របៀបចិញ្ចឹមកូន និងវិធីសាស្ត្រចិញ្ចឹមកូនឱ្យមានគុណភាពជីវិតល្អប្រសើរ បានផ្លាស់ប្តូរនិងប្រែប្រួលពីមួយថ្ងៃទៅមួយថ្ងៃ ។ ការចិញ្ចឹមកូនតាមបែបវិជ្ជមានជាទ្រឹស្តីនៃការអប់រំកុមារថ្មី ដែលតម្រូវឱ្យម្តាយឪពុក និងអ្នកពាក់ព័ន្ធចូលរួមឱ្យបានសកម្ម ។ គេបានកត់សម្គាល់ថា ម្តាយឪពុកជាតួអង្គចម្បងបំផុត ជំរុញដល់ការអប់រំកុមារឱ្យមានឥរិយាបថរស់នៅវិជ្ជមាន និងអប់រំកូនឱ្យក្លាយជាយុវជនដែលមានថាមពល ព្រមទាំងក្លាយជាពលរដ្ឋល្អសម្រាប់សង្គម ។ ខាងក្រោមនេះ AMS អប់រំ សូមបង្ហាញពីកត្តាសំខាន់ៗបីចំណុច ចូលរួមកសាងគុណភាពជីវិតកុមារ ដែលម្តាយឪពុកមិនគួរមើលរំលង ។

១. កត្តាកុមារខ្លួនឯង ៖ ចរឹកលក្ខណៈ ឬអត្តចរឹករបស់កូនជាសំណុំចំណុចសំខាន់ដែលម្តាយឪពុកគួរយល់ដឹងមុននឹងអប់រំកូន ។ ចរឹកលក្ខណៈ ឬអត្តចរឹករបស់កូនកើតចេញពីរូបភាពដែលកូនបានយកគំរូតាមម្តាយឪពុក ឬបរិស្ថានដែលពួកគេរស់នៅជាមួយ ។ ប្រសិនបើម្តាយឪពុកចង់អប់រំកូនឱ្យមានឥរិយាបថរស់នៅវិជ្ជមាន ដរាបណាម្តាយឪពុកមានឥរិយាបថរស់នៅវិជ្ជមាន ព្រមទាំងមានវិធីសាស្ត្រចិញ្ចឹមកូនតាមបែបវិជ្ជមាន ។ ភាពទន់ភ្លន់របស់កូនឆ្លុះបញ្ចាំងលទ្ធភាព នៃការអប់រំកូនរបស់ម្តាយឪពុក ។

២. កត្តាគ្រួសារ ៖ ទន្ទឹមនឹងគំរូភាពវិជ្ជមានសម្រាប់កូន ការយកចិត្តទុកដាក់អប់រំកូន និងចំណាយពេលវេលាជាមួយកូនឱ្យបានច្រើន ជាគន្លឹះសំខាន់ជួយឱ្យកូនទទួលបានភាពកក់ក្តៅ ។ ភាពកក់ក្តៅ និងមនោសញ្ចេតនាក្តីស្រឡាញ់នៅក្នុងគ្រួសារមានឥទ្ធិពលដល់អនាគតនៃទំនាក់ទំនងរបស់កូន ។ សកម្មភាពបង្រៀនកូនជាប្រចាំ ឆ្លើយសំណួរកូនដោយឆ្លាតវៃ ផ្តល់ឱកាសឱ្យកូនធ្វើឡើងវិញនៅពេលមានកំហុស និងស្តាប់កូនដោយហេតុផល គឺជារបៀបចិញ្ចឹមកូនបែបវិជ្ជមាន និងមានប្រសិទ្ធភាពបំផុត ។

៣. កត្តាសង្គម ៖ សាលារៀនជាទីតាំងដែលកុមារឈានជើងចូលដំបូងបំផុតក្នុងការទំនាក់ទំនងសង្គមខាងក្រៅ ។ ការបញ្ជូនកូនទៅសាលារៀន មិនមែនជាសកម្មភាពអប់រំកូនពេញលេញឡើយ វាគ្រាន់តែជាចំណែកតូចមួយក្នុងការគាំទ្រដល់ការអប់រំរបស់កូនតែប៉ុណ្ណោះ ។ ផ្ទុយទៅវិញ ការបញ្ជូនកូនទៅសាលារៀនក្លាយជាសកម្មភាពសន្សំទ្រព្យទុកឱ្យកូន និងជំរុញឱ្យកូនមានទំនាក់ទំនងវិជ្ជមាននៅក្នុងសង្គម ។

ជាមួយគ្នានេះដែរ ម្តាយឪពុកត្រូវមានទំនាក់ទំនងល្អជាមួយសាលារៀន ហើយកិច្ចសហការអប់រំបង្រៀនកូនពីម្តាយឪពុកជាជំនួយដ៏មានប្រសិទ្ធភាព ។ ការអប់រំសម័យទំនើប ម្តាយឪពុកត្រូវជំរុញអប់រំជាប្រចាំ តាមដានសកម្មភាពកូន កត់សម្គាល់ឥរិយាបថកូន និងបណ្តុះនិស្ស័យកូនឱ្យក្លាយជាមនុស្សមានសីលធម៌សង្គមដ៏ប្រសើរ ។

គួរបញ្ជាក់ថា សកម្មភាពចិញ្ចឹមកូនជាកាតព្វកិច្ចតជំនាន់ ដែលម្តាយឪពុកមិនគួរមើលរំលងពីរបៀបចិញ្ចឹមកូន ។ មូលធនមនុស្ស និងគុណភាពធនធានមនុស្សជំនាន់ក្រោយរបស់សង្គមមួយ គឺអាស្រ័យទាំងស្រុងលើគុណភាពនៃការអប់រំកូនផ្តើមចេញពីគ្រួសារនីមួយៗនាពេលបច្ចុប្បន្ន៕