ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមទិន្នន័យរបស់នាយកដ្ឋាននគរបាលចរាចរណ៍ផ្លូវគោក និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានឱ្យដឹងថា អំឡុងពេល៤ថ្ងៃ នៃពិធីបុណ្យចូលឆ្នាំថ្មីប្រពៃណីខ្មែរ ពោលគឺពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ មានករណីគ្រោះថ្នាក់ចរាចរណ៍កើតឡើងសរុបចំនួន ៦០ករណី ដោយបណ្តាលឱ្យមនុស្សស្លាប់សរុបចំនួន ៣៩នាក់ និងរបួសធ្ងន់ស្រាលចំនួន ៩៦នាក់ ក្នុងនោះមូលហេតុដែលបណ្តាលឱ្យមានគ្រោះថ្នាក់ចរាចរណ៍ច្រើនជាងគេ គឺមិនគោរពសិទ្ធិ និងល្មើសល្បឿនកំណត់។
របាយការណ៍បានបង្ហាញថា មូលហេតុដែលបណ្តាលឱ្យកើតមានគ្រោះថ្នាក់ចរាចរណ៍ទាំង៦០ករណីនោះ មាន ល្មើសល្បឿនចំនួន ២២ករណី, មិនគោរពសិទ្ធិចំនួន ២៥ករណី, មិនប្រកាន់ស្តាំ ៤ករណី, ជែង ៣ករណី, បត់គ្រោះថ្នាក់ ១ករណី, ស្រវឹង ៤ករណី និងកត្តាយានយន្ត ១ករណី។
លោក គឹម បញ្ញា នាយកប្រចាំប្រទេស នៃអង្គការមូលនិធិបង្ការរបួសអាស៊ី មានប្រសាសន៍ថា តួរលេខនៃគ្រោះថ្នាក់ចរាចរណ៍អំឡុងពិធីបុណ្យចូលឆ្នាំនេះ គឺជាតួលេខខ្ពស់, លោកកត់សម្គាល់ថា ចាប់តាំងពីដើមឆ្នាំ២០២៤មក ឃើញថា ចំនួនគ្រោះថ្នាក់ចរាចរណ៍នៅកម្ពុជាចាប់ផ្តើមកើន បើធៀបនឹងឆ្នាំមុនៗ។
ជាដំណោះស្រាយដើម្បីកាត់បន្ថយគ្រោះថ្នាក់ចរាចរណ៍ក្នុងអំឡុងពិធីបុណ្យធំៗម្តងៗ លោក គឹម បញ្ញា លើកតឹកចិត្តឱ្យមានការរឹតបន្តឹងការអនុវត្តច្បាប់ ដោយថា ការមិនរឹតបន្តឹងការអនុវត្តច្បាប់ នឹងនាំឱ្យប្រជាពលរដ្ឋមានឥរិយាបទធ្វេសប្រហែសនៅក្នុងការបញ្ជាយានយន្តនៅពេលធ្វើដំណើរ, លោកបន្តថា ឥរិយាបទធ្វេសប្រហែសនៅក្នុងការបញ្ជាយានយន្តដូចជាការបើកបរលើសល្បឿនកំណត់ ការពិសារគ្រឿងស្រវឹងពេលបើកបរ ការមិនពាក់ខ្សែក្រវ៉ាត់ មិនពាក់មួកសុវត្ថិភាព មិនត្រឹមតែបង្កគ្រោះថ្នាក់ និងបង្កផលប៉ះពាល់តែឯងប៉ុណ្ណោះទេ តែវាក៏បង្កផលប៉ះពាល់ដល់អ្នកដទៃដែលធ្វើដំណើរតាមដងផ្លូវជាមួយ រហូតដល់បង្កជាសោកនាដកម្មទៅដល់ក្រុមគ្រួសារទៀត។
បន្ថែមលើនេះ បើតាមលោក គឹម បញ្ញា អាជ្ញាធរគួរមានវិធានការបន្ថែមដូចជាការផ្សព្វផ្សាយពីការបង្ការគ្រោះថ្នាក់ចរាចរណ៍នៅតាមទីវត្តអារាម អំឡុងពេលប្រជាពលរដ្ឋទៅចូលរួមពិធីសាសនា ការចងបដារពាក្យស្លោក ដើម្បីជាការក្រើនរំលឹកឱ្យបានជាប់ជាប្រចាំ។
តាមរបាយការណ៍របស់នាយកដ្ឋាននគរបាលចរាចរណ៍ផ្លូវគោក នៅថ្ងៃទី១ នៃពិធីបុណ្យចូលឆ្នាំខ្មែរ គឺថ្ងៃទី១៣ ខែមេសា គ្រោះថ្នាក់ចរាចរណ៍បានកើតឡើងសរុបចំនួន ១៣លើក ដោយបណ្តាលឱ្យមនុស្ស ស្លាប់ ១៣នាក់ និងរងរបួស ៣០នាក់ (របួសធ្ងន់ ១៩នាក់ រងរបួសស្រាល ១១នាក់)។ ថ្ងៃទី២ នៃពិធីបុណ្យចូលឆ្នាំ គឺថ្ងៃទី១៤ ខែមេសា គ្រោះថ្នាក់ចរាចរណ៍បានកើតឡើងចំនួន ១៧លើក បណ្តាលឱ្យមនុស្ស ស្លាប់ ០៨នាក់, រងរបួសសរុប ២៨នាក់ (របួសធ្ងន់ ១៤នាក់, រងរបួសស្រាល ១៤នាក់) ។ ថ្ងៃទី៣ នៃពិធីបុណ្យចូលឆ្នាំ គឺថ្ងៃទី១៥ ខែមេសា គ្រោះថ្នាក់ចរាចរណ៍បានកើតឡើងចំនួន ១៨លើក បណ្តាលឱ្យមនុស្សស្លាប់ ១១នាក់ របួសសរុប ២៤នាក់ (របួសធ្ងន់ ១៧នាក់, របួសស្រាល ៧នាក់) និងថ្ងៃទី៤ ដែលជាថ្ងៃបញ្ចប់នៃពិធីបុណ្យចូលឆ្នាំ គឺថ្ងៃទី១៦ ខែមេសា គ្រោះថ្នាក់ចរាចរណ៍បានកើតឡើងសរុបចំនួន ១២លើក បណ្តាលឱ្យមនុស្សស្លាប់ ៧នាក់ រងរបួស ១៤នាក់ (របួសធ្ងន់៩នាក់, របួសស្រាល ៥នាក់)៕
