ប្រទេសបារាំងបានទទួលស្វាគមន៍និស្សិតអន្តរជាតិចំនួន ៤៤៣,៥០០នាក់ នៅក្នុងឆ្នាំសិក្សា២០២៤-២០២៥ ពោលគឺកើនឡើង ៣ភាគរយ បើធៀបនឹងឆ្នាំមុន និងកើនឡើង ១៧ភាគរយ បើធៀបនឹង៥ឆ្នាំមុន។

យោងតាម Campus France ដែលជាទីភ្នាក់ងាររដ្ឋាភិបាលរបស់បារាំង ដែលទទួលខុសត្រូវលើការអប់រំអន្តរជាតិ និស្សិតអន្តរជាតិ នាពេលបច្ចុប្បន្ននេះ និស្សិត​អន្តរជាតិមានចំនួនប្រហែល ១៥ភាគរយ នៃចំនួននិស្សិតសរុប។

ក្នុងរយៈពេល ៥ឆ្នាំចុងក្រោយ ចំនួននិស្សិតបរទេសនៅបារាំងបន្តកើនឡើងជាលំដាប់។ របាយការណ៍បានបង្ហាញថា បន្ទាប់ពីការកើនឡើង ៨ភាគរយ នៃការចល័តរបស់និស្សិតពីឆ្នាំ២០២១ ដល់ឆ្នាំ២០២៣, កំណើននេះបានថយចុះមកត្រឹម ៣ភាគរយ ក្នុងឆ្នាំ២០២២-២០២៣ ហើយបន្ទាប់មកបានកើនឡើងដល់ ៤,៥ភាគរយនៅក្នុងឆ្នាំ២០២៣-២០២៤។

ដូចគ្នាទៅនឹងឆ្នាំមុនៗដែរ និស្សិតម៉ារ៉ុក អាល់ហ្សេរី ចិន អ៊ីតាលី និងសេណេហ្គាល់ គឺមានកំណើនច្រើនជាងគេ។ ម៉ារ៉ុកនៅតែជាប្រទេសនាំមុខគេ ដែលមានចំនួនស្មើនឹង១០ភាគរយ នៃចំនួននិស្សិតបរទេស ក្នុងប្រទេសបារាំង ទោះបីជាមានការថយចុះចំនួនបន្តិចបន្តួចក្ដី (-៣ភាគរយ)។ អាល់ហ្សេរី តាមពីក្រោយមាន ៨ភាគរយ ហើយចិនជាប់ចំណាត់ថ្នាក់លេខ ៣ មាន ៦ភាគរយ។

នៅឆ្នាំ២០២៤-២០២៥ តំបន់ចំនួន ៣ ដូចជា អនុតំបន់សាហារ៉ាអាហ្រ្វិក អឺរ៉ុប និងអាស៊ី-អូសេអានី បញ្ជូនសិស្សទៅសិក្សានៅប្រទេសបារាំងច្រើនជាងឆ្នាំមុនៗ។

អនុតំបន់សាហារ៉ាអាហ្វ្រិកបានកើនឡើងចំនួននិស្សិតច្រើនបំផុត ដោយមានកំណើនកើនឡើងដល់ ៧ភាគរយ បើបៀបធៀបទៅនឹងឆ្នាំមុន ដែលជំរុញដោយការមកដល់របស់និស្សិតមកពីប្រទេសបេនីន, នីហ្សេរីយ៉ា, កាមេរ៉ូន, ម៉ាដាហ្គាស្កា, ហ្គីណេ និងសាធារណរដ្ឋប្រជាធិបតេយ្យកុងហ្គោ។

អគ្គនាយក Campus France លោក Donatienne Hissard បាននិយាយថា «ការចល័តរបស់និស្សិតទៅកាន់ប្រទេសបារាំង បានកើនឡើងល្បឿនយ៉ាងលឿន ក្នុងបរិបទនិស្សិតអន្តរជាតិ ដែលមានភាពមិនប្រាកដប្រជា។»

ចំនួននិស្សិតបរទេសបានកើនឡើងនៅគ្រប់គ្រឹះស្ថានអប់រំក្នុងប្រទេសបារាំង ដោយមានកំណើនជាប់ជាលំដាប់ បើធៀបទៅនឹងឆ្នាំមុន។ សាកលវិទ្យាល័យជាច្រើន បន្តធ្វើជាម្ចាស់ផ្ទះ នៃនិស្សិតអន្តរជាតិក្នុងចំនួនដ៏ច្រើន (៦៣ភាគរយ) ជាមួយនឹងកំណើន ៣ភាគរយ ពីមួយឆ្នាំទៅមួយឆ្នាំ។

ប្រព័ន្ធអប់រំកម្រិតឧត្តមសិក្សារបស់ប្រទេសបារាំង ត្រូវបានគេចាត់ទុកជាប្រព័ន្ធបើកចំហ និងចម្រុះបំផុតមួយនៅក្នុងពិភពលោក ជាមួយនឹងស្ថាប័នអប់រំជាង ៣,៥០០ កន្លែង រួមទាំងឈ្មោះដ៏មានកិត្យានុភាព ដូចជា សាកលវិទ្យាល័យ PSL, វិទ្យាស្ថានពហុបច្ចេកទេសប៉ារីស, សាកលវិទ្យាល័យ Sorbonne និងសាកលវិទ្យាល័យ Paris-Saclay ។

ផ្ទុយទៅវិញ ចំនួននិស្សិតអន្តរជាតិ ដែលចុះឈ្មោះចូលរៀន នៅក្នុងស្ថាប័នរបស់សហរដ្ឋអាមេរិក ចាប់ពីខែមីនា ឆ្នាំ ២០២៤ ដល់ខែមីនា ឆ្នាំ២០២៥ បានធ្លាក់ចុះចំនួន ១១ភាគរយ ដែលអាចធ្វើឱ្យសេដ្ឋកិច្ចអាមេរិកខាតបង់ រហូតដល់ ៤ពាន់លានដុល្លារ, នេះបើយោងតាមទិន្នន័យពីប្រព័ន្ធព័ត៌មានសិស្ស និងការផ្លាស់ប្ដូរអ្នកទស្សនា ដែលគ្រប់គ្រងដោយ ក្រសួងសន្តិសុខមាតុភូមិសហរដ្ឋអាមេរិក៕