កម្មវិធី Women Innovators Bootcamp ក្រោមកម្មវិធី SparkMeet រដូវកាលទី៤ បានប្រកាសជ្រើសរើសនិស្សិតស្រី និងស្រ្តី ចូលរួមវគ្គបណ្តុះបណ្តាលពីបច្ចេកវិទ្យា ភាពជាអ្នកដឹកនាំ និងសហគ្រិនភាព រយៈពេល ៦សប្តាហ៍។ វគ្គបណ្តុះបណ្តាលពីបច្ចេកវិទ្យានេះ ចាប់ផ្ដើមពីថ្ងៃទី២៦ ខែមេសា ដល់ថ្ងៃទី​៣១ ខែឧសភា ឆ្នាំ២០២៥ នៅមជ្ឈមណ្ឌលបណ្តុះធុរកិច្ចថ្មី “តេជោ”។

កញ្ញា សួន សុកាវណ្ណី សហការីកម្មវិធីបណ្តុះធុរកិច្ចថ្មី បានប្រាប់ឱ្យដឹងថា កម្មវិធីបណ្តុះបណ្តាល Women Innovators Bootcamp រយៈពេល ៦សប្តាហ៍នេះ ត្រូវបានរចនាឡើង ដើម្បីលើកកម្ពស់ និងគាំទ្រស្ត្រីក្នុងវិស័យបច្ចេកវិទ្យា, ភាពជាអ្នកដឹកនាំ និងសហគ្រិនភាព។ ជាពិសេស ដើម្បីផ្ដល់ការបណ្តុះបណ្តាល ដោយផ្ទាល់ពីអ្នកជំនាញក្នុងវិស័យទាំងនេះ សម្រាប់ជួយជាស្ពានក្នុងការដោះស្រាយបញ្ហា ការអភិវឌ្ឍអត្តសញ្ញាណឌីជីថល និងការកសាងបណ្តាញទំនាក់ទំនង។

តាមរយៈការចូលរួមបណ្តុះបណ្តាលនេះ កញ្ញា សួន សុកាវណ្ណី លើកឡើងថា និស្សិតស្រី និងស្រ្តី នឹងទទួលបាននូវអត្ថប្រយោជន៍មួយចំនួនដូចជា ការស្គាល់ខ្លួនឯង និងបង្កើនទំនុកចិត្ត ដែលនឹងអាចអភិវឌ្ឍសមត្ថភាពនិយាយជាសាធារណៈ និងការប្រើប្រាស់បណ្ដាញសង្គម។ បន្ថែមពីនេះ ស្រ្តីនឹងមានការគិតប្រកបដោយច្នៃប្រឌិតអំពីវិធីសាស្ត្រការច្នៃប្រឌិត និងការដោះស្រាយបញ្ហាដោយប្រើ Design Thinking។ ក្នុងនោះ ជំនាញឌីជីថល ដែលនាំឱ្យអភិវឌ្ឍអត្តសញ្ញាណផ្ទាល់ខ្លួន, ការយល់ដឹងអំពីទីផ្សារឌីជីថល និងការបង្កើតមាតិកាលើ TikTok។ ជាពិសេស ការអភិវឌ្ឍភាពជាមេដឹកនាំ និងកសាងបណ្តាញទំនាក់ទំនងតភ្ជាប់ជាមួយស្ត្រីដែលមានគំនិតដូចគ្នា និងអ្នកជំនាញឧស្សាហកម្ម។

កញ្ញា សួន សុកាវណ្ណី រំពឹងថា កម្មវិធី Women Innovators Bootcamp នេះ នឹងជួយស្រ្តី និងក្មេងស្រី បង្កើនទំនុកចិត្តក្នុងការដឹកនាំ និងការបង្កើតឥទ្ធិពលនៅក្នុងឧស្សាហកម្មរបស់ខ្លួន។ ពួកគេនឹងអាចបង្កើតអត្តសញ្ញាណឌីជីថលរឹងមាំ, រៀនអំពីការប្រើប្រាស់ TikTok ដើម្បីបង្កើតមាតិកា, ភាពជាអ្នកដឹកនាំ, និងអភិវឌ្ឍជំនាញច្នៃប្រឌិត ដើម្បីដោះស្រាយបញ្ហាយ៉ាងមានប្រសិទ្ធភាព។ កម្មវិធីនេះ នឹងជំរុញឱ្យស្ត្រីក្លាយជាមេដឹកនាំដែលអាចប្រើប្រាស់បច្ចេកវិទ្យា និងការសហការរបស់ពួកគេ ដើម្បីបង្កើតផលវិជ្ជមានក្នុងសហគមន៍ និងអាជីវកម្ម។

ដើម្បីអាចចូលរួមវគ្គបណ្តុះបណ្តាលនេះ បេក្ខជនត្រូវដាក់ពាក្យតាមរយៈតំណភ្ជាប់ (Link) https://forms.gle/nBnPjMoqcCLawa987 ឱ្យបានមុនថ្ងៃផុតកំណត់នៅថ្ងៃទី១០ ខែមេសា ឆ្នាំ២០២៥។

គួរជំរាបជូនថា កម្មវិធីនេះបើកសម្រាប់ស្រ្តីដាក់ពាក្យតែប៉ុណ្ណោះ ដែលជា និស្សិតសាកលវិទ្យាល័យ អ្នកអាជីពវ័យក្មេង ចង់អភិវឌ្ឍជំនាញរបស់ខ្លួន អ្នកចាប់ផ្ដើមអាជីវកម្ម ចង់បង្កើត និង អភិវឌ្ឍគំនិតអាជីវកម្ម ឬ ស្ត្រីដែលចង់បង្កើនទំនុកចិត្ត និង បង្កើតអត្តសញ្ញាណឌីជីថលរបស់ខ្លួន៕