ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវសិស្ស ប៉ោយចា ផានីត ជាម្ចាស់ជ័យលាភីលេខ១ ផ្នែកអក្សរសិល្ប៍ខ្មែរ ក្នុងប្រឡងសិស្សពូកែទូទាំងប្រទេស ឆ្នាំ២០២៤ ក្នុងកម្រិតថ្នាក់ទី១២ ។ លទ្ធផលដ៏ល្អនេះ ផានីត និយាយថា រូបគេមានការតាំងចិត្ត និងបានខិតខំរៀនសូត្រនៅសាលា និងស្វ័យសិក្សាបន្ថែមនៅផ្ទះ ដោយអានសៀវភៅ និងអនុវត្តការសរសេរជាប្រចាំ ដើម្បីយកចំណេះដឹងទាំងនោះសម្រាប់ចូលរួមប្រឡងសិស្សពូកែទូទាំងប្រទេសនៅឆ្នាំនេះ។
យុវសិស្ស ប៉ោយចា ផានីត ជាសិស្សថ្នាក់ទី១២ នៃវិទ្យាល័យរោងគោ ខេត្តបន្ទាយមានន័យ ប្រាប់ឱ្យដឹងថា រូបគេសម្រេចចិត្តចូលរួមប្រឡងសិស្សពូកែទូទាំងប្រទេសផ្នែកអក្សរិល្ប៍ខ្មែរ គឺដោយសារខ្លួនចូលចិត្តផ្នែកអក្សរសិល្ប៍ខ្មែរ ពោលគឺចូលចិត្តការសរសេរ និងអានសៀវភៅ ។
នៅមានកត្តាចម្បងជំរុញផ្សេងទៀត ដែលធ្វើឱ្យ យុវសិស្ស ផានីត ជាប់ជាសិស្សពូកែទូទាំងប្រទេសនោះ គឺកត្តាជំរុញពីគ្រួសារ បានផ្ដល់ថវិកា សម្ភារៈសិក្សា និងផ្គត់ផ្គង់ការចំណាយផ្សេងៗ និងមានមិត្តភក្ដិ លោកគ្រូ អ្នកគ្រូតែងលើកទឹកចិត្ត ផ្ដល់ការណែនាំល្អឱ្យចូលរួមប្រកួតនេះ។
ម្ចាស់ជ័យលាភីលេខ១ ផ្នែកអក្សរសិល្ប៍ខ្មែរ រូបនេះ បញ្ជាក់បន្ថែមថា នេះជាលើកទីមួយហើយ ដែលសាលារៀនរបស់ខ្លួននៅឆ្ងាយពីទីក្រុង មានសិស្សទទួលជ័យលាភីសិស្សពូកែផ្នែកអក្សរសិល្ប៍ខ្មែរទូទាំងប្រទេស។ លទ្ធផលនេះ ធ្វើឱ្យរូបគេ មានក្ដីរំភើប និងត្រេកអរ ព្រោះមិននឹកស្មានថា អាចនាំយកជ័យលាភីជូនសាលាបាន។
ខ្ញុំមានភាពសប្បាយរីករាយដែលបានទទួលជ័យលាភីសិស្សពូកែផ្នែកអក្សរសិល្ប៍ខ្មែរទូទាំងប្រទេស និងមានមោទនភាពសម្រាប់សាលាផងដែរ
យុវសិស្ស បោយ ចាផានិត
មានទីកន្លែងកំណើតនៅភូមិបួរ ឃុំសឿ ស្រុកមង្គលបុរី ខេត្តបន្ទាយមានជ័យ ផានីត បញ្ជាក់ទៀតថា រូបគេពូកែផ្នែកភាសាខ្មែរតាំងពីក្មេង ប៉ុន្តែរូបគេបានត្រៀមខ្លួនចូលរូមប្រឡងសិស្សពូកែនេះ នៅពេលចាប់ផ្ដើមរៀនថ្នាក់ទី១១ ដោយស្វែងយល់អំពីការសរសេរ, គន្លឹះពូកែមុខវិជ្ជាភាសាខ្មែរ, អានសៀវភៅ និងអនុវត្តការសរសេរជារៀងរាល់ថ្ងៃ ដើម្បីពង្រឹងសមត្ថភាពតាមរយៈការកំណត់ពេលវេលាសរសេរតែងសេចក្ដី ។ ឧទាហរណ៍ ក្នុងរយៈពេល២ម៉ោង យើងអាចសរសេរតែងសេចក្ដីឱ្យបានមួយប្រធានបទ។
បើតាម យុវសិស្ស ប៉ោយចា ផានីត ដើម្បីអាចក្លាយជាសិស្សពូកែផ្នែកអក្សរសិល្ប៍ខ្មែរ គឺ ទី១. អានសៀវភៅឱ្យច្រើន មានន័យថា អានស្នាដៃអក្សរសិល្ប៍ហើយត្រូវគិត វិភាគរកអត្ថន័យ, ទី២. ស្ដាប់ឯកសារអប់រំ សំដៅលើ សិស្សនុសិស្សដែលមិនចូលចិត្តអាន ដើម្បីអាចយល់ និងឆាប់ចាប់បានលឿន, ទី៣. ល្បិចក្នុងការសរសេរ គឺជាការសរសេរឱ្យមានរបៀបរៀបរយទៅតាមលំដាប់លំដោយ និងរចនាបទស្អាត។ កាលណាសរសេរអក្សរស្អាត គឺអាចទាក់ទាញចិត្តអ្នកកែ ប៉ុន្តែបើសរសេរមិនស្អាត ធ្វើឱ្យគេមិនចង់កែកិច្ចការរបស់យើង។
ផានីត បន្ថែមថា សិស្សានុសិស្សត្រូវរកវិធីសាស្រ្តណារៀនឱ្យបានរាល់ថ្ងៃ និងក្លាយទៅជាទម្លាប់។ ប្រសិនបើសិស្សានុសិស្សមិនមានទម្លាប់រៀនទេ នឹងធ្វើឱ្យខ្ជិលរហូតលែងចង់រៀន។ ទន្ទឹមគ្នានេះ ទទួលស្គាល់ថា ការរៀនលំបាក ស្រ្តេស ក៏ពិតមែន ប៉ុន្តែយើងនៅតែអាចរកវិធីបំបាត់ស្រ្តេសបាន ដូចជា ស្ដាប់ចម្រៀង ឬមើលការកម្សាន្តផ្សេងៗបាន។
ម្ចាស់ជ័យលាភីលេខ១ ផ្នែកអក្សរសិល្ប៍ខ្មែរ រូបនេះ ក៏បានលើកទឹកចិត្តសិស្សានុសិស្សត្រូវដឹងឱ្យច្បាស់ថា មុខវិជ្ជាណាដែលខ្លួនពូកែ ហើយត្រូវខិតខំប្រឹងប្រែងរៀនសូត្រ និងសិក្សាស្រាវជ្រាវឱ្យបានច្រើនតាមប្រព័ន្ធអ៊ីនធឺណិតបន្ថែម។ ទន្ទឹមគ្នានេះ កុំចំណាយពេលពេលធ្វើរឿងដែលមិនជួយដល់ការសិក្សា ដោយត្រូវដឹងថា មានតែការសិក្សាទេដែលអាចផ្លាស់ប្ដូរជីវិតរបស់យើងបាន៕
