ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងបទបង្ហាញ និងកិច្ចពិភាក្សាស្ដីពី “សារៈសំខាន់នៃអំណានចំពោះការសិក្សា” ដើម្បីអបអរសាទរទិវាជាតិអំណាន លើកទី៨ កាលពីពេលថ្មីៗនេះ លោកសាស្រ្តាចារ្យបណ្ឌិត អាំង ជូលៀន សាស្ត្រាចារ្យសាកលវិទ្យាល័យភូមិន្ទវិចិត្រសិល្បៈ លើកឡើងថា បរិយាកាសគ្រួសារ គឺរួមចំណែកក្នុងការជំរុញឱ្យកូនៗមានទម្លាប់ក្នុងការអានសៀវភៅ។
លោកសាស្រ្តាចារ្យមានប្រសាសន៍ថា ដោយសារបរិយាកាសគ្រួសាររបស់លោកជាអ្នកចូលចិត្តអានសៀវភៅ ទើបជំរុញឱ្យលោកមានទម្លាប់អានសៀវភៅ និងឱ្យតម្លៃលើអំណាន។
លោកសាស្រ្តាចារ្យបណ្ឌិត អាំង ជូលៀន
“នៅពេលធំដឹងក្ដីឪពុករបស់ខ្ញុំចូលចិត្តអានភាសាបារាំង ជំរុញឱ្យខ្ញុំចង់អានតាំងពីក្មេង ខិតខំអាន យល់បានបន្តិចបន្តួចរហូតយល់ច្រើន ហើយមិនមែនមកពីទំនោរខ្លួនឯងសុទ្ធសាធទេ គឺបានមកពីបរិយាកាសក្នុងគ្រួសារ”
លោកសាស្រ្តាចារ្យបណ្ឌិត អាំង ជូលៀន ក៏បានឱ្យដឹងដែរថា កាលពីឆ្នាំ២០២២កន្លងទៅ លោកទទួលបានគ្រឿងឥស្សរិយយសសម្រាប់និទាឃរដូវឆ្នាំ២០២២ “The Order of the Rising Sun, Gold Rays with Neck Ribbon” ពីរដ្ឋាភិបាលជប៉ុន ដែលបានជួយជំរុញចំណងមិត្តភាព និងវិស័យវប្បធម៌រវាងប្រទេសជប៉ុន និងប្រទេសកម្ពុជាកាន់តែជឿនលឿនទៅមុខ។
លោកសាស្រ្តាចារ្យបណ្ឌិតមានប្រសាសន៍បញ្ជាក់ថា ការដែលលោកទទួលបានគ្រឿងឥស្សរិយយសនេះ គឺបានមកអំពីការអាន ។ លោកថា លោកមិនធ្លាប់មានឆន្ទៈពង្រឹងចំណងមិត្តភាព និងវិស័យវប្បធម៌អ្វីនោះទេ ព្រោះតែគ្មានតួនាទីជាមន្រ្តីរាជការ ពោលគឺលោកគ្រាន់តែចូលចិត្តអានសៀវភៅអក្សរសាស្រ្តជប៉ុនដោយសារចូលចិត្ត រហូតជប៉ុនគិតថា លោកអាចយល់បានច្រើនពីអក្សរសាស្រ្តរបស់គេ។
លោកសាស្រ្តាចារ្យបណ្ឌិត អាំង ជូលៀន
“ការអានយើងមិនដឹងខ្លួនទេ សម្ពាយវិជ្ជាយើងមិនដឹងខ្លួន វាចូលមកក្នុងខ្លួនយើងម្ដងម៉ាចិបៗ ថ្ងៃណាមួយយើងមានសម្ពាយមួយដោយមិនដឹងខ្លួន”
ជាមួយគ្នាលោកសាស្ត្រាចារ្យ អាំង ជូនលៀន ក៏បានផ្តល់ជាដំបូន្មានដល់ដល់ឪពុកម្ដាយទាំងឡាយត្រូវកម្រិតលើការសិក្សារបស់កូន ដោយរៀបចំឱ្យមានបរិយាកាសអានសៀវភៅនៅក្នុងគ្រួសារ។ លោកបញ្ជាក់ថា ត្បិតកម្ពុជាមានទិវាជាតិអំណាននៅតាមកម្រិត នៅក្រសួង និងសាលារៀន មានបណ្ណាល័យ និងឈានដល់បណ្ណាល័យចល័តកាន់តែច្រើនទៅៗ ប៉ុន្តែបើគិតទំហំប្រទេសទាំងមូល ក៏កម្ពុជានៅតែស្ដួចស្ដើង ដើម្បីជំរុញឱ្យយើងចេះតែខិតខំប្រឹងប្រែងទៅមុខទៀត៕
