ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងនាមជាប្រទេសដែលមានមនុស្សរហូតដល់ ៩៨% មានទូរស័ព្ទស្មាតហ្វូនប្រើ កូរ៉េខាងត្បូងកំពុងសម្រេចធ្វើរឿងមួយដែលស្ទើរតែមិននឹកស្មានដល់ គឺហាមឃាត់ការប្រើប្រាស់ស្មាតហ្វូននៅក្នុងថ្នាក់រៀន។ ចាប់ពីខែមីនា ឆ្នាំ២០២៦ តទៅ សិស្សត្រូវដកទូរស័ព្ទស្មាតហ្វូនរបស់គេទុក អំឡុងពេលរៀន។
សមាជិកសភានិយាយថា ការហាមប្រាមការប្រើទូរស័ព្ទស្មាតហ្វូនក្នុងថ្នាក់រៀនទូទាំងប្រទេស គឺសំដៅដល់ការទប់ស្កាត់ផលប៉ះពាល់ដ៏គ្រោះថ្នាក់ នៃបណ្ដាញសង្គម និងការកើនឡើងនៃការញៀនអេក្រង់ក្នុងចំណោមកុមារ។
ការហាមប្រាមប្រើទូរស័ព្ទក្នុងថ្នាក់រៀនរបស់កូរ៉េខាងត្បូង
នេះបង្ហាញពីការផ្លាស់ប្ដូរពីគោលនយោបាយកម្រិតសាលាទៅជាច្បាប់ជាតិ។ សាលាក្នុងប្រទេសកូរ៉េខាងត្បូងភាគច្រើនបានដាក់កម្រិតលើការប្រើប្រាស់ទូរស័ព្ទស្មាតហ្វូនក្នុងថ្នាក់រៀនតាំងពីឆ្នាំ២០២៣ក្រោមការណែនាំផ្សេងៗ។ សេចក្ដីព្រៀងច្បាប់ថ្មី ដែលបានអនុម័តដោយរដ្ឋសភាកាលពីថ្ងៃពុធ ឥឡូវនេះបានហាមប្រាមជាផ្លូវការ នូវការប្រើស្មាតហ្វូននៅក្នុងថ្នាក់រៀន។
ទោះជាយ៉ាងណាក៏ដោយ ករណីលើកលែងនៅតែមាន សម្រាប់ភាពអាសន្ន ក្នុងគោលបំណងអប់រំ និងស្ថានភាពផ្សេងទៀត ដែលបានបញ្ជាក់នៅក្រោមច្បាប់។ ឧបករណ៍ឌីជីថល ក៏នឹងនៅតែត្រូវបានអនុញ្ញាតសម្រាប់សិស្ស ដែលមានពិការភាពផងដែរ។
សិស្សនឹងមិនប្រឈមចំពោះការពិន័យផ្លូវការទេ ប៉ុន្តែនាយកសាលា និងគ្រូត្រូវមានភារកិច្ចអនុវត្តការហាមប្រាមការប្រើទូរសព្ទក្នុងបរិវេណសាលា។ ច្បាប់នេះ ក៏តម្រូវឱ្យសាលារៀនបង្រៀន អំពីទម្លាប់នៃការប្រើប្រាស់ឧបករណ៍ឌីជីថលឱ្យបានត្រឹមត្រូវផងដែរ ដែលនេះជាវិធានការគាំទ្រជាយូរមកហើយ ពីសំណាក់ឪពុកម្ដាយ និងអ្នកជំនាញអប់រំ ដែលមានកង្វល់អំពីផលប៉ះពាល់នៃការញៀនអេក្រង់ លើលទ្ធផលសិក្សា និងសុខុមាលភាពផ្លូវចិត្ត។
លោក Cho Jung-hun តំណាងរាស្ត្រគណបក្សប្រឆាំង ដែលបានធ្វើសេចក្ដីព្រាងច្បាប់នេះ និយាយថា លោកចង់ដោះស្រាយការញៀនស្មាតហ្វូន ដែលកំពុងកើនឡើងក្នុងចំណោមយុវជនកូរ៉េខាងត្បូង និងការពារសុខភាពផ្លូវចិត្តពួកគេ។ ប៉ុន្តែមិនមែនគ្រប់គ្នាយល់ស្របនឹងការចាត់វិធានការណ៍នេះទេ។ ក្រុមនិស្សិតមួយចំនួននិយាយថា ការដាក់កម្រិតនេះ គឺនៅឆ្ងាយពីស្ថានភាពបច្ចុប្បន្ន។
ក្រុមអ្នកប្រឆាំង បាននិយាយនៅក្នុងសេចក្ដីថ្លែងការណ៍មួយកាលពីសប្ដាហ៍មុនថា «ទោះបីជាពួកគេអាចដាក់កម្រិតលើការប្រើប្រាស់ស្មាតហ្វូននៅក្រោមបទប្បញ្ញត្តិ ដែលមានស្រាប់ក៏ដោយ ក៏ពួកគេចង់សរសេរវាឱ្យទៅជាច្បាប់ ដោយរំលោភទៅលើសិទ្ធិមូលដ្ឋានរបស់សិស្ស ដូចជា សេរីភាពក្នុងការទំនាក់ទំនង និងសិទ្ធិក្នុងការរក្សាឯកជនភាព និងការស្វែងរកសុភមង្គលផ្ទាល់ខ្លួន។»
បើតាមការស្ទង់មតិរបស់រដ្ឋាភិបាលនៅឆ្នាំ២០២៤ បានរកឃើញថា ជិត ១ភាគ៤ នៃប្រជាជនកូរ៉េខាងត្បូងចំនួន ៥១លាននាក់ពឹងផ្អែកលើស្មាតហ្វូនរបស់ពួកគេយ៉ាងខ្លាំង ដែលធ្វើឱ្យពួកគេមិនអាចគ្រប់គ្រងរយៈពេល ដែលពួកគេត្រូវប្រើវាបាន។ បើទោះជាពួកគេដឹងថា ទម្លាប់នេះ បង្កផលប៉ះពាល់អវិជ្ជមានដល់សុខភាពផ្លូវកាយ ផ្លូវចិត្ត និងសង្គមក៏ដោយ។ តួលេខនេះ បានកើនឡើងដល់ទៅជិត ៤៣% ក្នុងចំណោមអ្នកដែលមានអាយុចាប់ពី ១០ ទៅ១៩ឆ្នាំ។
គួរបញ្ជាក់ថា កូរ៉េខាងត្បូងមិនមែនជាប្រទេសដំបូង ដែលអនុវត្តការហាមប្រាមនេះទេ។ មានប្រទេសជឿនលឿនមួយចំនួនដូចជា បារាំង ហ្វាំងឡង់ អ៊ីតាលី ហូឡង់ និងចិន ក៏បានដាក់កម្រិតលើការប្រើប្រាស់ស្មាតហ្វូនក្នុងសាលារៀនផងដែរ ដោយប្រទេសទាំងនេះ បានបង្ហាញក្ដីបារម្ភយ៉ាងខ្លាំង ចំពោះរបៀបដែលអេក្រង់មានឥទ្ធិពល លើការសិក្សា និងសុខុមាលភាពយុវជន៕
