ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
និស្សិតអន្តរជាតិជាង ២៤,០០០នាក់ ដែលភាគច្រើនមកពីប្រទេសអ៊ីរ៉ង ប្រឈមនឹងការបាត់បង់សិទ្ធិចូលរៀននៅសហរដ្ឋអាម៉េរិក ដោយសារតែការហាមឃាត់ការធ្វើដំណើរចំពោះប្រទេសចំនួន ១៩ មកកាន់អាម៉េរិក ដែលបានចុះហត្ថលេខាដោយប្រធានាធិបតីអាម៉េរិក លោក ដូណាល់ ត្រាំ។
លោក ត្រាំ បានចេញសេចក្ដីប្រកាសមួយ កាលពីសប្ដាហ៍មុន ដោយហាមប្រាមប្រជាជនមកពីប្រទេសចំនួន ១២ ដូចជា អាហ្វហ្គានីស្ថាន មីយ៉ាន់ម៉ា ឆាដ កុងហ្គោ អាក្វាទ័រហ្គីណេ អេរីទ្រា ហៃទី អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន មិនឱ្យចូលសហរដ្ឋអាម៉េរិក ដោយលើកឡើងពីតម្រូវការប្រឆាំងនឹងភេរវករបរទេស និងការគំរាមកំហែងសន្តិសុខជាតិ។
រដ្ឋបាលលោកត្រាំ បានណែនាំឱ្យមានការរឹតបន្តឹងផ្នែកខ្លះលើបុគ្គលមកពីប្រទេសចំនួន ៧ផ្សេងទៀត ដូចជា ប៊ូរុនឌី គុយបា ឡាវ សៀរ៉ាឡេអូន តូហ្គោ តូមិននីស្ថាន និងវ៉េណេស៊ុយអេឡា។
វិធានការចុងក្រោយនេះ បានបន្ថែមលើការហាមប្រាមការធ្វើដំណើរដ៏ចម្រូងចម្រាសក្នុងឆ្នាំ ២០១៧ របស់លោក ត្រាំ ដែលផ្ដោតលើប្រទេសភាគច្រើន ដែលកាន់សាសនាឥស្លាម ដែលបង្កឱ្យមានការតវ៉ារីករាលដាល និងការប្រឈមផ្នែកច្បាប់។ គោលនយោបាយថ្មីរបស់រដ្ឋបាលត្រាំ គឺជាផ្នែកមួយនៃយុទ្ធសាស្ត្រដែលធំជាងមុន ដើម្បីកាត់បន្ថយជនអន្តោប្រវេសន៍ និងបន្ស៊ីគោលនយោបាយអប់រំថ្នាក់ឧត្តមសិក្សាជាមួយនឹងគោលដៅអន្តោប្រវេសន៍របស់លោកត្រាំ។
និស្សិតអ៊ីរ៉ង់ គឺជាក្រុមនិស្សិតធំបំផុត ដែលទទួលរងផលប៉ះពាល់ដោយច្បាប់ថ្មី។ ទិន្នន័យពីរបាយការណ៍ Open Doors 2024 ដោយវិទ្យាស្ថានអប់រំអន្តរជាតិ និងក្រសួងការបរទេសអាម៉េរិក ដែលដកស្រង់ដោយ The Washington Post បង្ហាញថា និស្សិតអ៊ីរ៉ង់ជាង ១២,០០០ នាក់បានចូលរៀននៅស្ថាប័នអប់រំអាម៉េរិក ក្នុងឆ្នាំសិក្សា២០២៣-២០២៤ ប្រហែល ៣ដងនៃទំហំក្រុមនិស្សិត ដែលរងផលប៉ះពាល់ធំជាងគេលំដាប់ទី២ គឺនិស្សិតមកពីប្រទេសវេណេហ្សូអេឡា ដែលមានចំនួន ៣,៩០៤ ។ ខណៈប្រទេសមីយ៉ានម៉ា ស្ថិតនៅលំដាប់ទី៣ ដែលមានសិស្ស ៣,២២២ នាក់ កំពុងរងផលប៉ះពាល់។
សម្រាប់ប្រទេស ប៊ូរុនឌី សាធារណរដ្ឋកុងហ្គោ សូម៉ាលី គុយបា ឡាវ អេរីទ្រា និងឆាដ មានសិស្សតិចជាង ២០០នាក់ បានចុះឈ្មោះចូលរៀននៅមហាវិទ្យាល័យអាម៉េរិក ក្នុងឆ្នាំសិក្សានេះ ខណៈប្រទេសដែលនៅសល់ នីមួយៗមានសិស្សចន្លោះពី ២៣៤ ទៅ ៨៣៣ នាក់ កំពុងសិក្សានៅសហរដ្ឋអាម៉េរិក។
ប្រភេទនៃការសិក្សា មានភាពខុសគ្នាយ៉ាងខ្លាំងទៅតាមប្រទេសនីមួយៗ ដោយប្រហែល ៨១,៥ % នៃនិស្សិតអីរ៉ង់ បានចុះឈ្មោះចូលរៀនថ្នាក់ក្រោយឧត្តមសិក្សា ខណៈវេណេហ្សូអេឡា និងមីយ៉ាន់ម៉ា ភាគច្រើនកំពុងបន្តការសិក្សាថ្នាក់បរិញ្ញាបត្រ។ និស្សិតមួយចំនួនតូចផ្សេងទៀត ចូលរួមកម្មវិធីសិក្សាមិនមែនបញ្ញាបត្រ ឬ Optional Practical Training (OPT) ដែលអនុញ្ញាតឱ្យនិស្សិតបញ្ចប់ការសិក្សាថ្មីៗធ្វើការនៅសហរដ្ឋអាមេរិករហូតដល់បីឆ្នាំក្នុងវិស័យដែលទាក់ទងនឹងការសិក្សារបស់ពួកគេ។
ទោះបីជាសេតវិមានបានបំភ្លឺថា អ្នកកាន់ទិដ្ឋាការបច្ចុប្បន្ន មិនរងផលប៉ះពាល់ដោយសារការហាមប្រាមនេះក៏ដោយ តែសេចក្ដីប្រកាសនេះ បានបង្កើតភាពមិនច្បាស់លាស់គួរឱ្យកត់សម្គាល់ក្នុងចំណោមនិស្សិតអន្តរជាតិ។ ដោយរំពឹងថា នឹងមានការរំខានណាមួយអាចកើតឡើង មហាវិទ្យាល័យជាច្រើន បាននិងកំពុងណែនាំឱ្យនិស្សិតអន្តរជាតិ ចៀសវាងការធ្វើដំណើរទៅក្រៅប្រទេស ប្រសិនបើមិនមានភារកិច្ចចាំបាច់ ដោយបារម្ភថា ពួកគេអាចនឹងលំបាកត្រឡប់ចូលសហរដ្ឋអាម៉េរិកវិញ។
សម្រាប់ឆ្នាំសិក្សា២០២៣-២០២៤ សហរដ្ឋអាម៉េរិកមាននិស្សិតអន្តរជាតិជាង ១,១លាននាក់ មកពីប្រទេសចំនួន ២០០ ដែលនេះជាតួលេខខ្ពស់បំផុតមិនធ្លាប់មានពីមុនមក ពោលគឺមានចំនួន ៥,៩ % នៃការចុះឈ្មោះចូលរៀនសរុប, នេះបើយោងតាមវិទ្យាស្ថានអប់រំអន្តរជាតិ។
ក្នុងចំណោមនិស្សិតអន្តរជាតិទាំងអស់ ប្រទេសឥណ្ឌា និងចិន បានបញ្ជូននិស្សិតអន្តរជាតិច្រើនជាងគេ ដែលក្នុងនោះមានចំនួន ៥៤% នៃការចុះឈ្មោះរបស់និស្សិតអន្តរជាតិទាំងអស់៕
