កុមារដែលទទួលនូវបទពិសោធន៍ ពាក្យនិទ្ទា រិះគន់ សើចចំអក មិនថាទៅលើរូបរាងកាយ ឬសមត្ថភាព ពោល​គឺសកម្មភាពទាំងឡាយណាជំរុញឱ្យពួកគេអាម៉ាស់មុខ​ ឬអាប់កិត្តិយស តួយ៉ាងដូចជា បង្អាប់លើរូបរាង សម្បុរស្បែក និងភាពខ្វះចន្លោះណាមួយ មិនថាដោយចេតនាក្ដី និងអចេតនាក្ដី វាបានជំរុញឱ្យប៉ះពាល់ទៅកាន់សុខភាពផ្លូវចិត្តរបស់ពួកគេក្នុងរយៈពេលវែង និងថមថយនៃផលិតភាពការសិក្សាផងដែរ ដែលជាហេតុអាណាព្យាបាលចាំបាច់ត្រូវថែទាំផ្លូវចិត្តកុមារ ជាពិសេសនៅពេលពួកគេចាប់ផ្តើមមានអាការប្លែកៗ។

បើតាម​អ្នកជំនាញ កុមារត្រូវការចូលរួមក្នុងសង្គម និងត្រូវការទៅសាលា ដើម្បីទទួលការអប់រំ ដែលជាកាតព្វកិច្ចមួយតម្រូវឱ្យពួកគេ ត្រូវប្រឈមមុខនឹងមនុស្សដែលមានចរិតចម្រុះ ហើយក្នុងកាលៈទេសៈនេះដែរ គឺជាពេលមួយដែលកុមារអាចប្រឈមនឹងការសើចចំអក ឬដៀមដាមលេងសើច ខណៈផ្លូវចិត្តកុមារកំពុងផុយស្រួយនៅឡើយ។

ក្នុងនាមជាអាណាព្យាបាល ការថែទាំ និងការអប់រំកុមារ ចាំបាច់ត្រូវការសង្កេត និងពឹងអាស្រ័យទៅកាន់គ្រប់ភាគីដែលពាក់ព័ន្ធ តួយ៉ាងដូចជា ការប្តូរយោបល់ជាមួយអាណាព្យាបាលដទៃ ជជែកជាមួយអ្នកថែទាំកូនៗ កន្លែងឬស្ថាប័នអប់រំ និងអ្នកប្រឹក្សាជាដើម។ យោងតាម Teen life បានប្រាប់ចំណុចសំខាន់ៗ ក្នុងការតាមដានកូនៗ និងរួមចំណែកកាត់បន្ថយ ក៏ដូចជាដោះស្រាយភាពតានតឹងដែលកើតមានចំពោះកូនៗ ជាពិសេសនៅពេលពួកគេទទួលពាក្យនិទ្ទាពីមជ្ឈដ្ឋានខាងក្រៅ ដោយមានរៀបរាប់នៅខាងក្រោម ៖

កត់សម្គាល់ពីភាពប្រែប្រួល ៖ ប្រសិនបើសុខៗកូនៗស្រាប់តែមានភាពប្រែប្រួលខុសពីធម្មតា ដូចជាមានអារម្មណ៍ភ័យខ្លាច ឬក៏ប្រែប្រួលចិត្តលឿនខុសពីសព្វមួយដង អាណាព្យាបាលគួរយកចិត្តទុកដាក់ និងសង្កេតបន្ថែម ថា តើមានអ្វីកើតឡើងខ្លះ? ការរកឱ្យឃើញពីការគំរាមកំហែងជាផ្នែកសំខាន់ហើយ ជាងនេះទៅទៀត មិនត្រឹមតែពិនិត្យតែសញ្ញាដែលលេចចេញតាមរយៈអារម្មណ៍ប៉ុណ្ណោះទេ រាងកាយក៏ដូចគ្នាដែរ! រកមើលបន្ថែមថា តើកុមារមានស្នាមរបួសដែរទេ ទោះសញ្ញានៅក្នុងកម្រិតស្រាលក្ដី គឺត្រូវតែយកចិត្តទុកដាក់តាមដានឱ្យបានជាប់ជាប្រចាំ។

បញ្រ្ជាបចំណេះដឹងអំពីភាពអវិជ្ជមាន នៃសកម្មភាពនិន្ទាគ្នា ៖ ក្រៅតែពីការស្វែងរកវិធីសាស្រ្តក្នុងការ​ ការពារពួកគេ គួរប្រាប់ឱ្យកុមារបានដឹងដែរថា ហេតុអ្វីកុមារមិនគួរនិយាយ ​តិះដៀល​​ ឬការរិះគន់​ទៅលើរាងកាយ និងសម្បុរស្បែក។ ប្រសិនបើអាច គួរបញ្ជូនពួកគេឱ្យបានចូលរួមវគ្គបង្ហាញទិសខ្លីៗណាមួយដែលមាននៅជិតៗកន្លែងរស់នៅ ហើយលើកទឹកចិត្តឱ្យពួកគេមានទម្លាប់បង្ហាញអារម្មណ៍ ឬប្រាប់អាណាព្យាបាលភ្លាមៗ ប្រសិនបើមានការតិះដៀលកើតមានមកលើពួកគេ។ ហើយចំណុចសំខាន់មួយទៀតនៅពេលបច្ចុប្បន្ន គឺការគ្រប់គ្រងកម្មវិធីឌីជីថល ពីសំណាក់អាណាព្យាបាលដើម្បីកាត់បន្ថយការគំរាមកំហែង ទាំងដោយផ្ទាល់ និងដោយប្រយោល៕