នាយកអង្គការចលនាដើម្បីសុខភាពកម្ពុជា លោកវេជ្ជបណ្ឌិត មុំ គង់ មានប្រសាសន៍ថា ការប្រើប្រាស់គ្រឿងស្រវឹងទោះស្ថិតក្នុងអាកាសធាតុក្ដៅ ឬត្រជាក់សុទ្ធតែមានផលប៉ះពាល់ដូចគ្នា។ ជាមួយគ្នាលោកវេជ្ជបណ្ឌិត បានក្រើនរំឮកដល់ប្រជាជន ជាពិសេសយុវជន ត្រូវប្រុងប្រយ័ត្នចំពោះការផឹកគ្រឿងស្រវឹងច្រើនពេកអំឡុងនៃពិធីបុណ្យចូលឆ្នាំថ្មីប្រពៃណីជាតិខ្មែរខាងមុខ។

នាយកអង្គការចលនាដើម្បីសុខភាពកម្ពុជា បញ្ជាក់បន្ថែមថា ការប្រើប្រាស់គ្រឿងស្រវឹង សុទ្ធតែផ្ដល់ផលប៉ះពាលដល់សុខភាព ទោះជាការប្រើប្រាស់គ្រឿងស្រវឹងនោះក្នុងបរិមាណណាមួយក៏ដោយ ។ ទន្ទឹមគ្នានេះ ការប្រើប្រាស់គ្រឿងស្រវឹងក្នុងឱកាសមានបុណ្យទានក៏ប្រឈមគ្រោះថ្នាក់ អំពើហិង្សា ការរំលោភបំពានផ្សេងៗកើតឡើង ដោយសារអ្នកប្រើប្រាស់គ្រឿងស្រវឹងពុំអាចគ្រប់គ្រងស្មារតីខ្លួនបាន។ ពិសេសក្នុងអំឡុងពេលចូលឆ្នាំដែលមានមនុស្សធ្វើដំណើរទៅមកច្រើនគ្រោះថ្នាក់ចរាចរណ៍អាចនឹងកើតឡើង ទាំងមុនចូលឆ្នាំ ពេលចូលឆ្នាំ និងក្រោយចូលឆ្នាំ។

«អ្វីដែលខ្ញុំចង់ឃើញអំឡុងពេលចូលឆ្នាំថ្មី ឬក្នុងឱកាសណាក៏ដោយ សូមបងប្អូនប្រជាពលរដ្ឋខ្មែរដែលប្រើប្រាស់គ្រឿងស្រវឹង សូមប្រើប្រាស់ក្នុងចំនួនតិចដើម្បីមានហានិភ័យតិចដែរ» ។

លោកវេជ្ជបណ្ឌិត មុំ គង់ នាយកអង្គការចលនាដើម្បីសុខភាពកម្ពុជា

នាយកអង្គការចលនាដើម្បីសុខភាពកម្ពុជា បន្ថែមថា​ គ្រឿងស្រវឹង អាចបណ្ដាលឱ្យអ្នកប្រើប្រាស់មានជំងឺ ។ សំដៅលើមនុស្សមួយចំនួនប្រើប្រាស់គ្រឿងស្រវឹងរយៈពេលខ្លីអាចឈឺ ហើយអ្នកខ្លះទៀតប្រើប្រាស់គ្រឿងស្រវឹងរយៈពេលវែងអាចឈឺ ជាពិសេសការប្រើច្រើនជោគជាំ គឺទទួលរងគ្រោះថ្នាក់ធ្ងន់ អាចបណ្ដាលឱ្យស្រ្តូប ខ្យល់គរ ។ល។

លោកវេជ្ជបណ្ឌិត មុំ គង់ បញ្ជាក់ថា ការប្រើប្រាស់គ្រឿងស្រវឹង ក៏អាចបណ្ដលឱ្យកើតមានអំពើហិង្សាផងដែរ ។ យើងដឹងហើយថា នៅពេលប្រើប្រាស់គ្រឿងស្រវឹងវាធ្វើឱ្យអ្នកផឹកគ្រឿងស្រវឹង បាត់ម្ចាស់ការលើខ្លួន​ឯង ហើយប្រសិនបើមានរឿងអ្វីបន្តិចបន្តួចកើតឡើង គឺអាចឈានដល់ការវាយតប់គ្នាជាដើម។ ក្រៅពីអំពើហិង្សា ក៏អាចមានការរំលោភបំពានផ្សេងៗកើតឡើងជាពិសេសចំពោះស្រ្តី និងកុមារ ដែលកើតឡើងដោយសារដៃគូ ឬអ្នកប្រើប្រាស់គ្រឿងស្រវឹងបាត់បង់ការគ្រប់គ្រងខ្លួនឯង។

បើតាមលោកវេជ្ជបណ្ឌិត មុំ គង់ ថ្វីត្បិតតែពន្ធគ្រឿងស្រវឹងនៅកម្ពុជាទាបដែលធ្វើឱ្យតម្លៃគ្រឿងស្រវឹងទាបក៏ដោយ ប៉ុន្តែទោះតម្លៃគ្រឿងស្រវឹងទាប ក៏ប្រជាជន ឬយុវវជន​យកលុយទៅទិញដែរ  ដែលជាការចំណាយទៅលើការទិញគ្រឿងស្រវឹង ជាជាងការចំណាយទៅលើការចាំបាច់មួយចំនួនដូចជា អាហារ ការសិក្សារបស់កូន ។ល។ ដែលនាំឱ្យមានភាពក្រីក្រ។ ជាពិសេស នៅពេលយើងប្រើប្រាស់គ្រឿងស្រវឹង គឺមិនអាចធ្វើកិច្ចការងារបានល្អនោះទេ ដែលធ្វើឱ្យបាត់បង់ប្រាក់ចំណូលផងដែរ។

គួរ​ជំរាបជូនដែរថា នៅ​ក្នុងសេចក្តីជូនដំណឹង​ពីការ​ថែទាំសុខភាពនៅកំឡុងនៃពិធីបុណ្យចូលឆ្នាំថ្មី​ប្រពៃណីជាតិខ្មែរ ក្រសួងសុខភិបាល ក៏បានព្រមាន និង​ណែនាំ​ឱ្យ​ប្រជាពលរដ្ឋមានការប្រុងប្រយ័ត្នការពារសុខភាពក្នុងអំឡុងពេលអាកាសធាតុក្ដៅ ដូចជា ចៀសវាងការពិសាជាតិអាល់កុល (មាននៅក្នុងស្រា) កាហ្វេ ភេសជ្ជៈដែលមានជាតិកាហ្វេអ៊ីន ជាតិស្ករច្រើន ជាតិអំបិលច្រើន ពីព្រោះធ្វើឱ្យជាតិទឹកនៅក្នុងរាងកាយថយចុះ៕