ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឱកាសសិក្សាអាហារូបករណ៍ថ្នាក់បរិញ្ញបត្រ ថ្នាក់បរិញ្ញាបត្រជាន់ខ្ពស់ ថ្នាក់បណ្ឌិត និងថ្នាក់ឯកទេស (Specialist) ចំនួន៤០កន្លែងនៅសហព័ន្ធរុស្សីពីកម្មវិធីអាហារូបករណ៍រដ្ឋាភិបាលរុស្សីឆ្នាំសិក្សា២០២៣-២០២៤។
ជំនាញដែលអាហារូបករណ៍ផ្ដល់ជូនរួមមាន ០១កន្លែងសម្រាប់ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជាលើជំនាញសិល្បៈ វប្បធម៌ តូយ៍តន្ត្រី ចម្រៀង ភាពយន្តជាដើម។ ១៥កន្លែងសម្រាប់ការសិក្សាជំនាញនុយក្លេអ៊ែរស៊ីវិល និងជំនាញពាក់ព័ន្ធ និង២៤កន្លែងសម្រាប់ការសិក្សាជំនាញទូទៅដូចជា ពេទ្យ វិស្វកម្មអគ្គិសនី វិស្វកម្មយន្តហោះ វិស្វកម្មមេកានិច សំណង់ស៊ីវិល ស្ថាបត្យកម្ម ទំនាក់ទំនងអន្តរជាតិ នយោបាយ សេដ្ឋកិច្ចគ្រប់គ្រង ព័ត៌មានវិទ្យា ច្បាប់ បរិស្ថាន និងកសិកម្ម។
បេក្ខជនដែលមានចំណាប់អារម្មណ៍ក្នុងការដាក់ពាក្យត្រូវបំពេញឯកសារមួយចំនួនដូចជា លិខិតឆ្លងដែន (មានសុពលភាព ១ឆ្នាំ៦ខែ គិតត្រឹមថ្ងៃដាក់ពាក្យ) លិខិតពិនិត្យសុខភាពទូទៅ និងលិខិតបញ្ជាក់គ្មានជំងឺអេដស៍ ជំងឺថ្លើម ជំងឺស្វាយ និងជំងឺរបេងដែលចេញដោយនាយកដ្ឋានសុខភាពសិក្សានៃក្រសួងអប់រំ យុវជន និងកីឡា ឬដោយមន្ទីរពេទ្យរដ្ឋ។
ជាមួយគ្នានេះបេក្ខជនត្រូវភ្ជាប់ជាមួយសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃស្មើ (ភ្ជាប់ជាមួយព្រឹត្តិបត្រពិន្ទុការសិក្សាប្រចាំឆ្នាំសម្រាប់សញ្ញាបត្រដែលគ្មានបញ្ជាក់និទ្ទេស) សម្រាប់បេក្ខជនស្នើសុំបន្តការសិក្សាថ្នាក់បរិញ្ញាបត្រ ឬថ្នាក់ឯកទេស។ បេក្ខជនត្រូវមានសញ្ញាបត្រថ្នាក់បរិញ្ញាបត្រ និងព្រឹត្តិបត្រពិន្ទុការសិក្សាសម្រាប់ការស្នើថ្នាក់បរិញ្ញាបត្រជាន់ខ្ពស់។ ត្រូវមានសញ្ញាបត្របរិញ្ញាបត្រជាន់ខ្ពស់ និងព្រឹត្តិបត្រពិន្ទុការសិក្សាសម្រាប់ការស្នើថ្នាក់សិក្សាបណ្ឌិត និងភ្ជាប់ជាមួយឯកសារជំនួយផ្សេងៗដូចជា ប័ណ្ណសរសើរ មេដាយប្រឡង សញ្ញាបត្រភាសាបរទេស លិខិតថ្លែងអំណរគុណ ប្រសិនបើមាន។
គួរបញ្ជាក់ដែរថា ការបកប្រែសញ្ញាបត្រ ព្រឹត្តបត្រពិន្ទុ និងឯកសារពាក់ព័ន្ធផ្សេងៗត្រូវធ្វើឡើងនៅក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា។
បេក្ខជនអាចចូលធ្វើការបំពេញពាក្យស្នើសុំអាហារូបករណ៍តាមរយៈ https://education-in-russia.com/ ។ សម្រាប់ព័ត៌មានបន្ថែមអាចទំនាក់ទំនងទៅកាន់ មជ្ឈមណ្ឌលវិទ្យាសាស្ត្រ និងវប្បធម៌រុស្សី ដែលមានអាសយដ្ឋានផ្ទះលេខ១០៣ មហាវិថីព្រះនរោត្តម ទូរស័ព្ទលេខ ០២៣ ២១៣ ៥០៨ ឬតាមគេហទំព័រ Facebook៖ https://facebook.com/rcckcam ។
ចាប់ទទួលពាក្យពីថ្ងៃផ្សាយដំណឹងនេះរហូតដល់ថ្ងៃទី១៥ ខែធ្នូ ឆ្នាំ២០២៣៕
