ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវជន២១ មិនមែនគ្រាន់តែជាអ្នកប្រើប្រាស់បច្ចេកវិទ្យានោះទេ តែជាអ្នកដែលអាចបង្កើត ឬបញ្ជាបច្ចេកវិទ្យា ដើម្បីដោះស្រាយបញ្ហាសង្គម។ នេះជាការលើកឡើងរបស់ ឯកឧត្តម សេរី ជំនះ រដ្ឋលេខាធិការក្រសួងអប់រំ យុវជន និងកីឡា ក្នុងពិធីបើកវគ្គប្រកួតជម្រុះ ១០ក្រុម នៃកម្មវិធីយុវជន២១ (Yout21) ឆ្នាំ២០២៦ ក្រោមប្រធានបទ “ការចាប់ផ្តើមអាជីវកម្មបច្ចេកវិទ្យារបស់យុវជន ៖គំនិតវ័យក្មេង ការផ្លាស់ប្តូរពិត” កាលពីថ្ងៃអង្គារ (១៩ ឧសភា)។
បើតាម ឯកឧត្តម សេរី ជំនះ កម្មវិធីយុវជន២១ មិនត្រឹមតែជាវេទិកាប្រកួតប្រជែងប៉ុណ្ណោះទេ ប៉ុន្តែជាវេទិកាសិក្សា និងបណ្តុះបណ្តាលសំខាន់មួយ សម្រាប់អភិវឌ្ឍជំនាញសតវត្សរ៍ទី២១ និងជំរុញឱ្យយុវជនបម្លែងគំនិតច្នៃប្រឌិតទៅជាសកម្មភាពជាក់ស្តែង ដើម្បីរួមចំណែកអភិវឌ្ឍសង្គម និងសេដ្ឋកិច្ចជាតិ។
ឯកឧត្តមជំរុញឱ្យយុវជនកម្ពុជា ត្រូវបន្តអភិវឌ្ឍគំនិតច្នៃប្រឌិត និងសមត្ថភាពផ្ទាល់ខ្លួនឱ្យកាន់តែរីកចម្រើនថែមទៀត ដើម្បីការរីកចម្រើនរបស់សង្គមជាតិទៅថ្ងៃអនាគត។
«យុវជនត្រូវចាប់ផ្តើមពីតូចនៅថ្ងៃនេះ ដែលអាចនឹងក្លាយជាការផ្លាស់ប្តូរដ៏ធំនៅក្នុងសង្គមនាពេលអនាគត»
គួរជំរាបជូនថា កម្មវិធី “យុវជន២១” រៀបចំឡើងក្នុងគោលបំណងបណ្តុះបណ្តាល និងលើកកម្ពស់សមត្ថភាពយុវជនឱ្យមានចំណេះដឹងអំពីអាជីវកម្មឌីជីថល និងការច្នៃប្រឌិតក្នុងការបង្កើតគំនិតអាជីវកម្មសមស្របនឹងបរិបទសម័យថ្មី។ ក្នុងនោះ មានគ្រូដឹកនាំ និងបេក្ខនិស្សិតចំនួន ២៦ក្រុម សរុប ១៨២នាក់ មកពីគ្រឹះស្ថានឧត្តមសិក្សារដ្ឋ និងឯកជនចូលរួម។
តាមរយៈកម្មវិធីនេះ បេក្ខនិស្សិតនឹងទទួលបានជំនាញក្នុងការរៀបចំផែនការអាជីវកម្មបែបឌីជីថល ការគ្រប់គ្រងហិរញ្ញវត្ថុ និងការប្រើប្រាស់បច្ចេកវិទ្យាដើម្បីដោះស្រាយបញ្ហាសង្គម និងជំរុញការអភិវឌ្ឍប្រកបដោយចីរភាព៕
