនថាផ្ទាល់ខ្លួន ឬសង្គមនោះឡើយ។ មាតិកាដ៏សម្បូរបែបនៅលើបណ្តាញសង្គម ដែលមានទាំងមាតិកាល្អ និងមាតិកាអាក្រក់ បានធ្វើឱ្យអ្នកជំនាញសម្តែងការព្រួយបារម្ភចំពោះការកើតមានជំងឺផ្លូវចិត្តទៅលើយុវជន។
លោកសាស្រ្តាចារ្យបណ្ឌិត អ៊ាន និល នាយកមជ្ឈមណ្ឌលថែទាំ និងស្រាវជ្រាវការប៉ះទង្គិចផ្លូវចិត្ត (CTRO) មានប្រសាសន៍ថា បើយោងទៅតាមការស្រាវជ្រាវថ្មីៗនេះ គេបានរកឃើញមានជំងឺផ្លូវចិត្ត២ធំៗ បាននិងកំពុងកើតឡើងចំពោះយុវជនដែលប្រើប្រាស់បណ្តាញសង្គមហួសហេតុពេក ។ ជំងឺធំៗទាំង២នោះ គឺជំងឺធ្លាក់ទឹកចិត្ត និងជំងឺថប់អារម្មណ៍។
លោកបណ្ឌិត អ៊ាន និល លើកឡើងថា យុវវ័យដែលមានអាយុចន្លោះ ១៣ ឬ ១៤ ឆ្នាំរហូតដល់ ១៦ ឬ ១៧ ឆ្នាំគឺជាវ័យដែលបានប្រើប្រាស់បណ្តាញផ្សព្វផ្សាយសង្គមខ្លាំងជាងគេ ជាពិសេស Facebook និង Tik Tok ។ ដោយសារតែយុវវ័យមានការប្រើប្រាស់បណ្តាញផ្សព្វផ្សាយសង្គមច្រើន ដូច្នេះអ្នកប៉ះពាល់ពីបណ្តាញផ្សព្វផ្សាយសង្គមច្រើនក៏មកពីវ័យនេះដែរ ។ បើតាមទិន្នន័យ រវាងយុវជន និងយុវនារី មានការទទួលផលប៉ះពាល់កម្រិតប្រហាក់ប្រហែលគ្នា ដោយគ្រាន់តែនារីត្រូវប៉ះពាល់ច្រើនជាងបុរសបន្តិច។
តែយ៉ាងណា បើតាមលោកបណ្ឌិត អ៊ាន និល ប្រសិនបើយុវជនកាត់បន្ថយការប្រើប្រាស់បណ្តាញសង្គម នោះជំងឺទាំងពីរខាងលើ ក៏មានការអន់ថយផងដែរ ។ លោកមានប្រសាសន៍ថា ប្រសិនបើយើងអាចកាត់បន្ថយការប្រើប្រាស់បណ្តាញសង្គមត្រឹមតែ ៣០នាទីក្នុង ១ថ្ងៃ នោះវានឹងអាចជួយសម្រួលដល់ផ្លូវចិត្តរបស់យើងបានដូចជា ជំងឺធ្លាក់ទឹកចិត្ត និងការថប់អារម្មណ៍។
ជាមួយគ្នានេះ លោកបណ្ឌិតក៏ស្នើដល់យុវជនគួរប្រើប្រាស់បណ្តាញសង្គមដើម្បីជួយដល់ការវិវត្តទាំងផ្លូវកាយ និងផ្លូវចិត្ត ពោលគឺគួរតែផ្តោតទៅលើមាតិកាណាដែលជាចំណេះដឹង ជាផលប្រយោជន៍ ជាជំនាញ ជាបទពិសោធន៍ ឬបំណិននៅក្នុងការរស់នៅ ។ បន្ថែមពីនេះ យុវជនក៏ត្រូវរៀនវាយតម្លៃគុណភាពមាតិកា ឬក៏ការផ្សព្វផ្សាយនៅតាមបណ្តាញសង្គម បូករួមទាំងប្រភព នៃមាតិកាទាំងនោះផងដែរ។
ជាការផ្តល់ដំបូន្មាន យុវជនត្រូវជៀសវាងការប្រើប្រាស់បណ្តាញសង្គមនៅពេលទទួលដំណេក ដោយសារតែការមើលមាតិកានៅលើបណ្តាញសង្គម និងពន្លឺ Blue Light ពីទូរស័ព្ទ អាចធ្វើឱ្យប៉ះពាល់ទៅដល់ទម្លាប់ នៃការគេងប្រចាំថ្ងៃរបស់យើង។
លោកបណ្ឌិត អ៊ាន និល ក៏បានផ្តាំផ្ញើទៅកាន់ឪពុកម្តាយ ក៏ដូចជាអាណាព្យាបាល ត្រូវយកចិត្តទុកដាក់ទៅលើកុមារផងដែរ ដោយតាមការសិក្សាក៏បានរកឃើញដែរថា ក្មេងដែលមានអាយុកាន់តែតិច ពួកគេនឹងទទួលរងផលប៉ះពាល់ពីបណ្តាញសង្គមក៏កាន់តែងាយ ដូច្នេះ ឪពុកម្តាយ ឬអាណាព្យាបាល ត្រូវចាប់អារម្មណ៍ពិនិត្យមើលទៅលើមាតិកានៅតាមបណ្តាញសង្គម ហើយត្រូវពិចារណាថា តើមាតិកានោះប៉ះពាល់ដែរ ឬទេ?
គួរបញ្ជាក់ថា នៅក្នុងបរិបទប្រទេសកម្ពុជា បណ្តាញសង្គម Facebook និង Tik Tok ត្រូវបានយុវជនប្រើប្រាស់ច្រើនជាងគេ ក្នុងនោះតាមទិន្នន័យ គិតត្រឹមខែឧសភា ឆ្នាំ២០២៣កន្លងទៅ អ្នកប្រើប្រាស់កម្មវិធី Facebook នៅកម្ពុជាមានចំនួន 13 575 700នាក់ ដែលស្មើនឹង 77.4%នៃប្រជាជនសរុប ក្នុងនោះមនុស្សដែលប្រើប្រាស់សកម្ម គឺមានវ័យពី២៥ ទៅ៣៤ឆ្នាំ, ដោយឡែកកម្មវិធី TikTok មានចំនួន ៧.៤លាននាក់ គិតត្រឹមខែមករា ឆ្នាំ២០២៣៕
