ប្រតិភូយុវជនកម្ពុជា១៦ នឹងចូលរួមកម្មវិធីនាវាយុវជនអាស៊ីអាគ្នេយ៍និងជប៉ុន (SSEAYP) លើកទី៤៩ ដែលគ្រោងនឹងប្រព្រឹត្តទៅចាប់ពីថ្ងៃទី១៥ ខែមករា ដល់ថ្ងៃទី១៧ ខែកុម្ភៈ ឆ្នាំ២០២៦ នៅប្រទេសជប៉ុន។

ក្នុងជំនួបសម្តែងការគួរសម និងសំណេះសំណាលជាមួយប្រតិភូយុវជន នៃសមាគមនាវាយុវជនអាស៊ីអាគ្នេយ៍ (កម្ពុជា) កាលពីពេលថ្មីៗនេះ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានអបអរសាទរដល់យុវជនទាំងអស់ ដែលបានជាប់ជាយុវជនតំណាងកម្ពុជាក្នុងដំណើរការចូលរួមកម្មវិធីនាវាយុវជនអាស៊ីអាគ្នេយ៍ និងជប៉ុន លើកទី៤៩។ ជាមួយគ្នានេះ ឯកឧត្តមរដ្ឋមន្រ្តីក៏​បានចែករំលែកចំណេះដឹង និងបទពិសោធល្អៗ ក្នុងនាមភាពជាអ្នកតំណាងកម្ពុជា ដោយផ្អែកលើការតាំងចិត្ត សមត្ថភាពពិតប្រាកដ និងភាពច្បាស់លាស់ជាអ្នកតំណាងប្រទេស។

ឯកឧត្តម ហ៊ុន ម៉ានី លើកទឹកចិត្តឱ្យប្អូនៗយុវជនទាំងអស់ ចាប់យកឱកាសនេះ ដើម្បីបង្ហាញនូវសក្តានុពលរបស់កម្ពុជា ក៏ដូចជាទាញយកនូវបទពិសោធផ្សេងៗទៀត ដើម្បីចូលរួមបន្តអភិវឌ្ឍន៍ប្រទេសជាតិតាមចំណេះជំនាញរៀងៗខ្លួន។

លោក អ៊ួន បឋម ហៅ សាយ (SAI) ​ប្រធាន​ប្រតិភូយុវជន​កម្ពុជា នៃកម្មវិធីនាវាយុវជនអាស៊ីអាគ្នេហ៍ និងជប៉ុន (SSEAYP) លើកទី៤៩ លើកឡើងថា នេះជាកិត្តិយសដែលលោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន បានផ្ដល់ទំនុកចិត្តដល់រូបលោកជាប់ជាប្រធានប្រតិភូដឹកនាំយុវជនទាំង ១៦រូបទៅចូលរួមកម្មវិធីនាវាយុវជនអាស៊ីអាគ្នេយ៍និងជប៉ុន (SSEAYP) លើកទី៤៩ នៅប្រទេសជប៉ុន នាដើម​ឆ្នាំ២០២៦ខាងមុខនេះ។

លោក សាយ បន្តថា រូបលោកក៏ធ្លាប់ជាប់ជា​ប្រតិភូយុវជន​កម្ពុជា នៃកម្មវិធីនាវាយុវជនអាស៊ីអាគ្នេហ៍និងជប៉ុន (SSEAYP) លើកទី៣៧ កាលពីឆ្នាំ២០១០ ដែលពីមុនមានរយៈពេល ៥២ថ្ងៃ ប៉ុន្តែបច្ចុប្បន្ននៅសល់ត្រឹម ៣២ថ្ងៃ។ ​លោក សាយ និយាយថា លោកមានមោទនភាព មានអារម្មណ៍រំភើប និងសប្បាយរីករាយ ក្នុងការចូលរួមជួបជាមួយយុវជនបណ្ដាប្រទេសអាស៊ាន និងយុវជនមកពីប្រទេសជប៉ុន។

ប្រធាន​ប្រតិភូយុវជន​កម្ពុជា បន្ថែមថា កម្មវិធីនាវាយុវជនអាស៊ីអាគ្នេហ៍ និង​ជប៉ុន គឺជាកម្មវិធីផ្លាស់ប្ដូរបទពិសោធន៍ ផ្លាស់ប្ដូរវប្បធម៌ និងចំណេះដឹងរវាងយុវជនបណ្ដាប្រទេសអាស៊ាន និងប្រទេសជប៉ុន ដោយឡែកកម្ពុជាក៏បានត្រៀមខ្លួនយកនូវវប្បធម៌របស់ខ្លួន បទពិសោធន៍ ចំណេះដឹង និងការអនុវត្តផ្ទាល់របស់យុវជនកំពុងមានក្នុងពេលបច្ចុប្បន្ន ដើម្បីយកទៅបង្ហាញក្នុងកម្មវិធី និងដើម្បីយកទៅផ្លាស់ប្ដូរគ្នានៅក្នុងកម្មវិធី SSEAYP ទាំងនៅក្នុងប្រទេសជប៉ុន និងនៅលើកប៉ាល់ជប៉ុន។

“ខ្ញុំផ្ទាល់គិតថានឹងអាចមានឱកាសចែករំលែកនូវបទពិសោធន៍ក្នុងចំណេះជំនាញផ្ទាល់ខ្លួនដែលធ្វើទៅលើវិស័យចម្រៀង វិស័យសិល្បៈ”

លោក សាយ លើកឡើងទៀតថា ក្នុងតួនាទីជាប្រធានប្រតិភូដឹកនាំយុវជន លោកនឹងមើលថែប្រតិភូយុវជនកម្ពុជាទាំង ១៦រូប ដើម្បីឱ្យពួកគាត់បានចូលរួមក្នុងកម្មវិធីនេះ ដោយសុវត្ថិភាព និងគោរពតាមលក្ខន្តិកៈ និងវិន័យរបស់កម្មវិធីទាំងមូល ជាពិសេស ការបង្កើតមិត្តភាពថ្មីជាមួយយុវជនអាស៊ានទាំង​១១ប្រទេស និងយុវជនមកពីប្រទេសជប៉ុន។

គួរជំរាបជូនថា កម្មវិធីនាវាយុវជនអាស៊ីអាគ្នេយ៍ និងជប៉ុន បង្កើតឡើងក្នុងគោលបំណងបំផុស និងពង្រឹងមិត្ដភាព សាមគ្គីភាព និងការយោគយល់គ្នាទៅវិញទៅមករវាងយុវជនប្រទេសអាស៊ាន និងយុវជនប្រទេសជប៉ុន ហើយក៏ជាការពង្រីកនូវទស្សនវិស័យលើឆាកអន្ដរជាតិ និងដើម្បីបណ្ដុះបណ្ដាលគំនិតសហប្រតិបត្ដិការអន្ដរជាតិ ដោយផ្តល់ឱកាសឱ្យយុវជនទាំងអស់បានរស់នៅរួមគ្នាលើនាវា និងធ្វើទស្សនកិច្ចនៅតាមប្រទេសម្ចាស់ផ្ទះទទួលនាវា។ ក្នុងនោះ ក៏មានការអនុញ្ញាតឱ្យយុវជនចូលជួបសម្ដែងការគួរសមជាមួយថ្នាក់ដឹកនាំប្រទេស ការធ្វើទស្សនកិច្ចតាមស្ថាប័នជាតិមរតកវប្បធម៌ និងផ្លាស់ប្ដូរវប្បធម៌គ្នាទៅវិញទៅមកជាមួយយុវជន នៃប្រទេសនីមួយៗនៅពេលដែលនាវាបានចូលចត៕