ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សេតវិមានបានប្រកាសកាលពីថ្ងៃពុធ ថា ប្រធានាធិបតីសហរដ្ឋអាម៉េរិកលោក ដូណាល់ ត្រាំ បានចុះហត្ថលេខា លើសេចក្ដីប្រកាសមួយ ដើម្បីផ្អាកការអនុញ្ញាតិឱ្យជនបរទេសចូលសហរដ្ឋអាម៉េរិក ក្នុងគោលបំណងបន្តការសិក្សា ឬចូលរួមកម្មវិធីផ្លាស់ប្ដូរការសិក្សា (Exchange program) នៅសាកលវិទ្យាល័យ Harvard ចំពេលមានជម្លោះកាន់តែខ្លាំងឡើងជាមួយស្ថាប័ន Ivy League , នេះបើតាមទីភ្នាក់ងារសារព័ត៌មាន Reuters ។
បទបញ្ជានេះ បានបញ្ជាដោយផ្ទាល់ទៅកាន់ក្រសួងការបរទេសសហរដ្ឋអាម៉េរិកឱ្យ «ពិចារណាដកហូត» ទិដ្ឋាការសិក្សា ដែលមានស្រាប់ ឬទិដ្ឋាការសម្រាប់ការផ្លាស់ប្ដូរការសិក្សារបស់និស្សិតសាកលវិទ្យាល័យ Harvard បច្ចុប្បន្ន ដែលបំពេញតាមលក្ខណៈវិនិច្ឆ័យនៃសេចក្ដីប្រកាស។
កាលពីខែមុន ក្រសួងការបរទេសក៏បានបញ្ជាឱ្យកុងស៊ុលរបស់ខ្លួនទាំងអស់នៅក្រៅប្រទេស ចាប់ផ្ដើមពិនិត្យបន្ថែមលើអ្នកដាក់ពាក្យសុំទិដ្ឋាការ ដែលមានបំណងធ្វើដំណើរទៅកាន់សាកលវិទ្យាល័យ Harvard ក្នុងគោលបំណងណាមួយ។
សាកលវិទ្យាល័យ Harvard អះអាងថា រដ្ឋបាលលោក ត្រាំ កំពុងសងសឹកនឹងសាលា ចំពោះការបដិសេធមិនព្រមទទួលយកការទាមទារ ដែលមានបំណងចង់គ្រប់គ្រងសាលារៀន កម្មវិធីសិក្សា និងមនោគមវិជ្ជារបស់មហាវិទ្យាល័យ រួមទាំងនិស្សិតរបស់ Harvard ។
សេចក្ដីណែនាំដែលមានប្រវែង ២ទំព័រ កាលពីថ្ងៃពុធ បញ្ជាក់ថា សាកលវិទ្យាល័យ Harvard បានបង្ហាញពីប្រវត្តិទាក់ទងនឹងទំនាក់ទំនងបរទេស និងលទ្ធិរ៉ាឌីកាល់និយម។
សេចក្ដីប្រកាស បាននិយាយថា FBI បានព្រមានជាយូរមកហើយថា សត្រូវបរទេសទាញយកប្រយោជន៍ពីភាពងាយស្រួល នៃការទទួលបានការអប់រំជាន់ខ្ពស់របស់អាម៉េរិក ដើម្បីលួចព័ត៌មាន កេងប្រវ័ញ្ចលើការស្រាវជ្រាវ និងការអភិវឌ្ឍន៍ (R&D) និងការផ្សព្វផ្សាយព័ត៌មានមិនពិត។
សេចក្ដីប្រកាសនេះ បានបន្ថែមទៀតថា Harvard ត្រូវបានរកឃើញថា មានការកើនឡើងយ៉ាងខ្លាំង នៃឧក្រិដ្ឋកម្មក្នុងប៉ុន្មានឆ្នាំចុងក្រោយនេះ ខណៈពេលដែលខកខានមិនបានដាក់វិន័យមួយចំនួន លើករណីរំលោភបំពាននៅក្នុងបរិវេនសាលា។
នៅក្នុងសេចក្ដីប្រកាសនេះ ក៏បានលើកឡើងថា សាកលវិទ្យាល័យ Harvard មិនបានផ្ដល់ព័ត៌មានគ្រប់គ្រាន់ដល់ក្រសួងសន្តិសុខមាតុភូមិអាម៉េរិកអំពីសកម្មភាពខុសច្បាប់ ឬគ្រោះថ្នាក់ ដែលបង្ករដោយនិស្សិតបរទេស។
ដោយចោទប្រកាន់ Harvard ពី «ការជាប់ពាក់ព័ន្ធយ៉ាងច្រើន ជាមួយសត្រូវបរទេស» សេចក្ដីប្រកាស បានបង្ហាញថា សាកលវិទ្យាល័យ Harvard បានទទួលប្រាក់ច្រើនជាង ១៥០លានដុល្លារពីប្រទេសចិន។ ហើយបានបន្ថែមទៀតថា អ្នកញុះញង់ជាច្រើន ដែលនៅពីក្រោយឧប្បតិ្តហេតុប្រឆាំងនឹងសាសនានៅក្នុងបរិវេណសាលា ត្រូវបានរកឃើញថា ជានិស្សិតបរទេស។
ការរឹតបន្ដឹងលើទិដ្ឋាការសិស្សថ្មីនៅសាកលវិទ្យាល័យ Harvard គឺជាការបង្រ្កាបចុងក្រោយបំផុតរបស់រដ្ឋបាលលោកត្រាំ ក្នុងការវាយប្រហារពហុផ្នែកលើសាកលវិទ្យាល័យចំណាស់ និងមានទ្រព្យសម្បត្តិច្រើនបំផុត របស់អាម៉េរិក។ បន្ទាប់ពី វិធានការ បង្កកជំនួយឥតសំណង និងមូលនិធិផ្សេងៗទៀត រាប់ពាន់លានដុល្លារ, បញ្ចប់ការលើកលែងពន្ធរបស់សាលា និងបើកការស៊ើបអង្កេត លើបញ្ហារើសអើងលើបុគ្គលិកស្បែកស អាស៊ី និងបុរស។
លោក ត្រាំ ចោទប្រកាន់សាកលវិទ្យាល័យកំពូលៗរបស់សហរដ្ឋអាម៉េរិកជាច្រើន ថាជាប្រភពកំណើតនៃចលនាប្រឆាំងអាម៉េរិក។ កាលពីខែមុន រដ្ឋបាលរបស់លោក បានដកហូតសមត្ថភាពរបស់សាកលវិទ្យាល័យ Harvard ក្នុងការទទួលចុះឈ្មោះនិស្សិតបរទេស ដែលជាចំណាត់ការមួយ បន្ទាប់មកត្រូវបានរារាំងដោយចៅក្រមសហព័ន្ធ៕
