សៀមរាប – សម្រាប់​សិស្សានុសិស្ស ឬយុវជន ដែល​មាន​បំណង​ចង់​សិក្សា​ជំនាញ​វិជ្ជាជីវៈ (TVET) ពេលនេះ វិទ្យាស្ថាន​បច្ចេកទេស​ភូមិ​ភាគ​តេជោសែនសៀមរាប បានប្រកាស​ផ្តល់​អាហារូបករណ៍​ ១០០%​ រហូត​ដល់ទៅ​ចំនួន ៥០០កន្លែង។

បើតាមសេចក្តីជូនដំណឹង​របស់វិទ្យាស្ថាន អាហារូបករណ៍​ទាំង​៥០០កន្លែងនោះ មានអាហារូបករណ៍​សម្រាប់ថ្នាក់បរិញ្ញាបត្រ​ចំនួន ៦០កន្លែង ទៅ​លើជំនាញ ម៉ាឃីតធីង ២០កន្លែង, គ្រប់គ្រងទូទៅ ២០កន្លែង, និង គណនេយ្យ និង​ហិរញ្ញវត្ថុ​ ចំនួន២០កន្លែង។

សម្រាប់សញ្ញាបត្រ​ជាន់ខ្ពស់បច្ចេកទេស ឬបរិញ្ញាបត្ររង ចំនួន ១២៥កន្លែង រួមមានជំនាញ វិស្វកម្មអគ្គិសនី​ចំនួន ៣៥កន្លែង, វិស្វកម្ម​សំណង់ស៊ីវិល ចំនួន៣០កន្លែង, វិស្វកម្ម​បរិក្ខាត្រជាក់ ចំនួន៣០កន្លែង និង​វិទ្យាសាស្រ្ត​កុំព្យូទ័រចំនួន ៣០កន្លែង។

សញ្ញាបត្រ​បច្ចេកទេស និង​វិជ្ជាជីវៈ ១ (C1) ចំនួន ១៨០កន្លែង រួមមាន ជំនាញ តម្លើង​បណ្តាញ​អគ្គិសនី​ក្នុង​អគារ​ចំនួន ៣៥កន្លែង, សេវាកម្ម​បរិក្ខា​ត្រជាក់​ក្នុង​គេហដ្ឋាន ចំនួន​៣៥កន្លែង, ការងារ​កំបោរ ៣០កន្លែង, សេវាកម្ម​សណ្ឋាគារ ២០កន្លែង, ការតម្លើងបណ្តាញ​បំពង់ទឹក ៣០កន្លែង និង​សេវាកម្មកុំព្យូទ័រ ៣០កន្លែង។

វិញ្ញាបនបត្រ​វិជ្ជាជីវៈ (សិក្សា​៧ខែ) មានចំនួន ១៣៥កន្លែង រួមមានជំនាញ តម្លើង​បណ្តាញ​អគ្គិសនី​ក្នុងអគារ ចំនួន៣០កន្លែង, ជួសជុល​បរិក្ខាត្រជាក់ ចំនួន៣០កន្លែង, រចនាប្លង់អគារ ៣០កន្លែង, ជំនួយ​ការ​ចុងភៅ ៣០កន្លែង និង​បដិសណ្ឋារកិច្ច ចំនួន១៥កន្លែង។

បេក្ខជន​ដែលមាន​ចំណាប់អារម្មណ៍​អាច​ដាក់ពាក្យ​សុំអាហារូបករណ៍​នៅទីតាំងវិទ្យាស្ថាន ស្ថិត​នៅ​ភូមិ​បន្ទាយចាស់ សង្កាត់ស្លក្រាម ក្រុងសៀមរាប (ខាងកើត​ផ្សារ​សាមគ្គី​៧០ម៉ែត្រ) ដោយ​ចាប់ផ្តើម​ទទួលពាក្យ​ពីថ្ងៃជូនដំណឹង​នេះ រហូត​ដល់ថ្ងៃទី១៧ ខែកុម្ភៈ ឆ្នាំ​២០២៣។ បេក្ខនារី ជនមានពិការភាព ជនក្រីក្រ និងជនជាតិដើម​ភាគតិច ត្រូវ​បានលើកទឹកចិត្ត ផ្តល់អាហារូបករណ៍​គ្រប់វគ្គសិក្សា៕