សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា នៅព្រឹកថ្ងៃទី៥ ខែតុលា ឆ្នាំ​២០២៣ ក្នុង​ឱកាស​ចូលរួមទិវាគ្រូបង្រៀន បានប្រកាសដាក់​ឱ្យ​ប្រើប្រាស់​ជាផ្លូវការ​នូវ «ស្តង់ដាសាលារៀនគំរូ និង​ពានរង្វាន់សាលាគំរូសម្តេចមហាបវរធិបតី» សម្រាប់​សាលា​រៀន​ដែល​សម្រេច​ស្តង់ដារសាលារៀន​គម្រូ ចាប់ពីឆ្នាំ​សិក្សា​២០២៣-២០២៤។

បើតាម​ប្រសាសន៍របស់សម្តេចធិបតី ការដាក់​ឱ្យ​ប្រើប្រាស់​ស្តង់ដាសាលារៀនគំរូ គឺដើម្បីឱ្យ ១). សាលារៀនមានគណនេយ្យភាពជាមួយ​សហគមន៍ និង​សម្រេច​បាន​ស្តង់ដាសាលារៀនគម្រូ, ២). សាលារៀនមានស្វ័យភាពកែលម្អសាលារៀន ថ្នាក់រៀន និងផ្តល់ការអភិវឌ្ឍវិជ្ជាជីវៈជាប្រចាំដល់គណៈគ្រប់គ្រងសាលារៀន និងគ្រូបង្រៀន, ៣). សិស្សមានសមត្ថភាព និង​ធ្វើតេស្តស្តង់ដារប្រកបដោយ​តម្លាភាព និង​យុត្តិធម៌, ៤). គ្រូបង្រៀន​អាចប្រើប្រាស់លទ្ធភាពតេស្តដើម្បីកែលម្អការបង្រៀន និងការអភិវឌ្ឍគុណវុឌ្ឍជាប្រចាំ ហើយ​ថែមទាំងអាចជួយសិស្សរៀនយឺត និង​ផ្តល់ព័ត៌មានត្រឡប់ទៅមាតាបិតា អាណាព្យាបាល និង​សហគមន៍វិញបានទាន់ពេលវេលា, ៥). បង្កើន​សកម្មភាពក្រៅម៉ោងសិក្សាដើម្បីអប់រំគុណធម៌ សីលធម៌ សុជីវធម៌ដល់ សិស្សានុសិស្ស, ៦). មានការយកចិត្តទុកដាក់​លើគុណភាពសិក្សា និង​អាហារូបត្ថម្ភរបស់សិស្សានុសិស្ស និង ៧). មានការចូលរួមពីអាណាព្យាបាល មាតាបិតា និងសហគមន៍ក្នុងការគាំទ្រ និង​អភិវឌ្ឍសាលារៀន ឱ្យ​មានប្រសិទ្ធភាព។

ក្នុងនោះដែរ សម្រាប់រយៈពេល​២ឆ្នាំខាងមុខ សម្តេចនាយករដ្ឋមន្រ្តី ក៏​បានស្នើ​ដល់​ភាគី​ពាក់ព័ន្ធទាំងអស់​ចូលរួម​អភិវឌ្ឍ​សាលា​រៀន ចាប់ពីថ្នាក់មតេយ្យ ដល់មធ្យមសិក្សា​តាមគ្រប់រូបភាព និង​គ្រប់មធ្យោបាយ ទៅ​តាម​ស្តង់ដារទាំង​៥ ដែល​រួមមាន ៖

ទី១ លទ្ធផលសិក្សា​របស់សិស្ស ៖ ត្រូវ​កំណត់យកលទ្ធផលសិក្សា​របស់សិស្សជាគោល និង​កំណត់យកមុខវិជ្ជាភាសាខ្មែរ គណិតវិទ្យា និង​វិទ្យាសាស្រ្តជាមុខវិជ្ជាអាទិភាព។

ទី២ ការ​បង្រៀន និង​រៀន ៖ ត្រូវបង្កើតកម្មវិធីសិក្សាបន្ថែមដូចជាការបង្រៀនភាសាបរទេស កុំព្យូទ័រ បំណិនជីវិត​មូលដ្ឋាន ដោយត្រូវរៀបចំកម្មវិធីក្រៅម៉ោងសិក្សា ដូចជាកម្មវិធីអភិវឌ្ឍយុវជន កម្មវិធីស្ម័គ្រចិត្តសហគមន៍ កម្មវិធីបរិស្ថាន និង​ត្រូវពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបទល្អរបស់បុគ្គលិកអប់រំ និងសិស្សានុសិស្ស ។

ទី៣ ការ​ចូលរួមរបស់សហគមន៍ និងមាតាបិតា ៖ ខ្ញុំសូមអំពាវនាវដល់មាតាបិតា អាណាព្យាបាល និងសហគមន៍ សូមជួយជំរុញការសិក្សារបស់សិស្ស និងទប់ស្កាត់ការបោះបង់ការសិក្សា ហើយ​លើកទឹកចិត្ត​ឱ្យ​កូនចូលរៀនសាលា​ឱ្យ​បានគ្រប់ៗគ្នា។

ទី៤ ដំណើរប្រតិបត្តិការរដ្ឋបាលរបស់សាលារៀន ៖ ត្រូវធ្វើអធិការកិច្ចផ្ទៃក្នុង និងការប្រជុំបច្ចេកទេស ហើយគណៈគ្រប់គ្រង និងគ្រូបង្រៀន ត្រូវ​បានទទួលការអភិវឌ្ឍសមត្ថភាពជាប្រចាំ។

ទី៥ គណនេយ្យភាពរបស់សាលារៀន ៖ គ្រូបង្រៀនត្រូវគោរពតាមសីលធម៌ វិជ្ជាជីវៈ ត្រូវបង្រៀនគ្រប់ម៉ោង​តាមកម្មវិធីសិក្សាដែលបានកំណត់ អង្គភាពថ្នាក់ជាតិ និងថ្នាក់ក្រោមជាតិ ត្រូវចុះពិនិត្យសាលារៀន ជួយ​គាំទ្រ និង​ផ្តល់ការហ្វឹកហាត់ប្រកបដោយប្រសិទ្ធភាព។

ជាមួយគ្នានេះ សម្តេចធិបតី ហ៊ុន ម៉ាណែត នាយករដ្ឋមន្រ្តី ក៏​បានស្នើ​ដល់​មាតាបិតា និងអាណាព្យាបាលទាំងអស់ ចូលរួម​ឱ្យ​កាន់តែស​កម្ម​នៅ​ក្នុងការ​ជួយ​អប់រំឱ្យ​មានចរិយាសម្បត្តិ សក្តិសមជាកុលបុត្រខ្មែរ ដែលមានអរិយធម៌ខ្ពង់ខ្ពស់ មានគុណធម៌ សីលធម៌ និងសុជីវធម៌ ព្រមទាំងដឹងគុណូបការៈចំពោះលោកគ្រូអ្នកគ្រូដែលបានបង្ហាត់បង្រៀនកូនខ្មែរឱ្យមានចំណេះដឹង ជំនាញសមត្ថភាព និងទេពកោសល្យ៕