ការបង្រៀនកូនកុំឱ្យក្លាយជាមនុស្សសម្ភារៈនិយម គឺជាការងារដែលត្រូវការពិចារណា និងការប្តេជ្ញាចិត្ត ។ ខាងក្រោមនេះ គឺជាវិធីចំនួន៥ ដែលឪពុកម្តាយ ឬអ្នកអាណាព្យាបាលអាចប្រើដើម្បីបង្រៀនកូនរបស់លោកអ្នកឱ្យចេះគិតពិចារណា ក្នុងការរស់នៅដោយភាពសាមញ្ញ មិនសម្ភារៈនិយម។
១. ធ្វើជាគម្រូ ៖ បង្ហាញពីការរស់នៅដោយភាពសាមញ្ញ និងតាមលទ្ធភាពរបស់អ្នក ដោយចេះកាត់បន្ថយការចំណាយ ប្រើសម្ភារៈមិនទំនើបពេក ប្រើសម្លៀកបំពាក់ឱ្យបានយូរ ប្រើទូរស័ព្ទឱ្យបានច្រើនឆ្នាំជាដើម… នោះកូននឹងរៀនអំពីលំដាប់លំដោយអាទិភាព នៃការចំណាយ ព្រោះកូនភាគច្រើនស្តាប់ និងធ្វើតាមគំរូរបស់ឪពុកម្តាយ។
២. ដាក់គោលការណ៍ក្នុងការទិញទំនិញ ៖ កំណត់ចំនួនលុយដែលកូនអាចប្រើប្រាស់ និងបង្ហាញអំពីសារៈសំខាន់នៃទ្រព្យសម្បត្តិ ពេលចូលទៅកាន់ហាងទំនិញ។ អនុវត្តការទិញត្រឹមត្រូវ និងគិតគូរលើសារៈសំខាន់នៃវត្ថុមួយៗមុនពេលទិញ។
៣. ប្រាប់រឿងនិទាន ៖ ចែករំលែករឿងនិទាន ឬរឿងប្រវត្តិសាស្រ្តដែលបង្ហាញពីតម្លៃនៃការខិតខំប្រឹងប្រែង និងការរស់នៅដោយភាពសាមញ្ញ។
៤. ផ្តោតលើតម្លៃនៃទំនាក់ទំនង ៖ ក្មេងៗពិបាកយល់ថា ទំនាក់ទំនងមានតម្លៃជាងសម្ភារៈ, ក្មេងៗជាច្រើនពិតជាចង់បាន iPhone ជាជាងឪពុក ឬម្តាយ។ សូមបង្រៀនកូនរបស់អ្នកឱ្យយល់ថា មានឪពុកម្តាយ បងប្អូន និងមិត្តភក្តិ ប្រសើរជាងមានលុយរាប់ពាន់លានដុល្លារ។ ដើម្បីបង្កើនទំនាក់ទំនងក្នុងគ្រួសារថែមទៀត ឪពុកម្តាយអាចនាំកូនៗចូលរួមក្នុងសកម្មភាព ដូចជាការអានសៀវភៅ លេងកីឡា និងការងារស្ម័គ្រចិត្តក្នុងសហគមន៍ជាដើម ។
៥. ជួសជុលអ្វីៗជាមួយគ្នា ៖ មធ្យោបាយដ៏ល្អបំផុតមួយក្នុងការបង្រៀនកូនកុំឱ្យក្លាយជាមនុស្សសម្ភារៈនិយម គឺត្រូវឱ្យតម្លៃលើគុណភាព នៃវត្ថុដែលអ្នកមាន ជាជាងបរិមាណ។ ឧទាហរណ៍ រៀនពីរបៀបថែទាំម៉ាស៊ីនបោកគក់ ឬកង់ដែលពួកគេជិះ ជំនួសឱ្យការទិញថ្មី។ សព្វថ្ងៃនេះ អ្នកអាចទិញគ្រឿងបន្លាស់ទាំងអស់ដែលអ្នកត្រូវការតាមអ៊ីនធឺណិត ហើយមើលវីដេអូណែនាំតាម Youtube អំពីការប្តូរគ្រឿងបន្លាស់។ នៅពេលអ្នកឱ្យកូនជួយក្នុងការជួសជុល ហើយនិយាយជាមួយពួកគេអំពីរបៀបដែលអ្នកអាចសន្សំបានដោយមិនចាំបាច់ទិញថ្មី វាមានឥទ្ធិពលណាស់ក្នុងការសម្រួចឥរិយាបទសន្សំសំចៃ និងការឱ្យតម្លៃលើវត្ថុដែលពួកគេកំពុងមាន៕
