សន្និសីទនៃការបង្រៀនថ្នាក់ជាតិ (NTC) ក្រោមមូលបទ៖ «ការរួមបញ្ចូលឌីជីថល និងបច្ចេកវិទ្យា៖ ឧបករណ៍ក្នុងការកែទម្រង់ការអប់រំ»  ដើម្បីពង្រឹងគុណភាពអប់រំនៅក្នុងប្រទេសកម្ពុជា បានចាប់ផ្តើម​ហើយ ដោយនឹងប្រព្រឹត្តទៅរយៈពេល២ថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែសីហា ឆ្នាំ២០២៤ ដោយមានអ្នកអប់រំ អ្នកគ្រប់គ្រង អ្នកដឹកនាំគំនិត និងនិស្សិត ជាង ១៥០០នាក់ចូករួម នៅវិទ្យាស្ថានបច្ចេកវិទ្យាកម្ពុជា។

សន្និសីទនៃការបង្រៀនថ្នាក់ជាតិ (NTC) ផ្តល់ជូនអ្នកអប់រំនូវជំនាញ ចំណេះដឹង និងធនធានដែលត្រូវការដើម្បីណែនាំ និងដឹកនាំសិស្សានុសិស្សរបស់ពួកគេឆ្ពោះទៅរកភាពជោគជ័យ នៅក្នុងពិភពលោកដែលពោរពេញទៅការប្រាស្រ័យទាក់ទងគ្នាយ៉ាងស្អិតរមួតជាមួយនឹងដោយបច្ចេកវិទ្យា។ លើសពីនេះ ក៏ផ្តោតលើការធ្វើឱ្យទំនើបកម្មនៃវិធីសាស្រ្តបង្រៀន ការបង្កើតបរិយាកាសសិក្សាប្រកបដោយបរិយាបន្នសម្រាប់សិស្សានុសិស្ស និងរួមបញ្ចូល និងដោះស្រាយបញ្ហាប្រឈម និងដំណោះស្រាយនៅក្នុងវិស័យអប់រំនៅងកម្ពុជា។

អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. អេឌ្យូខេសិន មានប្រសាសន៍ថា អ្នកអប់រំដើរតួនាទីសំខាន់ក្នុងការកសាងអនាគតរបស់ប្រទេសជាតិ និងទទួលបានការយកចិត្តទុកដាក់ពីរដ្ឋាភិបាលកម្ពុជាក្នុងការលើកកម្ពស់ស្តង់ដានៃការអប់រំអប់រំ។ អ្នកឧកញ៉ា បន្តថា សន្និសីទលើកដំបូងនេះ ដើរតួជាវេទិកាបណ្តាញដ៏សំខាន់មួយ ដែលអនុញ្ញាតឱ្យអ្នកអប់រំ ជាពិសេសលោកគ្រូ អ្នកគ្រូ ភ្ជាប់ទំនាក់ទំនងជាមួយមិត្តភក្ដិ ចែករំលែកការអនុវត្តល្អបំផុត និងសហការលើគំនិតផ្តួចផ្តើមនាពេលអនាគត។

សម្រាប់ ឯកឧត្តមបណ្ឌិត អ៊ុម រម្យណី រដ្ឋលេខាធិការ នៃក្រសួងអប់រំ យុវជន និងកីឡា មានប្រសាសន៍ដែរថា ឌីជីថលនិងបច្ចេកវិទ្យា ការប្រើប្រាស់បញ្ញាសិប្បនិម្មិត (AI) និងស្ទេម (STEM) ដើរតួនាទីសំខាន់នៅក្នុងថ្នាក់រៀនទំនើប ដើម្បីបង្កើនបទពិសោធសិក្សារបស់សិស្សានុសិស្ស។ ឯកឧត្តមបណ្ឌិតបន្តថា ការអប់រំមានគុណភាព គឺចាំបាច់ត្រូវបណ្ដុះឱ្យមានធនធានគ្រូបង្រៀនដែលមានគុណភាព និងគណៈគ្រប់គ្រងសាលាដែលមានទិសដៅច្បាស់លាស់ទាំងវិស័យសាធារណៈ និងឯកជន។

ជាមួយគ្នានេះ ឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា ក៏បានលើកឡើងដែរថា គ្រូបង្រៀនពិតជាដើរតួនាទីសំខាន់ក្នុងការផ្តល់ការអប់រំដ៏មានតម្លៃបំផុតដើម្បីដឹកនាំសិស្សានុសិស្សទៅកាន់អនាគតដ៏ត្រចះត្រចង់។ ទន្ទឹមគ្នានេះ គ្រូបង្រៀនជាបុគ្គលដែលអស្ចារ្យ និងជាអ្នកជំរុញឱ្យក្ដីស្រមៃរបស់សិស្សានុសិស្សទទួលបានជោគជ័យ។

គួរជម្រាបជូនថា សន្និសីទនៃការបង្រៀនថ្នាក់ជាតិ (NTC) នេះ ផ្តោតសំខាន់លើតួនាទីដ៏សំខាន់នៃបដិវត្តកម្មឌីជីថលនៃការអប់រំ។ ក្នុងកម្មវិធីនេះ ក៏មានការបង្ហាញអំពីបច្ចេកវិទ្យាដ៏ពេញនិយមមួយចំនួនដែលកំពុងតែផ្លាស់ប្តូរវិធីសាស្រ្តបង្រៀនបែបប្រពៃណីដូចជា ការអប់រំតាមរយៈបញ្ញាសិប្បនិម្មិត (AI) ការសិក្សាបែបឯករាជ្យ ប្រព័ន្ធគ្រប់គ្រងថ្នាក់រៀន (LMS) តាមរយៈ Moodle និង Canvas ដែល។ នវានុវត្តន៍ទាំងនេះអាចឱ្យអ្នកអប់រំបង្កើតបរិយាកាសសិក្សាប្រកបដោយភាពរស់រវើក និងធ្វើឱ្យការអប់រំកាន់តែមានបរិយាបន្ន។ តាមរយៈការរួមបញ្ចូលឧបករណ៍ទាំងនេះ អ្នកអប់រំបង្កើនការចូលរួមរបស់សិស្សានុសិស្សនៅក្នុងថ្នាក់រៀន ពង្រឹងបទពិសោធសិក្សាផ្ទាល់ខ្លួន និងបង្កើតបរិយាកាសនៅក្នុងថ្នាក់រៀនឱ្យបានតែប្រសើរ និងសកម្មជាងមុន។

ភាពលេចធ្លោមួយទៀត នៃសន្និសីទនៃការបង្រៀនថ្នាក់ជាតិ (NTC) គឺការទស្សនាស្តង់ពិព័រណ៍របស់អ្នកឧបត្ថម្ភកម្មវិធី ដែលបង្ហាញពីបច្ចេកវិទ្យា និងធនធានអប់រំចុងក្រោយបង្អស់របស់ក្រុមហ៊ុន និងស្ថាប័នរបស់ពួកគេក្នុងការផ្តល់បទពិសោធអប់រំឈានមុខគេនៅក្នុងប្រទេស ជាពិសេសការប្រើប្រាស់បច្ចេកវិទ្យានៅក្នុងកម្មវិធីសិក្សា។ នៅក្នុងនោះ អ្នកអប់រំក៏នឹងបានស្វែងយល់បន្ថែមពីការប្រើប្រាស់បច្ចេកវិទ្យា និងឌីជីថលពីអ្នកឧបត្ថម្ភកម្មវិធីមកពីគ្រប់វិស័យ រួមមាន វិស័យអប់រំ គ្រឹះស្ថានបោះពុម្ព ចំណីអាហារ ឌីជីថល និងបច្ចេកវិទ្យា ដឹកជញ្ជូន ធនាគារ និងហិរញ្ញវត្ថុ និងច្រើនទៀត៕