ឪពុកម្ដាយនៅក្នុងប្រទេសកូរ៉េខាងត្បូង កំពុងបែងចែកប្រាក់ចំណូលរបស់ពួកគេកាន់តែច្រើន ដើម្បីគាំទ្រការអប់រំឯកជនសម្រាប់កូន ខណៈដែលការប្រកួតប្រជែង និងសម្ពាធក្នុងការសិក្សាកើនឡើងកាន់តែខ្លាំង។

ទិន្នន័យពីការិយាល័យស្ថិតិទូទៅ នៃប្រទេសកូរ៉េ បង្ហាញថា ការចំណាយប្រចាំខែ ជាមធ្យមសម្រាប់ថ្នាក់រៀនគួរបន្ថែមរបស់សិស្សម្នាក់ បានកើនឡើង ៤៤ភាគរយ ក្នុងរយៈពេល ៤ឆ្នាំ ដោយកើនឡើងពី ៣០២,០០០ វ៉ុន (២០៨ ដុល្លារ) ដល់ ៤៣៤,០០០ វ៉ុន។ ក្នុងរយៈពេលដូចគ្នានេះ ចំនួនកុមារដែលចូលរៀន បានធ្លាក់ចុះបន្តិចពី ៥១,៨៤លាននាក់ ក្នុងឆ្នាំ ២០២០ មកត្រឹម ៥១,៧លាននាក់ក្នុងឆ្នាំ២០២៣ ខណៈដែលការចំណាយសរុបក្នុងវិស័យអប់រំឯកជន បានកើនឡើង ៤០ភាគរយ និងមានតម្លៃ ២៧ពាន់ពាន់លានវ៉ុន ក្នុងឆ្នាំ២០២៣ នេះបើយោងតាមសារព័ត៌មាន Korea Herald ។

ការស្ទង់មតិដោយក្រុមពលរដ្ឋ បានរកឃើញថា ឪពុកម្ដាយកំពុងចំណាយជាមធ្យមជាង ៧៥៣ដុល្លារក្នុងមួយខែ សម្រាប់ការរៀនគួរបន្ថែម ដែលការចំណាយនេះស្មើនឹង ១ភាគ៣នៃប្រាក់ចំណូលជាមធ្យមរបស់គ្រួសារ។ លោក Park Saing-In សេដ្ឋវិទូ នៅសាកលវិទ្យាល័យជាតិ សេអ៊ូល បានចាត់ទុកនិន្នាការនេះថា មានការប្រកួតប្រជែងកាន់តែខ្លាំងក្នុងវិស័យសិក្សា ជាពិសេសទាក់ទងនឹងការប្រឡងចូលសាកលវិទ្យាល័យ។

ដើម្បីឆ្លើយតបទៅនឹងតម្រូវការដែលកំពុងកើនឡើង និងការពង្រឹងគុណភាពប្រឡងចូលរៀនថ្នាក់ឧត្តមសិក្សា សាលាបណ្ដុះបណ្ដាល និងបង្រៀនបន្ថែម Hagwon កំពុងផ្ដោតសំខាន់ក្នុងការផ្ដល់ជូនកម្មវិធីសិក្សា ដែលមានគុណភាពខ្ពស់ ជាជាងការបង្កើនចំនួនអ្នកចុះឈ្មោះចូលរៀន។ ក្រុមហ៊ុន Digital Daesung ដែលជាក្រុមហ៊ុនគ្រប់គ្រងសាលាមត្តេយ្យ បានតម្លើងថ្លៃសិក្សា របស់ខ្លួន សម្រាប់ការសិក្សាពេញម៉ោង ដល់ ៣,៥លានវ៉ុន ក្នុងមួយខែ ពោលគឺកើនឡើង ១៣,៣ភាគរយ លើសឆ្នាំ២០២២។ ប្រាក់ចំណូលនៅត្រីមាសទី៣ របស់ក្រុមហ៊ុននេះ បានកើនឡើង ១,២៣ ភាគរយ ដែលមានតម្លៃស្មើនឹង ១៦៤,២ លានវ៉ុន។

លោក Im Seong-ho នាយកប្រតិបត្តិ នៃសាលាបណ្ដុះបណ្ដាល Jongno Hagwon ដែលជាសាលាបង្រៀនគួរបន្ថែមមានវ័យចំណាស់ជាងគេក្នុងប្រទេសកូរ៉េ បានលើកឡើងថា ឪពុកម្ដាយ មួយចំនួន សុខចិត្តចំណាយប្រាក់ច្រើនជាង ៤លានវ៉ុនក្នុងមួយខែ រួមទាំងការធ្វើអាហារសម្រាប់កូនផង ដើម្បីឱ្យពួកគេបានរៀនបន្ថែម។ ការធ្វើបែបនេះ ព្រោះអាណាព្យាបាលជឿថា ការរៀនបន្ថែមនឹងអាចជួយបង្កើនអត្រាជោគជ័យក្នុងការសិក្សារបស់កូនពួកគេ។

គួរបញ្ជាក់ថា ការសិក្សាក្នុងឆ្នាំ២០២៣ ដែលរាយការណ៍ដោយ DW បានឱ្យដឹងថា កូរ៉េខាងត្បូង ជាប្រទេស ដែលមានការចំណាយថ្លៃបំផុតលើពិភពលោក សម្រាប់ការចិញ្ចឹមកូនម្នាក់រហូតដល់ពួកគេមានអាយុ ១៨ឆ្នាំ ហើយការចំណាយ​ភាគច្រើនផ្ដោតលើការអប់រំ៕