ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការពង្រឹងភាពបត់បែនក្នុងការធ្វើសេចក្ដីសម្រេចចិត្ត គឺជាការរួមចំណែកកាត់បន្ថយភាពមន្ទិលក្រោយការជ្រើសនូវជម្រើសមួយ ដែលមិនស្របនឹងការរំពឹងទុក ជាងនេះទៅទៀតគឺជាការជំរុញស្មារតីឱ្យផ្តោតទៅលើបច្ចុប្បន្នភាព ឬផ្តោតលើសកម្មភាពដែលអាចគ្រប់គ្រងបាន។
ត្បិតការសម្រេចចិត្ត ជាសកម្មភាព និងជាជំនាញមួយ ដែលត្រូវធ្វើរាល់ថ្ងៃក៏ពិតមែន តែចាំបាច់ត្រូវការគន្លឹះបន្ថែម ឬវិធីសាស្រ្ត ក្នុងការហ្វឹកហ្វឺនរាល់ថ្ងៃ ដើម្បីជំរុញជំនាញនៃការសម្រេចចិត្តឱ្យកាន់តែប្រសើរជាងមុន។ ដោយហេតុថា ទោះបីជាបានយកចិត្តទុកដាក់សិក្សាអំពីការសម្រេចចិត្តបែបណាក៏ដោយ ម្តងម្កាលលោកអ្នកគង់នឹងជួបប្រទះនូវបញ្ហាស្មុគស្មាញ ពិបាកជ្រើស ឬគាំងគំនិតជាដើម។
ហើយភាពស្មុគស្មាញមួយដែលមនុស្សអាចនឹងជួបប្រទះនៅពេលសម្រេចចិត្ត គឺនៅពេលដែលមានជម្រើសច្រើន តែអាចជ្រើសបានតែមួយ! ដែលជាដំណាក់កាលមួយត្រូវជ្រើសឱ្យល្អបំផុតតាមដែលអាចធ្វើបាន ស្ថិតក្នុងកាលៈទេសៈនេះ មនុស្សភាគច្រើនបារម្ភខ្លាំងក្នុងការសម្រេចចិត្តខុស ឬការបង្កហានិភ័យចំពោះខ្លួនឯងនិងមនុស្សជុំវិញខ្លួន។
គួរកត់សម្គាល់ដែរថា ចំណុចវិជ្ជមាន និងអវិជ្ជមាន នឹងដើរមកទន្ទឹមគ្នាកំឡុងពេលត្រូវជ្រើសអ្វីមួយ។ ការសម្រេចចិត្តពុំមានខុស ឬត្រូវនោះទេ ព្រោះនៅក្នុងជម្រើសនីមួយៗ តែងភ្ជាប់មកជាមួយនូវចំណុចល្អ និងមិនល្អ។ យ៉ាងណា ក្នុងការស្រូបឱ្យបាននូវចំណុចវិជ្ជាមានឱ្យបានច្រើន គឺទាមទារឱ្យមានការវិភាគថ្លឹងថ្លែងថា តើឆ្លើយតបនឹងតម្រូវការជាក់ស្ដែងកម្រិតណា និងការប្រមើលមើលពីលទ្ធផលផងដែរ។
តាមរយៈ Psychology Today ដើម្បីកាត់បន្ថយភាពមន្ទិល ឬអាការស្តាយក្រោយទៅលើការសម្រេចចិត្ត គឺត្រូវដឹងឱ្យច្បាស់អំពីអ្វីទៅជាជម្រើសដ៏សាកសមសម្រាប់ខ្លួនឯង ឬក្រុម ហើយការសម្រេចចិត្តជ្រើសមនុស្សត្រូវ សកម្មភាពយកមកអនុវត្តន៍ត្រូវ ឬក៏ឱកាសត្រូវ គឺទាមទារឱ្យចងចាំនៅក្នុងចិត្តអំពីគុណតម្លៃ និងគោលបំណង។ សម្រាប់អ្នកធ្វើការផ្ទាល់លើការសម្រេចចិត្តអាចថា មានជំនាញ និងទម្លាប់វិភាគជាប្រចាំភ្ជាប់មកជាមួយ ពួកគេហាក់មិនសូវមានបញ្ហាប្រឈមខ្លាំងនោះទេ ប៉ុន្តែជំនាញនៃការសម្រេចចិត្តមិនមែនជារឿងសាមញ្ញពេកទេ បើនិយាយចំពោះមនុស្សជាទូទៅ ព្រោះការបារម្ភអំពីការរើសខុស និងខ្លាចភាពស្តាយក្រោយ សុទ្ធសឹងតែជាឧបសគ្គជំរុញឱ្យមនុស្សរារែក ឬក៏រារាំងមិនហ៊ានសម្រេចចិត្តតែម្តង។
ឆ្លើយតបទៅនឹងកត្តាប្រឈមទាំងនេះ មានគន្លឹះចំនួន៨ចំណុច ដែលគេអាចយកមកប្រើប្រាស់នៅពេលត្រូវ សម្រេចចិត្តសំខាន់ៗ ក៏ដូចជាវិធីក្នុងការទប់ទល់នៅពេលមានការសម្រេចចិត្តមិនត្រូវនឹងការរំពឹងទុក។ ដោយគន្លឹះទាំងនោះមានដូចជា ការពិនិត្យផ្ទៀងផ្ទាត់រាល់ជម្រើសទាំងអស់, រកមើលឱ្យឃើញនូវគុណតម្លៃនៃជម្រើសនីមួយៗ, ផ្តោតទៅលើគោលដៅជាចម្បង, ធ្វើតារាង និងសរសេរអំពីផលវិជ្ជមាននិងអវិជ្ជមាន, គូសវាសនូវភាពវិជ្ជមាននៅពេលខាងមុខអំពីការសម្រេចចិត្តជ្រើសជម្រើសណាមួយ, សម្រេចចិត្តឱ្យដូចជាការផ្តល់យោបល់ទៅកាន់អ្នកដទៃ, ស្វែងរកបុគ្គលដែលមានជំនាញឬមានបទពិសោធន៍រួចសុំការប្រឹក្សាបន្ថែម និងជាចុងក្រោយ គឺការមើលឡើងវិញ ឆ្លុះបញ្ចាំង និងប្តេជ្ញាចិត្តក្នុងការបន្តអនុវត្តន៍រាល់គន្លឹះដែលបានរៀបរាប់ទាំងអស់៕
