ក្រសួងអប់រំ យុវជន និងកីឡា គ្រោងនឹងធ្វើការផ្សព្វផ្សាយវិញ្ញាសា និងអត្រាកំណែនៃការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ២៨ សីហា ២០២៥ ជាសាធារណៈ ក្រោយពេលប្រកាសលទ្ធផលជាផ្លូវការ។

អ្នកនាំពាក្យក្រសួងអប់រំ យុវជន និងកីឡា លោកជំទាវ ឃួន វិច្ឆិកា មានប្រសាសន៍ថា ការសម្រេចរបស់ក្រសួងក្នុងការផ្សព្វផ្សាយប្រធានវិញ្ញាសា និងអត្រាកំណែជាសាធារណៈនេះ គឺដើម្បីបង្ហាគពីតម្លាភាព នៃការប្រឡង និងចូលរួមទប់ស្កាត់ការបង្ហោះឯកសារនានាក្នុងពេលដំណើរការប្រឡង និងកំណែ ចៀសវាងការយល់ច្រឡំនានា។

កាលពីយប់ថ្ងៃសុក្រ ពោលគឺក្រោយបញ្ចប់ដំណើរការសំណេរ នៃការប្រឡងសញ្ញាបត្រមធ្យមសិក្សាទុតិយភូមិ មានបណ្តាញសង្គមមួយចំនួនបានធ្វើការចែករំលែកនូវប្រធានវិញ្ញាសាគណិតវិទ្យា ដែលពួកគេអះអាងថា ជាវិញ្ញាសាដែលបានបែកធ្លាយពីវិញ្ញាសាគណិតវិទ្យាថ្នាក់វិទ្យាសាស្ត្រ នៃការប្រឡងសញ្ញាបត្រមធ្យមទុតិយភូមិ។

លោកជំទាវ ឃួន វិច្ឆិកា មានប្រសាសន៍ថា មកដល់ពេលនេះ ពុំទាន់មានការបញ្ជាក់ណាមួយថាជាការបែកវិញ្ញាសានោះទេ ហើយថា ឯកសារដែលបានឃើញ គឺកើតមានក្រោយដំណើរការប្រឡងរួច។

ជាមួយគ្នានេះ អង្គភាពប្រឆាំងអំពើពុករលួយ (ACU) ដែលតាមឃ្លាំមើលដំណើរការ នៃការប្រឡងសញ្ញាបត្រមធ្យមសិក្សាទុតិយភូមិនេះ នៅមិនទាន់បញ្ជាក់ជាផ្លូវការពីករណីនេះនៅឡើយ ដោយ ACU កំពុងស្វែងរកការសហការណ៍ជាមួយអ្នកប្រើប្រាស់បណ្តាញសង្គមបន្តទៀត ដើម្បីប្រមូលភ័ស្តុតាងឱ្យបានគ្រប់ជ្រុងជ្រោយ។

តាមសេចក្តីថ្លែងការណ៍ ដែលចេញផ្សាយនៅរំលអធ្រាត្រឈានចូលថ្ងៃទី១ កញ្ញា នេះ លោកបណ្ឌិត យ៊ិនទៀង ពុទ្ធិរិទ្ធ អនុប្រធានទី១ អង្គភាពប្រឆាំងអំពើពុករលួយ បានបង្ហាញពីលទ្ធផលនៃការធ្វើកោសលវិច័យ ដោយថា ឯកសារដែលបានបង្ហោះដោយគណនីបណ្តាញសង្គម គឺដូចទៅនឹងវិញ្ញាសាប្រឡងគណិតវិទ្យាថ្នាក់វិទ្យាសាស្រ្ត ប្រឡងថ្ងៃទី២៩ សីហា វេលាម៉ោង២រសៀល ពី៨០ ទៅ១០០ភាគរយ តែយ៉ាងណា ACU កំពុងពិចារណា និងធ្វើការស្រាវជ្រាវបន្តដោយតម្លាភាព។

ជាវិធានការឆ្លើយតបនឹងស្ថានភាពថ្មីៗក្នុងការប្រឡងបាក់ឌុបឆ្នាំនេះ នៅក្នុងកិច្ចប្រជុំណែនាំបច្ចេកទេសដល់ប្រធាន អនុប្រធានមណ្ឌលកំណែ កាលពីព្រឹកថ្ងៃទី៣១ ខែសីហា ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានប្រកាសដាក់ចេញនូវវិធានការថ្មីចំនួន៩ចំណុច ក្នុងនោះ ក្រសួងក៏នឹងចេញប្រកាសគ្រប់គ្រងសាលាបង្រៀនគួរឯកជន ត្រៀមសម្រាប់ការប្រឡងទាំងអស់ ដើម្បីបង្កើនការទទួលខុសត្រូវ ព្រោះតែកន្លងមកក្រសួងសង្កេតឃើញថា សាលាបង្រៀនគួរឯកជនមួយចំនួនចូលចិត្តបង្ហោះព័ត៌មានគ្មានប្រភពច្បាស់លាស់ ដើម្បីបង្កើនប្រជាប្រិយភាព។

បើយោងតាមបទបញ្ញត្តិនៃការប្រឡងសញ្ញាបត្រមធ្យមសិក្សាទុតិយភូមិ ការថត និងផ្សព្វផ្សាយប្រធានវិញ្ញាសា សន្លឹកកិច្ចការបេក្ខជន និងអត្រាកំណែ ទោះបីផ្លូវការក្ដី ឬក្រៅផ្លូវការក្ដីត្រូវបានហាមឃាត់។ អ្នកប្រព្រឹត្តល្មើសនឹងបទប្បញ្ញត្តិនេះ ត្រូវទទួលខុសត្រូវចំពោះមុខច្បាប់៕