ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសន្និសីទថ្នាក់តំបន់អាស៊ី-ប៉ាស៊ីហ្វិកស្តីពីការអភិវឌ្ឍកុមារតូចឆ្នាំ២០២៥ នៅទីក្រុងម៉ានីល ប្រទេសហ្វីលីពីន កាលពីពេលថ្មីៗនេះ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា និងជាអនុប្រធានប្រចាំការ នៃគណៈកម្មាធិការជាតិគាំពារ និងអភិវឌ្ឍន៍កុមារតូច បានលើកឡើង១០ចំណុចពីឧត្តមានុវត្តន៍ របស់រាជរដ្ឋាភិបាលកម្ពុជា ចំពោះការគាំពារ និងអភិវឌ្ឍន៍កុមារតូច។
លោកជំទាវបណ្ឌិត គឹម សេដ្ឋានី លើកឡើងដោយផ្សារភ្ជាប់ប្រធានបទស្នូល នៃសន្និសីទ ៖ តួនាទីអភិបាលកិច្ចដ៏មានប្រសិទ្ធភាពរបស់រដ្ឋបាលថ្នាក់ក្រោមជាតិក្នុងការផ្តល់សេវាអភិវឌ្ឍកុមារតូច មានគុណភាពខ្ពស់ប្រកបដោយសមធម៌ និងបរិយាបន្ន។ ដែលត្រូវបានគាំទ្រដោយសកម្មភាពសំខាន់ៗជាច្រើនរួមមាន ៖
ទី១. ការពង្រីកសាលាមត្តេយ្យសិក្សា ៖ ក្នុងឆ្នាំសិក្សា ២០២៤-២០២៥ កម្ពុជាមានសាលាមត្តេយ្យសរុប ៩០៣៦ កន្លែង រួមមាន សាលាមត្តេយ្យសាធារណៈ ៤៧២៥ កន្លែង សាលាមត្តេយ្យឯកជន ៩៦៣ កន្លែង និងសាលាមត្តេយ្យសហគមន៍ ៣៣៤៨ កន្លែង។ ក្រៅពីនេះ មានទារកដ្ឋានតាមសហគមន៍ចំនួន ១៣កន្លែង ដែលស្ថិតនៅជិតរោងចក្រកាត់ដេរ សម្រាប់កូនគ្រួសារដែលជាកម្មករ។
ទី២. ការអភិវឌ្ឍន៍ស្តង់ដារមត្តេយ្យសិក្សាគំរូ ៖ សម្រាប់ធានាប្រសិទ្ធភាព និងគុណភាពអប់រំកុមារតូចដែលសមស្របទៅនឹងស្ថានភាព និងបរិបទ នៃប្រទេសកម្ពុជា។
ទី៣. ការបង្កើតស្ដង់ដារអប្បបរមាសម្រាប់មត្តេយ្យសិក្សាសហគមន៍ ៖ ក្នុងឆ្នាំ២០២៣-២០២៤ ថ្នាក់មត្តេយ្យសិក្សាសហគមន៍ចំនួន ១៤៣៨ ថ្នាក់ បានបំពេញតាមស្ដង់ដារអប្បបរមា។
ទី៤. ការអភិវឌ្ឍកញ្ចប់កម្មវិធីអប់រំមាតាបិតា ស្តីពីការថែទាំបីបាច់កុមារតូច។
ទី៥. ការផ្តោតលើការរៀនសូត្រពីចិត្តសង្គម និងអារម្មណ៍សម្រាប់កុមារតូច (SEL)។
ទី៦. ការអនុវត្តកម្មវិធីសិក្សាលម្អិត និងវិធីសាស្រ្តបង្រៀនថ្មីៗ។
ទី៧. ការអនុវត្តយន្តការពហុវិស័យ ៖ តាមរយៈគណៈកម្មាធិការជាតិគាំពារ និងអភិវឌ្ឍន៍កុមារតូច បានប្រមូលផ្ដុំក្រសួងជំនាញនានា និងដៃគូអភិវឌ្ឍន៍ដើម្បីសម្របសម្រួលកិច្ចខិតខំប្រឹងប្រែងទាំងនៅថ្នាក់ជាតិ និងថ្នាក់ក្រោមជាតិក្នុងការគាំពារ និងអភិវឌ្ឍន៍កុមារតូច។
ទី៨. ការបញ្ចូលការអប់រំអំពីការប្រែប្រួលអាកាសធាតុ ដើម្បីឱ្យកុមារតូចមានភាពធន់។ ទី៩. ការអប់រំបរិយាបន្ន និងការអប់រំពិសេសដល់កុមារមានពិការភាព និង ទី១០. ការផ្ទេរមុខងារអប់រំកុមារតូចទៅឱ្យរដ្ឋបាលក្រុង ស្រុក និងខណ្ឌ។
គួរជំរាបជូនថា សន្និសីទថ្នាក់តំបន់អាស៊ីប៉ាស៊ីហ្វិកប្រចាំឆ្នាំ២០២៥ ស្តីពីការអភិវឌ្ឍន៍កុមារតូច បានប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី១ ដល់ថ្ងៃទី៣ ខែកក្កដា ឆ្នាំ២០២៥ នៅទីក្រុងម៉ានីលឡា ប្រទេសភីលីពីន ដោយផ្តោតលើការសន្ទនា កិច្ចសហការ និងការប្តេជ្ញាចិត្តរួមគ្នា ដើម្បីលើកកម្ពស់ការគាំពារ និងអភិវឌ្ឍន៍កុមារតូចប្រកបដោយសមធម៌ និងបរិយាបន្ននៅទូទាំងតំបន់៕
