ស្ទើរតែពាក់កណ្ដាលនៃចំនួនប្រជាជនលើពិភពលោកត្រូវបានរងផលប៉ះពាល់ដោយសារជំងឺមាត់ធ្មេញ ហើយករណីនៃជំងឺកើនឡើងលឿនជាងចំនួនអត្រាកំណើនប្រជាជនពិភពលោកទៅទៀត។ យោងតាមទិន្នន័យចុងក្រោយរបស់អង្គការសុខភាពពិភពលោក (WHO) បានឱ្យដឹងថា ចំនួនអ្នកមានជំងឺមាត់ធ្មេញ គឺមានជាងមួយពាន់លានករណីនៅទូទាំងពិភពលោក ច្រើនជាងករណី នៃជំងឺផ្លូវចិត្ត ជំងឺសរសៃឈាមបេះដូង ជំងឺទឹកនោមផ្អែម ជំងឺដង្ហើមរ៉ាំរ៉ៃ និងជំងឺមហារីក រួមបញ្ចូលគ្នា។

ជំងឺមាត់ធ្មេញមានហានិភ័យ នៃការបង្កជំងឺផ្សេងៗទៀត ដែលមានទំនាក់ទំនងទៅនឹងជំងឺទំនោមផ្អែម ជំងឺដាច់សរសៃឈាមខួរក្បាល និងជំងឺផ្លូវដង្ហើម។ ការសិក្សាបានបង្ហាញថា មនុស្សទូទាំងពិភពលោកត្រូវចំណាយទឹកប្រាក់ប្រមាណ ៧១០ពាន់លានដុល្លារក្នុងមួយឆ្នាំ សម្រាប់ការព្យាបាល និងខាតបង់ផលិតភាពការងារយ៉ាងច្រើន។ បើទោះជាយ៉ាងនេះក្ដី សុខភាពមាត់នៅតែជាបញ្ហាប្រឈមសាកល ដែលគេមិនយកចិត្តទុកដាក់ ហើយវាបានជះឥទ្ធិពល លើមនុស្សដែលងាយរងគ្រោះជាច្រើនជុំវិញពិភពលោក។

ហេតុអ្វីបានជាសុខភាពមាត់ធ្មេញល្អមានសារៈសំខាន់?

ជំងឺមាត់ត្រូវបានផ្សារភ្ជាប់ទៅនឹងបញ្ហាសុខភាពជាច្រើន រួមទាំង ជំងឺទឹកនោមផ្អែម ជំងឺដាច់សរសៃឈាមខួរក្បាល ជំងឺវង្វេង ជំងឺបេះដូង និងសុខភាពផ្លូវចិត្ត។ ដូច្នេះ សុខភាពមាត់ធ្មេញល្អ អាចកាត់បន្ថយបញ្ហាសុខភាពនៅកន្លែងផ្សេងទៀត នៃរាងកាយ និងជំរុញឱ្យសុខភាពទូទៅនៃរាងកាយមានសុខភាពល្អ។ ប៉ុន្តែ តាមរយៈការព្យាបាល និងថែទាំមាត់ធ្មេញ ជាបញ្ហាដាច់ដោយឡែក ពីការថែទាំសុខភាពរាងកាយ ដែលធ្វើឱ្យមនុស្សជាច្រើន មិនបានចាប់អារម្មណ៍យកចិត្តទុកដាក់នឹងបញ្ហានេះ។

ផល​ប៉ះពាល់​ នៃសុខភាពមាត់ធ្មេញ គឺមានឥទ្ធិពលលើសពី ប្រព័ន្ធថែទាំសុខភាពទៅទៀត ហើយវិបត្តិនេះ អាចនាំឱ្យប៉ះពាល់ដល់ការសិក្សា ម៉ោងធ្វើការ និងផលិតភាពការងារទូទៅ ខណៈជនដែលងាយរងគ្រោះចំពោះបញ្ហានេះ គឺប្រជាជនដែលមានចំណូលទាប។

តើយើងអាចធ្វើអ្វីបានចំពោះបញ្ហាសុខភាពមាត់ធ្មេញ?

របាយការណ៍ OHAG របស់វេទិកាសេដ្ឋកិច្ចពិភពលោក (WE Forum) បានណែនាំយុទ្ធសាស្ត្រជាច្រើន ដើម្បីដោះស្រាយបញ្ហានេះ ។ ក្នុងនោះ សកម្មភាពរដ្ឋាភិបាល ដើរតួនាទីយ៉ាងសំខាន់ ក្នុងការបង្កើតគោលនយោបាយ ដែលជួយឱ្យសេវាព្យាបាលធ្មេញកាន់តែមានតម្លៃសមរម្យ ដូចជាការរួមបញ្ចូលនូវការថែទាំមាត់ធ្មេញទៅក្នុងកម្មវិធីធានារ៉ាប់រងសុខភាពសាធារណៈ និងគោលនយោបាយធានារ៉ាប់រងសុខភាពជាសកល។ ជាមួយគ្នានេះ រដ្ឋាភិបាលក៏ជាភាគីសំខាន់ ក្នុងការលើកកម្ពស់ចំណេះដឹងអំពីការថែរក្សាសុខភាពមាត់ធ្មេញ តាមរយៈការសហការជាមួយភាគីពាក់ព័ន្ធជាច្រើនទៀត លើការផ្សព្វផ្សាយ។

ចំណែក វិស័យឯកជនអាចជះឥទ្ធិពលជាវិជ្ជមានដល់សុខភាពមាត់ធ្មេញ ដោយធានានូវលទ្ធភាពក្នុងការទទួលបាននូវថ្នាំដុសធ្មេញហ្វុយអូរី (fluoride) ផលិតផលអនាម័យមាត់ និងផលិតផលជាច្រើនទៀត ដែលពាក់ព័ន្ធនឹងការលើកកម្ពស់សុខភាពមាត់ធ្មេញ។ វិស័យឯកជន អាចជំរុញការស្រាវជ្រាវ និងអភិវឌ្ឍផលិតផលដែលមិនល្អសម្រាប់សុខភាពមាត់ធ្មេញ ដូចជា អាហារ និងភេសជ្ជៈ ដែលមានជាតិស្ករជាដើម។ របាយការណ៍ក៏បានលើកឡើងពីសារៈសំខាន់នៃសង្គមស៊ីវិល និងរបៀបដែលការវិនិយោគសប្បុរសធម៌ក្នុងសកម្មភាពសុខភាពមាត់ធ្មេញអាចគាំទ្រដល់ប្រព័ន្ធសុខភាពផងដែរ៕