បងប្អូនភ្លោះ២នាក់ មកពីទីក្រុង Hangzhou ទទួលបានលទ្ធផលដ៏គួរឱ្យភ្ញាក់ផ្អើលពីការប្រឡង GaoKao ដែលជាការប្រឡងដែលពិបាកបំផុតក្នុងប្រទេសចិន និងទទួលបានពិន្ទុ ៦៦៦ ក្នុងចំណោម ៧៥០ពិន្ទុ។

យុវជន Zeng Zichong និង Zeng Ziyi ជាសិស្សនៅវិទ្យាល័យ Xuejun ទីក្រុង Hangzhou ក្នុងខេត្ត Zhejiang បានសិក្សាជាមួយគ្នាតាំងពីថ្នាក់មត្តេយ្យ។ លទ្ធផលនៃការប្រឡងចូលសាកលវិទ្យាល័យលើកនេះ មិនត្រឹមតែបានពីសមត្ថភាពដ៏អស្ចារ្យរបស់ពួកគេទាំង២នាក់នោះទេ វាក៏ធ្វើឱ្យពួកគេទទួលបានពិន្ទុ ដើម្បីចូលរៀននៅសាកលវិទ្យាល័យ Xi’an Jiaotong ដែលជាសាកលវិទ្យាល័យដ៏មានកិត្យានុភាពបំផុតមួយនៅភាគខាងជើងប្រទេសចិន។

បងប្អូនទាំង២នាក់ បានប្រាប់កាសែត South China Morning Post ថា «ដំបូងឡើយ យើងទាំងពីរនាក់មិនជឿលទ្ធផលនេះទេ ប៉ុន្តែយើងពិនិត្យមើលច្រើនដងណាស់ ទើបយើងជឿថា ពួកយើងទទួលបានពិន្ទុដូចគ្នា»។

GaoKao ដែលត្រូវបានគេមើលឃើញជាទូទៅថា ជាការប្រឡងចូលរៀនសាកលវិទ្យាល័យ ដែលលំបាកបំផុតក្នុងពិភពលោក ដែលតម្រូវឱ្យធ្វើតេស្តលើភាសាចិន អង់គ្លេស គណិតវិទ្យា បូកនឹងជម្រើសមួយទៀត លើមុខវិជ្ជាវិទ្យាសាស្ត្រ និងមួយទៀតផ្នែកមនុស្សសាស្ត្រ។ ពិន្ទុ ៦៦៦ គឺជាសមិទ្ធិផលមួយដែលអស្ចារ្យមួយរួចទៅហើយ ប៉ុន្តែការទទួលបានលទ្ធផលស្មើគ្នាល្អឥតខ្ចោះបែបនេះ គឺធ្វើឱ្យស្ថិតិនេះ កាន់តែអស្ចារ្យ។

ជាមួយនឹងលទ្ធផលនេះ បងប្អូន Zeng ទាំងពីរនាក់បានចុះឈ្មោះចូលរៀនកម្មវិធីវិទ្យាសាស្ត្រកុំព្យូទ័រ និងបច្ចេកវិទ្យា ជំនាញផ្នែកបច្ចេកវិទ្យាពិសោធន៍។ សាកលវិទ្យាល័យ Xi’an Jiaotong បានបង្ហោះនៅលើ Weibo កាលពីថ្ងៃទី ២៥ ខែកក្កដា ថា «ភាពស៊ីចង្វាក់គ្នាដ៏អស្ចារ្យនេះ មិនមែនតែជាព្រហ្មលិខិតប៉ុណ្ណោះទេ ប៉ុន្តែជាសក្ខីភាពនៃការខិតខំប្រឹងប្រែងរបស់យុវជនទាំង២នាក់»។

យោងតាមគ្រួសាររបស់ពួកគេ Zeng Zichong និង Zeng Ziyi មិនត្រឹមតែមានមុខមាត់ដូចគ្នាទេ ប៉ុន្តែក៏មានបុគ្គលិកលក្ខណៈស្រដៀងគ្នាដែរ ដោយបានសិក្សាជាមួយគ្នាតាំងពីថ្នាក់មត្តេយ្យ។ ឈ្មោះរបស់ Zichong មានន័យថា «បក្សីហើរឡើងលើមេឃ» ខណៈពេលដែល Ziyi មានន័យថា «ជាជំនួយ និងជួយ»។ ឪពុកម្ដាយរបស់ពួកគេ សង្ឃឹមថា បងប្អូនទាំង២នាក់នឹងនៅជាមួយគ្នា និងគាំទ្រគ្នាជានិច្ច។

នៅសាលាមធ្យមសិក្សា លទ្ធផលសិក្សារបស់ពួកគេ គឺស្ទើរតែដូចគ្នាបេះបិត។ យុវជន Zichong ពូកែខាងអក្សរសាស្ត្រចិន និងអង់គ្លេស ចំណែក Ziyi ពូកែគណិតវិទ្យា និងរូបវិទ្យា។ តាមរយៈការផ្ដោះប្តូរយោបល់ និងការជួយគ្នាទៅវិញទៅមកជាទៀងទាត់ ពួកគេទាំង២នាក់ តែងតែទទួលបានចំណាត់ថ្នាក់ខ្ពស់។

ពួកគេក៏មានចំណូលចិត្តស្រដៀងគ្នាច្រើនផងដែរ ដូចជា ការលេងហ្គេម ការមើលភាពយន្ត និងទៅអានសៀវភៅនៅបណ្ណាល័យ។ ចំណង់ចំណូលចិត្តដូចគ្នា សម្រាប់វិទ្យាសាស្ត្រកុំព្យូទ័រ និងបញ្ញាសិប្បនិម្មិត (AI) បាននាំឱ្យពួកគេដាក់ពាក្យចូលរៀនមុខវិជ្ជាដូចគ្នានៅសាកលវិទ្យាល័យ។

Zichong បាននិយាយថា គាត់បានជ្រើសរើសសាកលវិទ្យាល័យនេះ ដោយសារតែកេរ្តិ៍ដំណែលដ៏សម្បូរបែប និងកេរ្តិ៍ឈ្មោះក្នុងវិស័យសិក្សាស្រាវជ្រាវដ៏ល្បីល្បាញ ខណៈដែល Ziyi បាននិយាយថា អ្វីដែលទាក់ទាញចិត្តពួកគាត់បំផុតគឺ សម្រស់នៃវប្បធម៌បុរាណនៃទីក្រុង Xi’an៕