ថ្លែងក្នុងកម្មវិធីបើកសម្ពោធការអនុវត្តគម្រោង UNICATION Erasmus ក្នុងប្រទេសកម្ពុជា និងហ្វីលីពីន ដែលឧបត្ថម្ភគាំទ្រដោយសហភាពអឺរ៉ុប កាលពីថ្ងៃទី១៩ ខែកុម្ភៈ ឆ្នាំ២០២៤ កន្លងទៅ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា រំពឹងថានឹងទទួលបានអត្ថប្រយោជន៍ជាច្រើនពីការអភិវឌ្ឍវិស័យអប់រំឧត្តមសិក្សា និងការផ្សារភ្ជាប់ទំនាក់ទំនងរវាងអឺរ៉ុប និងអាស៊ី។

ឯកឧត្ដមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា តាមរយៈគម្រោង UNIFICATION Eramus ក្រសួងអប់រំ យុវជន និងកីឡា រំពឹងថានឹងផ្តល់នូវអត្ថប្រយោជន៍ជាច្រើនដល់ការអភិវឌ្ឍវិស័យអប់រំឧត្តមសិក្សា និងការផ្សារភ្ជាប់ទំនាក់ទំនងរវាងអឺរ៉ុប និងអាស៊ីដូចជា៖

១. ពង្រឹងកិច្ចសហការ និងការចែករំលែកចំណេះដឹង ៖ តាមរយៈការសម្របសម្រួលភាពជាដៃគូរវាងសាកលវិទ្យាល័យក្នុងសហគមន៍អឺរ៉ុប និងអាស៊ីដោយគម្រោងនេះអាចបង្កើតជាបណ្ដាញសម្រាប់ការស្រាវជ្រាវរួមគ្នាការបណ្ដុះបណ្ដាលការផ្លាស់ប្តូរមហាវិទ្យាល័យ និងការអភិវឌ្ឍកម្មវិធីសិក្សា។ កិច្ចសហការឆ្លងទ្វីបនេះនឹងនាំទៅរករបកគំហើញថ្មីៗ និងចែករំលែកឧត្តមានុវត្តន៍ឈានទៅលើកកម្ពស់វិស័យអប់រំនៅកម្ពុជា។

២. យល់ដឹងពីវប្បធម៌ និងការគោរពគ្នាទៅវិញទៅមក ៖ តាមរយៈកម្មវិធីផ្លាស់ប្តូរនិស្សិតជំរុញការយល់ដឹងអំពីវប្បធម៌ការយល់ចិត្ត និងការគោរពដែលត្រួសត្រាយផ្លូវសម្រាប់ទំនាក់ទំនងអន្តរជាតិកាន់តែរឹងមាំនិងកិច្ចសហការក្នុងវិស័យផ្សេងៗ។

៣. ធ្វើពិសោធកម្មវិស័យអប់រំ ៖ សិក្សាស្វែងយល់ពីគ្នាទៅវិញទៅមក និងពង្រីកវិសាលភាពនៃចំណេះដឹង បង្កើតបរិយាកាសសិក្សាដែលរួមបញ្ចូលកាន់តែច្រើនសម្រាប់សិស្សមកពីទ្វីបទាំងពីរ។

៤. ជំរុញឱ្យមានការងារធ្វើ និងអាជីពជាសកល ៖ ផ្តល់ជូននិស្សិតបញ្ចប់ការសិក្សានូវជំនាញអន្តរវប្បធម៌ ការហ្វឹកហាត់សម្របខ្លួនការយល់ដឹងជាសកល និងការគ្រប់គ្រងគម្រោងដើម្បីទទួលបានបទពិសោធន៍ក្នុងការរៀបចំខ្លួនឱ្យរួចរាល់សម្រាប់អាជីពនៅក្នុងទីផ្សារការងារសកល។

៥. ពង្រឹងចំណងមិត្តភាពអន្តរជាតិ ៖ ពេលដែលនិស្សិតផ្សារភ្ជាប់ទំនាក់ទំនងយូរអង្វែងជាមួយសាកលវិទ្យាល័យ នឹងឈានទៅពង្រីកពង្រឹងកិច្ចសហប្រតិបត្តិការនានា ដែលធ្វើឱ្យប្រសើរឡើងនូវទំនាក់ទំនងអន្តរជាតិរវាងបណ្តាប្រទេសនៅអឺរ៉ុប និងកម្ពុជាផងដែរ។

ឯកឧត្ដមបណ្ឌិតសភាចារ្យ ហង់ជួន ណារ៉ុន ជឿជាក់ថា គម្រោង UNIFICATION Eramus នេះ នឹងនាំមកនូវលទ្ធផលជាផ្លែផ្កា និងផលិតភាពបន្ថែមទៀតសម្រាប់កិច្ចសហប្រតិបត្តិការរយៈពេលវែងស្របតាមចក្ខុវិស័យកែលម្អគុណភាពអប់រំឧត្ដមសិក្សានៅកម្ពុជាឈានទៅសម្រេចគោលដៅអភិវឌ្ឍមូលធនមនុស្ស និងជំរុញការផ្លាស់ប្ដូរបទពិសោធន៍រវាងប្រជាជនសហគមន៍អឺរ៉ុប និងអាស៊ី។

គួរជម្រាបជូនថា គម្រោង UNIFICATION Eramus នេះ ក៏ជានិមិត្តរូបនៃកិច្ចខិតខំប្រឹងប្រែងរួមគ្នា និងការប្ដេជ្ញាចិត្តយ៉ាងមុតមាំរវាងភាគីពាក់ព័ន្ធទាំងអស់ដោយផ្ដោតជាចម្បងលើការកសាងសមត្ថភាព ការបង្កើនជំនាញទំនាក់ទំនងអន្តរវប្បធម៌ និងការគ្រប់គ្រងគម្រោងនានាតាមរយៈការចែករំលែកចំណេះដឹងបទពិសោធន៍ និងការអភិវឌ្ឍសមត្ថភាពជំនាញរបស់មន្ត្រីទទួលបន្ទុកការិយាល័យអន្តរជាតិ នៃសាកលវិទ្យាល័យនីមួយៗ (HEIs) ដែលពាក់ព័ន្ធ ដើម្បីឈានទៅជំរុញកិច្ចសហប្រតិបត្តិការរវាងសាកលវិទ្យាល័យក្នុងសហគមន៍អឺរ៉ុប និងអាស៊ាន៕