ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោក តែ ឡាយ ប្រធាននាយកអប់រំ នៃបណ្តាញគ្រឹះស្ថានអប់រំ វេសឡាញ គ្រុបបានលើកឡើងថា អំណានពិតជាមានសារៈសំខាន់ ដូច្នេះការបណ្តុះទម្លាប់នៃការអាន ក៏ដូចជាបង្កើតវប្បធម៌នៅក្នុងការអានដល់សិស្សានុសិស្ស គឺជាការជួយឱ្យពួកគេមានសមត្ថភាពនៅក្នុងការស្រាវជ្រាវ ការសិក្សា ជាពិសេសពង្រឹងសមត្ថភាពរបស់ពួកគេទៅថ្ងៃអនាគតប្រកបដោយប្រសិទ្ធភាព។
បើតាមលោក តែ ឡាយ ជាទូទៅមនុស្សគ្រប់រូបតែងតែអាននៅក្នុងគោលបំណងផ្សេងៗគ្នា ហើយសម្រាប់ប្រទេសកម្ពុជា លោកមើលឃើញថា និន្នាការនៃការអាន គឺមានការកើនឡើង ប៉ុន្តែនៅមិនទាន់បានគ្រប់គ្នានៅឡើយទេ។ លោកថា បណ្តាញសាលារៀនវេសឡាញ ដែលមានសាលារៀនវេសឡាញ និងន័ស្សឡាញ ក្រៅពីកម្មវិធីសិក្សាផ្ទាល់ជាមួយលោកគ្រូអ្នកគ្រូក្នុងកាលវិភាគ សាលាក៏មានកម្មវិធីដើម្បីជំរុញ លើកទឹកចិត្ត និងលើកកម្ពស់ទៅដល់ការអានសម្រាប់សិស្សានុសិស្ស ដូចជាកម្មវិធី ” អ្នកអានអនាមិក ” ដែលសាលាអញ្ជើញមាតាបិតា ឬអ្នកអាណាព្យាបាលសិស្សមកអាន ដើម្បីឱ្យកុមារបានស្តាប់ ក៏ដូចជាបង្កើននូវភាពស្និទ្ធស្នាល ឬក៏បង្កើតជាទម្លាប់ និងជាគំរូមួយទៅដល់កូនៗឱ្យមានចំណង់ចំណូលចិត្តនៅក្នុងការអាន និងភាពស្និទ្ធស្នាលជាមួយនឹងឪពុក ឬម្តាយ ឬជាមួយអ្នកអាណាព្យាបាល។
ក្រៅពីនោះ សាលាក៏មានកម្មវិធីមួយទៀតសម្រាប់សិស្សានុសិស្សដែលរៀននៅថ្នាក់រៀនខ្ពស់ៗ ដោយពួកគេអាចបង្កើតជាក្លឹបសម្រាប់ការអានជាមួយគ្នា ហើយគេអាចធ្វើជាការសង្ខេបនៃអំណានរបស់ខ្លួនដាក់ជូនលោកគ្រូអ្នកគ្រូ ឬក៏ធ្វើជាបទបង្ហាញជាការស្រាវជ្រាវ ។ ហើយជាមួយគ្នា សាលាក៏មានរៀបចំជាកម្មវិធីក្លឹបតស៊ូមតិ ដែលនិយាយអំពីសារប្រយោជន៍នៃការអានផងដែរ។
ក្នុងការចូលរួមលើកកម្ពស់ការអាន នៅថ្នាក់បឋមសិក្សា សាលាក៏បានចូលរួមជាមួយក្រសួងអប់រំ យុវជន និងកីឡា ក្នុងការបណ្តុះបណ្តាលលោកគ្រូអ្នកគ្រូពីថ្នាក់ទី១ ដល់ថ្នាក់ទី៣ ទៅលើវិធីសាស្រ្តអំណានថ្នាក់ដំបូង ដើម្បីឱ្យលោកគ្រូអ្នកគ្រូមានសមត្ថភាពនៅក្នុងការបង្ហាត់អំណាន ធ្វើយ៉ាងណាឱ្យក្មួយៗសិស្សានុសិស្សនៅថ្នាក់ទី១ ដល់ទី៣ គាត់អាចអានបាន មានសមត្ថភាពនៅក្នុងការអាន ដើម្បីឡើងទៅថ្នាក់បន្ទាប់ ដែលនេះជាផ្នែកមួយជួយនៅក្នុងការកាត់បន្ថយអត្រាសិស្សបោះបង់ការសិក្សា។
យ៉ាងណាក៏ដោយ បើទោះបីជាសាលារៀនមានកម្មវិធីក្នុងការជំរុញអំណានទៅដល់សិស្សានុសិស្សក៏ដោយ ប៉ុន្តែមាតាបិតា ក៏មានតួនាទីសំខាន់ក្នុងការជំរុញការអាននេះ តាមរយៈការធ្វើជាគំរូទៅដល់បុត្រធីតា។ តាមប្រសាសន៍របស់លោក តែ ឡាយ មាតាបិតា និងកូនៗ គួរតែរៀនអានជាមួយគ្នាដើម្បីបង្កើតនូវបរិយាកាស ភាពស្និទ្ធស្នាលនៃការអានជាមួយគ្នា ក្នុងន័យដើម្បីបណ្តុះនូវទម្លាប់របស់កូនៗនៅក្នុងការអានឱ្យបានពេញមួយជីវិត។ «នៅផ្ទះ បើយើងកាន់ទូរស័ព្ទ ហើយឱ្យកូនរបស់អានសៀវភៅ ប្រាកដជាកូនមិនអានទេ អញ្ចឹងមាតាបិតា និងកូនៗ គួរតែរៀនអានជាមួយគ្នាដើម្បីបង្កើតនូវបរិយាកាស ភាពស្និទ្ធស្នាលនៃការអានជាមួយគ្នា …»៕
