សុខភាពហិរញ្ញវត្ថុគឺជាផ្នែកសំខាន់ នៃជីវិតប្រចាំថ្ងៃ ប៉ុន្តែជាញឹកញាប់ យើងមិនសូវដឹងទេថា ទម្លាប់តូចៗ ឬការសម្រេចចិត្តដោយ​មិន​បាន​គិតគូរវែងឆ្ងាយ អាចប៉ះពាល់យ៉ាងធ្ងន់ធ្ងរដល់ស្ថានភាពហិរញ្ញវត្ថុរបស់យើងក្នុងរយៈពេលវែង។

តាមរយៈគេហទំព័រ Power of Positivity បានបង្ហាញអំពីទម្លាប់អវិជ្ជមាន​មួយ​ចំនួន​ដែល​លោកអ្នក​គួរចៀសវាង និងវិធីកែលម្អឡើងវិញ ៖

១. មិនធ្វើផែនការហិរញ្ញវត្ថុ ៖ ការធ្វើផែនការចំណាយចំណូលគឺជាមូលដ្ឋានគ្រឹះ នៃសុខុមាលភាពហិរញ្ញវត្ថុ ដែលមិនគួរមើលរំលងសម្រាប់មនុស្សទូទៅ ជារឿយៗ សកម្មភាពមួយនេះបានអនុវត្តន៍ទៀងទាត់តែអ្នកធ្វើអាជីវកម្ម ការលក់ដូរ ឬការរកស៊ីទូរទៅតែប៉ុណ្ណោះ ខណៈសកម្មភាពបែបនេះ គឺឆ្លើយតបនឹងទម្លាប់ចាយវាយរបស់មនុស្សជាទូទៅ។ ផែនការ ឬការកត់ត្រាអំពីហិរញ្ញវត្ថុផ្ទាល់ខ្លួន ប្រៀបដូចទៅនឹងផែនទីដែរ ព្រោះកាលណាយើងបានកំណត់ទិសដៅ ហើយស្គាល់ពីផែនទីច្បាស់ វាក៏នឹងផ្តល់ភាពងាយស្រួលក្នុងការបញ្ចៀសពីការវង្វេង ​ឬការភ័យខ្លាច ជំនួសមកវិញនូវការបង្កើនភាពជឿជាក់ចំពោះខ្លួនឯងបានរឹងមាំជាងមុន។

២. ទិញសម្ភារទាំងមិនបានទុកចន្លោះគិតពិចារណា ៖ ការទិញដោយមិនបានពិចារណា ជារឿយៗកើតមាននៅពេលទិញអ្វីមួយ ដោយផ្អែកលើអារម្មណ៍ចង់បាន ជាជាងតម្រូវការជាក់ស្តែងពិតប្រាកដ ដើម្បីមានពេលក្នុងការពិចារណាលើការទិញអ្វីមួយ គួរកុំទិញពេលឃ្លានខ្លាំង កុំទិញពេលកំពុងមានការបញ្ចុះតម្លៃប្រកបដោយភាពទាក់ទាញពេក! គួរទិញនៅពេលដែលដឹងថា សម្ភារទាំងនោះ លោកអ្នកពិតជាត្រូវការដោយអត់ពុំបាន។

៣. មិនផ្តល់អាទិភាពលើការសន្សំ ៖ ភាពអាសន្នតែងតែកើតមានគ្រប់ពេល គ្រប់វេលា ដោយឡែក ការត្រៀមទុកមុន ទោះពុំអាចដោះស្រាយបញ្ហាបានទាំងស្រុងក៏ពិតមែន! ប៉ុន្តែក៏បានចូលរួមចំណែកសម្រាលបន្ទុក និងការជៀសវាងពីកម្ចីដែលពុំចាំបាច់នានា។ អ្នកដែលពុំបានសន្សំ នៅពេលមានហានិភ័យកើតមានម្តងៗ ពួកគេងាយនឹងរងគ្រោះដោយសារប្រាក់កម្ចីដែលមានការប្រាក់ខ្ពស់ ឬការលក់សម្ភារល្អៗក្នុងតម្លៃមួយដែលទាបខ្លាំង។ ការសន្សំពុំមែនមានន័យថា ការដកប្រាក់ចំណូលដែលរកបានទៅក្នុងការសន្សំក្នុងចំនួនដ៏ច្រើនទេ ប៉ុន្តែជាការមានទម្លាប់ដកហូតប្រាក់ដែលរកបានក្នុងចំនួនមួយដែលមិនប៉ះពាល់ដល់តម្រូវការចាំបាច់ ​ទៅក្នុងកញ្ចប់សន្សំទោះតិចក្ដីច្រើនក្ដី ប៉ុន្តែអ្វីដែលសំខាន់ គឺការអនុវត្តន៍បានជាប្រចាំ។

៤. ការបន្ថែមបំណុលដែលពុំចាំបាច់ ៖​ បំណុលពុំមែនជារឿងមិនល្អនោះទេ ប៉ុន្តែប្រសិនបើ ប្រើប្រាស់បំណុលមិនឆ្លើយតបជាមួយលទ្ធភាពខ្លួនឯង ឬក៏ការធ្វើឱ្យខ្លួនឯងមានបំណុលដែលមិចាំបាច់កើតមានជាហូរហែ វាបង្ហាញឱ្យឃើញអំពីហានិភ័យ នៃការថែទាំសុខភាពហិរញ្ញវត្ថុផ្ទាល់ខ្លួនមិនបានល្អ។

គួរជម្រាបជូនថា បំណុលល្អ អាចជាការវិនិយោគដែលបង្កើនទ្រព្យសម្បត្តិ បង្កើនផាសុកភាពតែមិនមែនជាភាពហ៊ឺហា ឬកម្ចីដែលផ្តល់ភាពងាយស្រួលក្នុងការរស់នៅ ពង្រឹងសុវត្ថិភាព និងការវិនិយោគទៅក្នុងរយៈវែង។ ឧទាហរណ៍ការវិនិយោគលើកម្ចីនៃការបង្កើនជំនាញ ឬការសិក្សាមហាវិទ្យាល័យ ឬក៏ការទិញសម្ភារដាក់ជួល ដើម្បីរកចំណូលបន្ថែម។ យ៉ាងណាមិញ បំណុលដែលរាប់ថាមិនល្អ ដូចជាកម្ចីដែលមានការប្រាក់ខ្ពស់ ការបង់រំលោះទ្រព្យដែលគ្រាន់តែលម្អភ្នែកញាតិ ឬសម្ភារមិនចាំបាច់ណាមួយ គឺបង្កឱ្យស្ត្រេសនឹងហិរញ្ញវត្ថុខ្លួនឯងកាន់តែច្រើនឡើង៕