ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមរយៈការធ្វើកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិចាប់តាំងពីឆ្នាំ២០១៤មក គុណភាពអប់រំនៅកម្ពុជាត្រូវបានពង្រឹង ហើយរយៈកាលចុងក្រោយនេះ ចំនួនសិស្សដែលទទួលបាននិទ្ទេស A មានការកើនឡើងពីមួយឆ្នាំទៅមួយ រហូតដល់ទៅជាង២ពាន់នាក់កាលពីឆ្នាំ២០២៤។
ជាការកត់សម្គាល់អាជីពគ្រូបង្រៀនកាលពីមុន មិនសូវមានការចាប់អារម្មណ៍នោះទេ ប៉ុន្តែបច្ចុប្បន្ននេះ សិស្សដែលមាននិទ្ទេស A B និង C ប្រមាណជា ៧៥ភាគរយ បានចូលបម្រើការងារជាគ្រូបង្រៀន។ ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា កំណែទម្រង់វិស័យអប់រំក្នុងរយៈពេល១២ឆ្នាំមកនេះ បានទាក់ទាញអ្នកដែលមានសមត្ថភាពចូលធ្វើជាគ្រូបង្រៀន ហើយក្រសួងក៏កំពុងអនុវត្តនូវកំណែទម្រង់គ្រឹះស្ថានបណ្តុះបណ្តាលគ្រូ ដើម្បីអាចបណ្តុះបណ្តាលគ្រូឱ្យមានសមត្ថភាពក្នុងសតវត្សរ៍ទី២១។
ឯកឧត្តមរដ្ឋមន្រ្តីមានប្រសាសន៍បញ្ជាក់ថា យុវជនរបស់យើងនាពេលបច្ចុប្បន្ននេះ គឺមានសមត្ថភាពប្រសើរជាងមុន ហើយស្ថានភាពសាលារៀនវិញ កម្ពុជាមានសាលារៀនគំរូ ដោយក្រសួងមានគោលដៅរៀបចំឱ្យមានការសាលារៀនគំរូពី៥០០ ទៅ១០០០សាលា រហូតដល់ឆ្នាំ២០២៨។ ជាមួយគ្នានេះ ឯកឧត្តមរដ្ឋមន្រ្តីក៏បានរំលេចឱ្យឃើញពីគុណភាពសាលារៀនជំនាន់ថ្មី ដែលមកទល់បច្ចុប្បន្នមានចំនួន ១៤សាលា ជាសាលារៀនដែលផ្តល់នូវការអប់រំមានគុណភាព ប្រហាក់ប្រហែលទៅនឹងសាលារៀនរដ្ឋនៅប្រទេសសឹង្ហបុរីដែរ។
“ខ្ញុំសូមជំរាបជូនប្រកបដោយមោទនៈថា វិទ្យាល័យព្រះស៊ីសុវត្ថិសាលារៀនជំនាន់ថ្មី ជាគុណភាពសិស្ស គឺប្រហាក់ប្រហែលទៅនឹងសិស្សសាលារដ្ឋនៅសឹង្ហបុរីដែរ”
ឯកឧត្តម ហង់ជួន ណារ៉ុន ក៏បានគូសបញ្ជាក់ដែរថា ដើម្បីឱ្យការអប់រំនៅកម្ពុជាកាន់តែមានគុណភាព ក្រសួងអប់រំ បានដាក់ចេញកំណែទម្រង់វិស័យអប់រំ ទាំងនៅថ្នាក់កណ្ដាល ការពង្រឹង ការធ្វើអធិការកិច្ច ការរៀបចំឡើងវិញកម្មវិធីសិក្សា សៀវភៅសិក្សាគោលពិនិត្យឡើងវិញ ក៏ដូចជាការអនុវត្ដនូវគោលនយោបាយ គ្រូបង្រៀនផងដែរ៕
