ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារបន្តសម្រាប់ឆ្នាំ២០២៥ របស់ក្រសួងដែនដី នគរូបនីយកម្ម និងសំណង់ កាលពីថ្ងៃទី២៥ ខែវិច្ឆិកា ឯកឧត្តម ប្រាក់ អង្គារ៉ា អគ្គនាយក នៃអគ្គនាយកដ្ឋានលំនៅឋាន បានលើកឡើងថា ចំពោះការងារអាទិភាព នៃការងារលំនៅឋានរបស់អគ្គនាយកដ្ឋានលំនៅឋាន គឺការរៀបចំលំនៅឋានជាទ្រនំសុភមង្គល ភូមិឋានក្សេមក្សាន្ត និងបុរីជនបទ។
ឯកឧត្តម ប្រាក់ អង្គារ៉ា មានប្រសាសន៍ថា ស្ថាបត្យកម្ម និងនគរូបនីយកម្ម ជាធាតុដ៏សំខាន់ដែលផ្សារភ្ជាប់ជាមួយ លំនៅឋានជាទ្រនំសុភមង្គល ភូមិឋានក្សេមក្សាន្ត និងបុរីជនបទ គឺជាការរចនា ឬការរៀបចំតំបន់មួយសម្រាប់ការរស់ប្រកបដោយចីរភាព ដែលមានគោលបំណងបង្កើតបរិយាកាសរស់នៅសម្រាប់ប្រជាជនជាច្រើនជំនាន់ ដោយផ្ដោតលើសុខុមាលភាព សុខសាន្ត និងអភិរក្សបរិយាកាសធម្មជាតិ។
តើអ្វីទៅជាលំនៅឋានជាទ្រនំសុភមង្គល ភូមិឋានក្សេមក្សាន្ត និងបុរីជនបទ?
អគ្គនាយក នៃអគ្គនាយកដ្ឋានលំនៅឋាន បញ្ជាក់ថា លំនៅឋានជាទ្រនំសុភមង្គល ភូមិឋានក្សេមក្សាន្ត និងបុរីជនបទ គឺជាកត្តាចាំបាច់សម្រាប់ការរស់នៅប្រកបដោយសុខុមាលភាព និងជាដំណោះស្រាយប្រកបដោយនិរន្តរភាពសម្រាប់សង្គម។ ក្នុងនោះ លំនៅឋានជាទ្រនំសុភមង្គល (House of Happiness) គឺផ្តោតទៅលើការរៀបចំផ្ទះដោយគិតគូរដល់មនុស្សចាស់ (ឪពុកមា្តយ គ្រួសារ) សុខមាលភាពផ្លូវចិត្ត ទំនាក់ទំនងរវាងឪពុកមា្តយ និងកូន ការរស់នៅជួបជុំគ្រួសារក្រោមដំបូលផ្ទះតែមួយ តាមទំនៀមទំលាប់ខ្មែរ និងបំណិនជីវិត, ភូមិឋានក្សេមក្សាន្ត (Village of Peacefulness) គឺការពង្រឹងការអនុវត្តនូវគោលនយោបាយ ភូមិ ឃុំ សង្កាត់មានសុវត្ថិភាព ភាពស៊ីវីល័យ (ប្រជាជនដែលស្គាល់ពីខ្លួនឯង និងប្រកបដោយបញ្ញាវន្តភាព ស្គាល់ពីពិភពលោក មិនរើសអើង) និង បុរីជនបទ (Rural Community/Rural Borei) គឺជាការគិតគូរពីកញ្ចប់ហេដ្ឋារចនាសម្ព័ន្ធ (មនុស្ស ផ្លូវ ទឹក ភ្លើង បច្ចេកវិទ្យា) ផែនការគ្រប់គ្រង និងការកំណត់ការប្រើប្រាស់ដី និងការបង្កើនតម្លៃសេដ្ឋកិច្ច។
“តាមរយៈការរចនាលំនៅឋានប្រកបដោយនិរន្តរភាព ការគ្រប់គ្រងធនធានដោយការយកចិត្តទុកដាក់ និងការរួមគ្នារបស់សហគមន៍ ជាជំហានដ៏សំខាន់ដែលបង្កើតបានជាភូមិឋានដែលសំបូរទៅដោយសុខុមាលភាព និងសុវត្ថិភាព…”
ដោយឡែកដើម្បីឱ្យលំនៅឋានក្លាយជាទ្រនំសុភមង្គល ក្លាយជាភូមិឋានក្សេមក្សាន្ត និងបុរីជនបទ បើតាម ឯកឧត្តម ប្រាក់ អង្គារ៉ា គឺមានដូចជា សម្រាប់ លំនៅឋានទ្រនំសុភមង្គល ទី១.សុវត្ថិភាពនៃការកាន់កាប់ផ្ទះ និងដីធ្លី, ទី២.ការរចនាផ្ដោតលើតួផ្ទះ, ទី៣.ជីវភាពរស់នៅសមរម្យ, ទី៤.បរិយាកាសរីករាយក្នុងគ្រួសារ និងអ្នកជិតខាង, ទី៥.គេហសេវា និង ទី៦.សន្តិសុខ និងសុវត្ថិភាព។ សម្រាប់ ភូមិដ្ឋានក្សេមក្សាន្ត រួមមាន ទី១.លំហបៃតង និងសួនសាធារណៈ, ទី២.ហេដ្ឋារចនាសម្ព័ន្ធរូបវ័ន្ត និងសង្គម, ទី៣.បរិស្ថាន និងការគ្រប់គ្រងកាកសំណល់, ទី៤.មុខរបរ និងការងារ, ទី៥.បច្ចេកវិទ្យា និងសេវាឆ្លាតវៃ, ទី៦.ការអប់រំ បណ្ដុះបណ្ដាល និងការផ្សព្វផ្សាយ, ទី៧.សមភាព និងសមធម៌ និង ទី៨.សន្តិសុខ និងសុវត្ថិភាព។ ចំណែក បុរីជនបទ រួមមាន ទី១.មនុស្ស, ទី២.លំនៅឋាន, ទី៣.ហេដ្ឋារចនាសម្ព័ន្ធ និងសង្គម, ទី៤.បរិស្ថាន និងអនាម័យ, ទី៥.បច្ចេកវិទ្យា និងទូរគមនាគមន៍ និង ទី៦.សន្តិសុខ និងសុវត្ថិភាព។
គួរជម្រាបជូនថា ការគាំទ្រពីសំណាក់រដ្ឋាភិបាលតាមរយៈគោលនយោបាយច្បាស់លាស់ និងច្បាប់ការពារធនធានធម្មជាតិ អាចជួយជំរុញសុភមង្គលរបស់សហគមន៍ និងអភិវឌ្ឍន៍យុទ្ធសាស្រ្ត ដើម្បីបង្កើតភូមិឋានក្សេមក្សាន្តដែលមានការរីកចម្រើន និងសុខុមាលភាពជារៀងរហូត៕
