គ្រូបង្រៀនអ៊ីស្លង់នឹងអាចប្រើប្រាស់ AI ដើម្បីរៀបចំមេរៀន សម្ភារៈថ្នាក់រៀន និងការងាររដ្ឋបាលក្នុងពេលឆាប់ៗនេះ ដោយក្រុមហ៊ុន Anthropic នឹងនាំយកបញ្ញាសិប្បនិម្មិត (AI) របស់ខ្លួនទៅកាន់គ្រូបង្រៀន ក្នុងប្រទេសដែនកោះមួយនេះ។

ក្រុមហ៊ុន Anthropic ដែលជាអ្នកបង្កើតគម្រូភាសាធំ Claude (LLM) កំពុងសហការជាមួយ រដ្ឋាភិបាលអ៊ីស្លង់ ដើម្បីនាំយកបច្ចេកវិទ្យា AI របស់ខ្លួន ឱ្យគ្រូបង្រៀនអ៊ីស្លង់ប្រើទូទាំងប្រទេស។

គម្រោងនេះ បានប្រកាសកាលពីដើមខែវិច្ឆិកានេះ ដោយក្រុមហ៊ុនបច្ចេកវិទ្យាអាមេរិកបានថ្លែងថា វាជាកម្មវិធីសាកល្បងអប់រំបញ្ញាសិប្បនិម្មិត (AI) ថ្នាក់ជាតិយ៉ាងទូលំទូលាយដំបូងគេមួយក្នុងពិភពលោក។

វានឹងផ្ដល់ឱ្យគ្រូបង្រៀនរាប់រយនាក់ក្នុងប្រទេសអ៊ីស្លង់នូវសិទ្ធិចូលប្រើ Claude ដោយមានគោលបំណងជួយពួកគេ លើការរៀបចំមេរៀន សម្ភារៈឧបទេសក្នុងថ្នាក់រៀន និងការងាររដ្ឋបាល។

កម្មវិធីសាកល្បងនេះ មានបំណងសាកល្បងពីរបៀបដែលឧបករណ៍ AI អាចផ្ដល់អត្ថប្រយោជន៍ដល់សាលារៀនអ៊ីស្លង់ គាំទ្រគ្រូបង្រៀនក្នុងការណែនាំ និងការរៀបចំមេរៀនរបស់ពួកគេ ដើម្បីបង្កើនចំណង់ក្នុងការរៀនសូត្ររបស់សិស្ស, នេះបើយោងតាមសេចក្ដីប្រកាសរបស់ Anthropic ។

គ្រូបង្រៀននឹងអាចប្រើប្រាស់ប្រព័ន្ធ ដើម្បីវិភាគអត្ថបទ ពន្យល់ពីបញ្ហាគណិតវិទ្យា និងសម្របមេរៀនសម្រាប់តម្រូវការសិក្សារបស់សិស្សម្នាក់ៗ។

លោកស្រី Thiyagu Ramasamy ប្រធានផ្នែកសាធារណៈរបស់ Anthropic បានមានប្រសាសន៍នៅក្នុងសេចក្ដីថ្លែងការណ៍មួយថា «យើងមានមោទនភាព ដែលបានសហការជាមួយក្រសួងអប់រំ និងកុមាររបស់ប្រទេសអ៊ីស្លង់ ដើម្បីជួយគ្រូបង្រៀនសន្សំសំចៃពេលវេលា និងបង្កើតបទពិសោធន៍សិក្សាកាន់តែប្រសើរ។»

លោក Ramasamy បានបន្ថែមថា អស់រយៈពេលជាយូរ ដែលគ្រូបង្រៀនបានចំណាយពេលវេលាច្រើនជាមួយ ក្រដាសកិច្ចការសិស្ស និងកិច្ចការរដ្ឋបាល ដែលជាបន្ទុកមិនសូវមានការចាប់អារម្មណ៍ និងទាញពួកគេចេញពីកិច្ចការសំខាន់បំផុត ក្នុងភារកិច្ចជាគ្រូបង្រៀន គឺការបង្រៀន។

AI នឹងរៀនពីវិធីសាស្ត្រ និងសម្ភារបង្រៀន ដែលមានលក្ខណៈពិសេសដាច់ដោយឡែក របស់អ្នកអប់រំម្នាក់ៗ។

រដ្ឋមន្ត្រីក្រសួងអប់រំ និងកុមារអ៊ីស្លង់ លោក Guðmundur Ingi Kristinsson បាននិយាយថា រដ្ឋាភិបាលចង់ស្វែងយល់ពីសក្តានុពលនៃបញ្ញាសិប្បនិម្មិត (AI) ក្នុងការអប់រំ ស្របទៅ​នឹង​ការយកចិត្តទុកដាក់ ចំពោះហានិភ័យដែលអាចកើតមានឡើង នៃបច្ចេកវិទ្យានេះ។

លោក Kristinsson បាននិយាយបន្ថែម នៅក្នុងសេចក្ដីថ្លែងការណ៍ថា នៅទីនេះ យើងលោតផ្លោះ ហើយចាប់ផ្ដើមគម្រោងដ៏មានមហិច្ឆតាមួយ ដែលមានគោលបំណងពិនិត្យមើលការប្រើប្រាស់បច្ចេកវិទ្យា AI ក្នុងវិស័យអប់រំ ដោយមានតម្រូវការរបស់គ្រូបង្រៀន ជាគោលការណ៍ ណែនាំរបស់យើង និងប្រើប្រាស់បច្ចេកវិទ្យាឈានមុខគេ ក្នុងពិភពលោក។

កម្មវិធីសាកល្បងនេះ រួមមានការបណ្ដុះបណ្ដាល និងការគាំទ្រផ្នែកបច្ចេកទេស សម្រាប់គ្រូបង្រៀន ដោយប្រព័ន្ធនេះ ក៏គាំទ្រភាសាអ៊ីស្លង់ និងភាសាជាច្រើនទៀតផងដែរ ដែល Anthropic និយាយថា នឹងជួយ លើកកម្ពស់បរិយាកាសសិក្សា ដែលមានលក្ខណៈស្វាគមន៍ និងផ្ដល់អំណាចកាន់តែច្រើន។

យ៉ាងណាក៏ដោយ រដ្ឋាភិបាលអ៊ីស្លង់ មិនបានបង្ហាញពីរយៈពេល និងតម្លៃដែលត្រូវចំណាយ លើការសាកល្បងនេះឡើយ៕