ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការផ្តល់វ៉ាក់សាំងបង្ការជំងឺគ្រុនស្វិតដៃជើងដល់កុមារអាយុក្រោម៥ឆ្នាំជាលើកទី២ បានចាប់ផ្តើមហើយកាលពីថ្ងៃចន្ទ រហូតដល់ថ្ងៃទី១៤ ខែឧសភា ឆ្នាំ២០២៦។ គឺជាយុទ្ធនាការចាក់វ៉ាក់សាំងជំងឺគ្រុនស្វិតដៃជើងដោយឥតគិតថ្លៃសម្រាប់រយៈពេល១១ថ្ងៃ។
មានកុមារអាយុក្រោម៥ឆ្នាំសរុបចំនួន ៥៦៦ ៧១៣នាក់ បានទទួលថ្នាំបង្ការនេះនៅតាមរាជធានីខេត្តគោលដៅចំនួន៨ រួមមានរាជធានីភ្នំពេញ កណ្តាល ព្រះវិហារ ស្ទឹងត្រែង រតនគិរី មណ្ឌលគិរី ឧត្តរមានជ័យ និងខេត្តបន្ទាយមានជ័យ ក្នុងអំឡុងការផ្តល់វ៉ាក់សាំងបង្ការជំងឺគ្រុនស្វិតដៃជើងជុំទី១ កាលពីដើមខែមេសា ឆ្នាំ២០២៦។
លោកស្រី វេជ្ជបណ្ឌិត គឹម រ័ត្ននា នាយកមជ្ឈមណ្ឌលជាតិគាំពារ មាតា និងទារក បានប្រាប់បណ្តាញព័ត៌មាន AMS ថា ជំងឺស្វិតដៃជើងគឺជាជំងឺដ៏កាចសាហាវដែលមិនមានថ្នាំព្យាបាលនោះទេ។ កុមារដែលកើតជំងឺនេះត្រូវពិការអស់មួយជីវិត ប៉ុន្តែជំងឺនេះ អាចការពារបានដោយថ្នាំបង្ការ។
លោកស្រី វេជ្ជបណ្ឌិត បន្ថែមថា ការផ្តល់បន្ថែមថ្នាំបង្ការជំងឺគ្រុនស្វិតដៃជើង មានសារៈសំខាន់ សម្រាប់ការពង្រឹងភាពស៊ាំរបស់កុមារដែលមានអាយុពី ០ ដល់ ៥៩ខែ និងការពារពួកគេពីជំងឺដ៏កាចសាហាវនេះ។
ការផ្តល់វ៉ាក់សាំងនេះ ធ្វើឡើងនៅតាមមណ្ឌលសុខភាព ទារកដ្ឋាន មត្តេយ្យសាលា សាលារៀនរដ្ឋឯកជន ក្នុងភូមិ និងនៅទីតាំងដែលមានបដាសម្គាល់ផ្សព្វផ្សាយអំពីការផ្តល់ថ្នាំបង្ការគ្រុនស្វិតដៃជើង៕
អត្ថបទ ៖ សៅ សុខអេង
