ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សានៅក្រៅប្រទេសធ្វើឱ្យសិស្សនិស្សិតអាចបង្កើតទំនាក់ទំនង និងបទពិសោធន៍ថ្មីៗក្នុងការរស់នៅ និងសិក្សានៅឆ្ងាយប្រទេសកំណើត ។ នេះជាការលើកឡើងរបស់កញ្ញា ហ៊ួរ គីមហួង និស្សិតកម្ពុជាកំពុងស្នាក់នៅ និងសិក្សាក្នុងប្រទេសចិន ។
កញ្ញា ហ៊ួរ គីមហួង ជានិស្សិតកំពុងសិក្សាថ្នាក់បរិញ្ញាបត្រជំនាញ ការគ្រប់គ្រងទិន្និន័យ នៃសាកលវិទ្យាល័យវិទ្យាសាស្ត្រ និងបច្ចេកវិទ្យាប៉េកាំង និងជានិស្សិតអាហារូបករណ៍រដ្ឋាភិបាលចិនឆ្នាំសិក្សា២០២២-២០២៣ ។ កញ្ញា ហ៊ួរ គីមហ៊ួង បានលើកឡើងថា បានជាកញ្ញាជ្រើសរើសរៀនជំនាញនេះ ព្រោះវាជាជំនាញថ្មីដែលកម្ពុជាមិនទាន់មានការសិក្សាពីជំនាញនេះ ហើយជំនាញនេះក៏ទើបតែមាននៅប្រទេសចិនក្នុងឆ្នាំ២០១៧ផងដែរ ។
យុវតីវ័យ២០ឆ្នាំរូបនេះបន្ថែមថា កត្តាជម្រុញចិត្តឱ្យរូបនាងប្រឡងយកអាហារូបករណ៍សិក្សានៅប្រទេសចិន ព្រោះកញ្ញាមើលឃើញឱកាសជាច្រើនដូចជា ការសិក្សានៅក្រៅប្រទេសជួយសម្រួលបន្ទុកគ្រួសារ ការសិក្សាដោយឥតគិតថ្លៃ និងអត្ថប្រយោជន៍ផ្សេងៗក្នុងការសិក្សាពីអាហារូបករណ៍ ។ លើសពីនេះកញ្ញាចង់បើកឱកាសខ្លួនឯងបានសិក្សាស្វែងយល់ និងទទួលបានបទពិសោធន៍ថ្មីៗដើម្បីមកអភិវឌ្ឍន៍ប្រទេសជាតិឱ្យមានការរីកចម្រើន និងមានឯករាជ្យភាពជាងមុន។
យុវតី ហ៊ួរ គីមហួង បានឱ្យដឹងថា គន្លឹះដែលធ្វើឱ្យជោគជ័យក្នុងការដាក់ពាក្យអាហារូបករណ៍នេះ ដោយសារកត្តាមួយចំនួនដូចជា ការចេះភាសាចិនខ្លះៗដែលអាចប្រឡងយកសញ្ញាបត្រភាសាចិន HKS ដើម្បីផ្គួបផ្សំជាមួយឯកសារផ្សេងៗក្នុងការដាក់ពាក្យស្នើសុំអាហារូបករណ៍ ។ កញ្ញាបានបន្តថា ការដាក់ពាក្យស្នើសុំអាហារូបករណ៍នេះមានតាមដំណាក់កាលផ្សេងគ្នា ហើយតម្រូវការឯកសារខុសៗគ្នាទៅតាមតម្រូវការរបស់សាលានីមួយៗផងដែរ ។ កញ្ញា គីមហ៊ួង បានបញ្ជាក់ដែរថា នៅពេលដាក់ពាក្យសិក្សាជាប់នៅខ្មែរតង់ទីមួយហើយ បេក្ខជនត្រូវដាក់ពាក្យអាហារូបករណ៍តាមរយៈអាហារូបករណ៍ CSC តាម Online បាន ដោយលក្ខខណ្ឌក្នុងការប្រឡងចូលសាលាមាន២ផ្សេងគ្នាទៅតាមសាកលវិទ្យាល័យគឺការប្រលងចូល និងការសម្ភាសន៍ ។
បេក្ខជនជ័យលាភីអាហារូបករណ៍រូបនេះបន្តថា ក្រោយមកស្នាក់នៅ និងសិក្សានៅប្រទេសចិនកញ្ញាមិនមានបញ្ហាក្នុងការសិក្សា ការស្នាក់នៅ ឬការទំនាក់ទំនងទេ ប៉ុន្តែសម្រាប់អាហារមានការលំបាកបន្តិចព្រោះអាហារភាគច្រើនមានរស់ជាតិដិត និងហិរ ។ ជាមួយគ្នានេះ នៅក្នុងអគារស្នាក់នៅរបស់និស្សិត តាមជាន់នីមួយៗមានផ្ទះបាយសម្រាប់និស្សិតអាចចម្អិនម្ហូបដោយខ្លួនឯងបានទើបធ្វើឱ្យកញ្ញា និងសិស្សដទៃទៀតងាយស្រួលផងដែរ ។
« ខ្ញុំ និងនិស្សិតដទៃទៀតមានភាពងាយស្រួលក្នុងការស្វែងរកឯកសារស្រាវជ្រាវ ចំណាយពេលស្វ័យសិក្សានៅបណ្ណាល័យក្រៅម៉ោងសិក្សា និងមានឯករាជ្យភាពកាន់តែប្រសើរ »
កញ្ញា ហ៊ួរ គីមហ៊ួង
ជាមួយគ្នានេះ កញ្ញា គីមហ៊ួង ប្ដេជ្ញាថា ក្រោយបញ្ចប់ការសិក្សានៅប្រទេសចិននឹងត្រឡប់មកប្រទេសកម្ពុជាវិញដើម្បីយកចំណេះជំនាញ និងបទពិសោធន៍ថ្មីដែលបានសិក្សាអាហារូបករណ៍នវទៅអភិវឌ្ឍប្រទេសជាតិឱ្យមានការរីកចម្រើន ។
ជាចុងក្រោយ កញ្ញា ហ៊ួរ គីមហ៊ួង ក៏លើកទឹកចិត្តដល់សិស្សនិស្សិតជាពិសេសសិស្សានុសិស្សថ្នាក់ទី១១ ឬទី១២ដែលមានចំណាប់អារម្មណ៍ក្នុងការដាក់ពាក្យសិក្សានៅប្រទេសចិន គួរតែរៀនត្រៀមភាសាចិនឱ្យមុនដើម្បីមានភាពងាយស្រួលក្នុងការដាក់ពាក្យស្នើសុំអាហារូបករណ៍ ៕
